قشقاي ولا سبورتاج - أسئلة محددة وعاوز إجابات من فضلكم

**Gregister** · 06-11-2012 06:30 PM

السلام عليكم،

أنا قريت كتير على المنتدى وخارجه مقارنات بين السيارتين، بس أنا مؤمن إن كل واحد بيحكم في الآخر بمعاييره وباللي هو عاوزة من العربية. علشان كده عاوز أسألكم شوية أسئلة محددة وطالب مساعدتكم بإجابات دقيقة لأن على أساسها هاخد قراري.

1- ما هي متوسطات أسعار قطع الغيار المتكررة الاستبدال لكل من السيارتين، مثل التالي:
* تيل الفرامل
* بوجيهات
* طرمبة بنزين
* فلتر زيت/بنزين
* فانوس أمامي/خلفي

2- هل يوجد مركز صيانة/ مركز خدمة معتمد للسيارتين في القاهرة الجديدة أو مدينة نصر؟ وما مدى انتشار مراكز الخدمة والصيانة لكل من السيارتين في القاهرة؟

3- ما مدى توافر قطع الغيار لكل من السيارتين؟ يعني حد راح التوكيل قبل كده قالوله معندناش دلوقتي؟

4- عرفت أن سبورتاج يفضل لها استخدام بنزين 95 ...هل حد استخدم بنزين 92 معاها وحس بالفرق في الأداء أو تأثير سلبي على المحرك (مع الوقت)؟ هل نفس الشيئ ينطبق على القشقاي ولا مش شرط استخدام 95؟

5- أيهما عفشته أفضل (من واقع حد مجرب الاتنين) وأنعم على الطرق؟ وهل العفشة الرياضية أنشف من العفشة العادية اللي في العربيات السيدان؟

6- أيهما أكثر ثباتا على السرعات العالية (هل لاحظت رجرجة في الدركسيون أو تعويم من أي نوع)؟

7- أيهما عزل الصوت فيه أفضل من التاني؟

8- ما هو معدل استهلاك البنزين لكل من السيارتين؟

8- هل فعلا السبورتاج أكثر اتساعا من القشقاي؟ هل ده ينطبق على الكنبة الخلفية بس ولا الكراسي الأمامية كمان؟

يا ريت أي حد عنده معلومة تانية عن تجربة شخصية أو تجربة واحد يعرفه معرفة شخصية يقول بردو.

وأخيرًا أنا شاكر جدًا لحسن تعاونكم معايا وأنا واثق من قدرتكم على مساعدتي بعد اللي قريته على المنتدى من معلومات وفيرة وناس شكلها فاهمة كويس جدًا.

**Mezox** · 07-11-2012 04:10 AM

أنا معنديش إجابة علي اسئلتك كلها بس حجاوبك علي اللي حقدر عليه

السبورتاج نسبة انضغاط المحرك 11 و حقن مباشر حسب كلام الخبراء لازم 95 للحفاظ علي عمر الموتور

القاشقي عادي 92

السبورتاج اوسع بكتير جدا من القاشقي و الكنبة تاخد 3 افراد مستريحين , لكن ال قاشقاي كنبتها تاخد اثنين مستريحين فقط و لو حضرتك حجمك كبير زييي و بترجع كرسي السائق للاخر محدش حيعرف يقعد وراك في القاشقاي لكن السبورتج عادي

عفشة القاشقي انعم بيفرق ملحوظ , لكن السبورتج اثبت في المنحنيات

العربتين وجع دماغ في الاستلام يا اما تدفع over price يا تستنى بال 6 شهور

رأيي الخاص ال Octavia افضل من كل النواحي ماعدا الارتفاع عن الأرض , لكن هي اوسع , وشنطه اكبر بمراحل , استلام فوري , توفر قطاع غيار , مراكز خدمة اكثر سعر اعادة بيع أفضل

**Gregister** · 12-11-2012 07:14 PM

المشاركة الأصلية كتبت بواسطة mezox

أنا معنديش إجابة علي اسئلتك كلها بس حجاوبك علي اللي حقدر عليه

السبورتاج نسبة انضغاط المحرك 11 و حقن مباشر حسب كلام الخبراء لازم 95 للحفاظ علي عمر الموتور

القاشقي عادي 92

السبورتاج اوسع بكتير جدا من القاشقي و الكنبة تاخد 3 افراد مستريحين , لكن ال قاشقاي كنبتها تاخد اثنين مستريحين فقط و لو حضرتك حجمك كبير زييي و بترجع كرسي السائق للاخر محدش حيعرف يقعد وراك في القاشقاي لكن السبورتج عادي

عفشة القاشقي انعم بيفرق ملحوظ , لكن السبورتج اثبت في المنحنيات

العربتين وجع دماغ في الاستلام يا اما تدفع over price يا تستنى بال 6 شهور

رأيي الخاص ال octavia افضل من كل النواحي ماعدا الارتفاع عن الأرض , لكن هي اوسع , وشنطه اكبر بمراحل , استلام فوري , توفر قطاع غيار , مراكز خدمة اكثر سعر اعادة بيع أفضل

شاكر جدا لسيادتك. على الرد السريع والمعلومات....أنا رحت شفت الاتنين وفعلا كلامك مظبوط بخصوص الكنبة. المشكلة في موضوع بنزين ٩٥ ده. محدش قادر يأكد المعلومة بشكل قاطع. والتوكيل بيقولوا ٩٢ يمشي عادي مع اللسبورتاج، بس رأيي إن شهادتهم مجروحة لأنهم أكيد عاوزين يبيعوا العربية. أنا من اللي قريته على مواقع بره حسين فعلا إن البنزين هيأثر على عمر الموتور وأداءه من ناحية واستهلاك البنزين مع الوقت من ناحية تانيه.

كمان من عيوب السبورتاج الخامات الداخلية....حاسسها ضعيفة وغير متينة يعني تقلق إنها ماتكملش معاك أكتر من ٣ سنين.

واللي فهمته إن قطع غيار السبورتاج أغلى.....مش عارف ده صح ولا لأ؟ السبورتاج مغرية جدا بسبب حجمها واتساعها والأوبشنز بس الواحد عاوز عربية تعيش وتفضل بحالتها مش أقل من ٦ أو ٧ سنين.

**Mezox** · 13-11-2012 03:48 AM

موضوع الخامات الداخلية مركزتش فيه قوي , لكن الإثنين كانوا مرضين بالنسبالي , الفكرة إن مفيش لا قاشقاي ولا سبورتج تسليم فوري غير ب over price مبالغ فيه جدا , أو فترة حجز تتعدي ال 6 الشهور

**محمد بدر** · 13-11-2012 08:25 AM

صديقى العزيز انا مش هتكلم ولا أمدح فى السبورتاج علشان ممكن شهادتى تكون مجروحة ولاكن عن تجربتى الشخصية فى البداية استخدمت بنزين 95 رغم تأكيد الوكيل لى ان 92 ليس له تأثير ملحوظ وأكد لى هذا الكلام أحد مهندسى السبع
والأن ولآكثر من 8000 كم بستخدم بنزين 92 وبسم الله ما شاء الله واعتقد ده حال كل السيارات السبورتاج فى مصر
وبعدين استهلاك البنزين وخاصتا على الطوالى وسرعة متوسطها 120 كم وبالتكييف والله ممكن تقل عن 9 لتر فى 100 كم يعنى استهلاك يعتبر ممتاز خاصتا على حجم السيارة - وياريت تسأل وتقارن بين قوة المواتير وبشهاده الآخرين وخاصتا اصدقائى من قسم نيسان شهدوا له وانا اعتز طبعا بشهادتهم جدا ان موتور سبورتاج بسم الله ما شاء الله ونقضوه ان ممكن يكون صوته عالى شويه وانا عن نفسى مش حاسس بالموضوع ده
وايضا الخامات الداخلية والطابلوه عجبانى جدا كفاية احساسك بالفخامة مع تطعيم الأبواب الداخلية بالجلد وهذا ما نفتقده الآن فى موديلات كثيرة
ومش عايز طبعا اتكلم عن الرحابة والإتساع الداخلى الذى لايشعرك بعناء السفر مهما طالت المسافة
والله مش عايز اتكلم اكثر من كده انا حاولت اصيغ بعض الأشياء التى تهمك وتحت امرك فى اى استفسار .