مهندس كهرباء ولا ضابط متخصص ؟!!!

**diablo1231** · 06-11-2012 10:47 AM

السلام عليكم

انا يا رجالة محتار جدا في موضوع انا شايفه مصيري بالنسبالي , انا في اخر سنة هندسة حلوان قسم قوي والات كهربية , انا معايا كورسات لغة وكومبيوتر و PLC SCADA Distribution و المشروع بتاعي في Substation generation control and protection , والحمد لله في مجال التحكم والتوزيع معقول و ان شاء الله في المشروع علي اخر السنة هبقي ملم بالحماية , النقطة ان من كلام اصحابي والناس اللي اتخرجت ان الشغل صعب اوي الايام دي والمرتبات وحشة جدا يعني العادي ان المرتبات تبدأ من 300 جنيه والكويس اوي يوصل ل 1200 جنيه بالعافية و كمان ان المهندسن الخبرة في مصر مبيتحصلوش علي اكتر من 5000-6000 جنيه و بيطلع عنيهم في الشغل .

الفكرة اللي جتلي هي اني اقدم ضابط متخصص في الجيش و للعلم انا اصلا كان نفسي زمان ابقي ضابط في الجيش ووالدي ضابط و مش هبقي تعبان اوي في الحياة الميري والمرتب بقي يبدأ من 3000 جنيه ده غير طبعا الخدمات الكتيرة اوي اللي بيقدمها الجيش .

انا الاتنين عندي واحد بس الفيصل عندي و بشكل اساسي المرتب لأن حرام اكمل هندسة بعد 5 سنين تعب في الكلية واخد 500 جنيه , النقطة التانية هي المستقبل اني في الجيش هبقي موظف في الحكومة و ليا معاش مش زي القطاع الخاص في اي وقت يقولولي اتفضل امشي , انا عايز رأيكم يا جماعة وبالذات المهندسيين وشكرا !!

**mado83** · 06-11-2012 11:00 AM

توكل على الله وقدم فى الاكاديميه لان مش من السهل القبول
ولو قبلت يبقى خير ولو لا يبقى عملت اللى عليك

**mohamed_selim** · 06-11-2012 12:25 PM

معنديش اختيار مفضل بين الاتنين بس حبيت اوضح شويه حاجات ... لو الفرق بالنسبالك بس فى المرتب و الاستقرار ... الاستقرار فى الجيش مضمون كوظيفه بس متضمنش هتتوزع و تشتغل فين فحط ده فى بالك
المرتب فى الجيش معقول مع الخدمات بس مش هيزيد قوى بينما فى الشغل بره متضمنش ايه اللى ممكن يحصل (ممكن يزيد قوى او ميجيش اصلا) فالموضوع فيه مخاطره بس ممكن تزهزه معاك احسن من الجيش ....

**abdoumahros** · 06-11-2012 12:46 PM

شوف يا ابني واسمح لي اقول ابني لاني تجاوزت ال 50 عام
انا زيك مهندس كهرباء وخريج هندسه حلوان ونفس التخصص وبشتغل حاليا مدير الاداره الهندسيه في احدي الشركات قطاع خاص وشركه كبيره
كل كلام عن البطاله صح وكذلك عن المرتبات وبل اسوأ من كده بكتير وشركات كتير بتقفل وشركات كتير بتخفض المرتبات واذا كان عاجبك
والوضع اذداد سوء بعد الثوره وموش باين انه هايتصلح بالعكس كل يوم اسوء من اللي قبله
المهم اذا كنت متقبل الحياه العسكريه اتوكل علي الله احسن الف مره لان الشغل في القطاع الخاص
اللي علي قد حاله عاوز واسطه اما الشركات الحلوه المستقره دي عاوزه مجموعه وسايط
واعمل صلاه استخاره وربنا يدلك علي الصح

**kar!m** · 06-11-2012 12:57 PM

مع احترامي لاراء الجميع .. و عن خبرة كل المهندسين زمايلي اللي اشتغلوا في القوات المسلحه و دخلوا الكاديمية .. الشغل بره الجيش أفضل بكتير

لو انت مهندس شاطر .. ان شاء الله هتلاقي وظيفة كويسه .. خصوصا انك سنك صغير و معاك لغه كويسه .. لو انت فاهم كويس و مهاراتك كويسه .. انت ممكن ربنا يوفقك للشغل في شركه مالتي ناشيونال بمرتب كويس جدا .. بس زي ما قلت لك .. ده في الأول طبعا توفيق من ربنا .. و تاني حاجه انك تكون مهندس شاطر و فاهم .. و عندك مهارات و لغه.

أنا كنت شغال في مصنع و عارف الناس بتوع ال Control و ال automation و ال PLC مرتباتهم عامله ازاي .. شركات البترول و الحديد و الأسمنت و السيراميك و غيرهم بيدوا مرتبات ممتازة .. أفضل من مرتبات القوات المسلحة بمراحل .. و medial insurance أفضل و كل حاجه .. و مفيش حد بيقول لك امشي الا لو شغلك مش كويس .. و حتى لو حصل .. و زي ما قلت لك انت شاطر في شغلك .. ان شاء الله هتلاقي أكتر من مكان تاني ياخدك لخبرتك.

و اسأل أي حد مهندس شغال في الجيش قل له ايه رأيك بفكر أقدم في الأكاديمية و شوف رأيه ايه.

و ربنا يوفقك لما فيه الخير.

**memofree** · 06-11-2012 01:05 PM

المشاركة الأصلية كتبت بواسطة abdoumahros

شوف يا ابني واسمح لي اقول ابني لاني تجاوزت ال 50 عام
انا زيك مهندس كهرباء وخريج هندسه حلوان ونفس التخصص وبشتغل حاليا مدير الاداره الهندسيه في احدي الشركات قطاع خاص وشركه كبيره
كل كلام عن البطاله صح وكذلك عن المرتبات وبل اسوأ من كده بكتير وشركات كتير بتقفل وشركات كتير بتخفض المرتبات واذا كان عاجبك
والوضع اذداد سوء بعد الثوره وموش باين انه هايتصلح بالعكس كل يوم اسوء من اللي قبله
المهم اذا كنت متقبل الحياه العسكريه اتوكل علي الله احسن الف مره لان الشغل في القطاع الخاص
اللي علي قد حاله عاوز واسطه اما الشركات الحلوه المستقره دي عاوزه مجموعه وسايط
واعمل صلاه استخاره وربنا يدلك علي الصح

كلام مظبوط جدا جدا
و ربنا يوفئك

**epnmasr** · 06-11-2012 01:23 PM

شوف يا diablo1231 عن تجربه ناس كان عندها فرصه تدخل أكادميه ومدخلتش ورجعت ندمت
وناس دخلت أكادميه ولها سنين ولما بتعمل مقارنه بزملاءها في المجال وإحساسهم إنهم أكثر إنطلاق وحريه بردوه بتندم وخصوصاً لأن هذا المجال شغله مفتوح ومتصدقش اللي يقول غير كده وإن شاء الله مصر هتكون أفضل بإذن الله في المرحله القادمه ,
والفيصل في الموضوع شخصيتك ومدى تقبلك للميري والإلتزام به ومش معنى كلامي إن الميري حاجه وحشه بالعكس ده قمة الإنضباط والإلتزام وأفضل مدرسه لتقويم الشخص والشخصيه لذلك أنصحك بالتفكير جيداً بالموضوع ومدى ملائمته مع شخصيتك
وقبل كل شيئ والأهم من كل شيئ صلاة الإستخاره واليقين والتوكل على الله في أن إختيار الله هو الأنسب لنا فهو خلقنا وهو أعلم بنا
وهذا لكي لا تندم لأن من أقسى الأشياء على النفس الندم , والله الموفق إن شاء الله

**eng.m7md.ali** · 06-11-2012 01:29 PM

مفيش فرصة انك تسافر برة مثلا؟

**diablo1231** · 06-11-2012 01:33 PM

المشاركة الأصلية كتبت بواسطة mado83

توكل على الله وقدم فى الاكاديميه لان مش من السهل القبول
ولو قبلت يبقى خير ولو لا يبقى عملت اللى عليك

انا كنت بفكر في كده بس انا بفترض ن لو الاتنين متاحيين قدامي ايه الأفضل ليا :)

المشاركة الأصلية كتبت بواسطة mohamed_selim

معنديش اختيار مفضل بين الاتنين بس حبيت اوضح شويه حاجات ... لو الفرق بالنسبالك بس فى المرتب و الاستقرار ... الاستقرار فى الجيش مضمون كوظيفه بس متضمنش هتتوزع و تشتغل فين فحط ده فى بالك
المرتب فى الجيش معقول مع الخدمات بس مش هيزيد قوى بينما فى الشغل بره متضمنش ايه اللى ممكن يحصل (ممكن يزيد قوى او ميجيش اصلا) فالموضوع فيه مخاطره بس ممكن تزهزه معاك احسن من الجيش ....

في عوامل تانية تدخل في الاختيار بس مش شايفها اهم من المعيارين دول خصوصا في ظروف البلد الحالية و حضرتك عندك حق في كل اللي قلته بس انا مش من النوع اللي بيحب يخاطر اوي ..

المشاركة الأصلية كتبت بواسطة abdoumahros

شوف يا ابني واسمح لي اقول ابني لاني تجاوزت ال 50 عام
انا زيك مهندس كهرباء وخريج هندسه حلوان ونفس التخصص وبشتغل حاليا مدير الاداره الهندسيه في احدي الشركات قطاع خاص وشركه كبيره
كل كلام عن البطاله صح وكذلك عن المرتبات وبل اسوأ من كده بكتير وشركات كتير بتقفل وشركات كتير بتخفض المرتبات واذا كان عاجبك
والوضع اذداد سوء بعد الثوره وموش باين انه هايتصلح بالعكس كل يوم اسوء من اللي قبله
المهم اذا كنت متقبل الحياه العسكريه اتوكل علي الله احسن الف مره لان الشغل في القطاع الخاص
اللي علي قد حاله عاوز واسطه اما الشركات الحلوه المستقره دي عاوزه مجموعه وسايط
واعمل صلاه استخاره وربنا يدلك علي الصح

اهلا بيك يا فندم بس حضرتك كده ضلمتها في وشي يعني انا كده لو حتي طورت من نفسي مش هلاقي فرصة للشغل وحتي لو لاقيت هيبقي المرتب ضعيف والشغل كتير , طيب ايه اللي المفروض اعمله عشان احصل علي وظيفة معقولة علي افتراض اني مقدمتش في الاكاديمية ؟؟

المشاركة الأصلية كتبت بواسطة kar!m

مع احترامي لاراء الجميع .. و عن خبرة كل المهندسين زمايلي اللي اشتغلوا في القوات المسلحه و دخلوا الكاديمية .. الشغل بره الجيش أفضل بكتير

لو انت مهندس شاطر .. ان شاء الله هتلاقي وظيفة كويسه .. خصوصا انك سنك صغير و معاك لغه كويسه .. لو انت فاهم كويس و مهاراتك كويسه .. انت ممكن ربنا يوفقك للشغل في شركه مالتي ناشيونال بمرتب كويس جدا .. بس زي ما قلت لك .. ده في الأول طبعا توفيق من ربنا .. و تاني حاجه انك تكون مهندس شاطر و فاهم .. و عندك مهارات و لغه.

أنا كنت شغال في مصنع و عارف الناس بتوع ال control و ال automation و ال plc مرتباتهم عامله ازاي .. شركات البترول و الحديد و الأسمنت و السيراميك و غيرهم بيدوا مرتبات ممتازة .. أفضل من مرتبات القوات المسلحة بمراحل .. و medial insurance أفضل و كل حاجه .. و مفيش حد بيقول لك امشي الا لو شغلك مش كويس .. و حتى لو حصل .. و زي ما قلت لك انت شاطر في شغلك .. ان شاء الله هتلاقي أكتر من مكان تاني ياخدك لخبرتك.

و اسأل أي حد مهندس شغال في الجيش قل له ايه رأيك بفكر أقدم في الأكاديمية و شوف رأيه ايه.

و ربنا يوفقك لما فيه الخير.

انا واحد صحبي والده لواء في الهيئة الهندسية خبرة اكتر من 30 سنة في الانشاءات و مرتبه مش قد كده خالص ف انا متفق معاك بس زي ما حضرتك شايف الناس مجمعة ان الدنيا صعبة ومفيش امل تقريبا انا معرفش حضرتك تقصد المرتبات عاملة ازاي بس مثلا لو انا دخلت الاكادمية المرتب هيبدأ من 3 الاف و يوصل ل 5 بعد 10 سنين زيادة مش قد كده خالص , بس انا متثبت عكس لما ابقي في القطاع الخاص و يقولي امشي مش عايزك