العربية اتخبطت يا رجاله

**ahhazem** · 07-11-2012 06:22 PM

الحمد لله العربيه اتخبطت النهارده خبطه بشعه
بين البابين اليمين فتقريباً شبه دمرتهم واثرت كمان على القايم اللي بينهم من تحت على خفيف كده
ميكروباص سوزوكي دخل فيهم بوشه والغريبه انه محصلوش حاجه
المهم الحمد لله وقدر الله وماشاء فعل
السؤال الأهم دلوقتي
اروح اصلح الموضوع ده في التوكيل على حساب التأمين والا اتصرف واروح اجيب بابين استيراد واخلص نفسي من بهدلة ووقت ومشاوير التأمين والتوكيل
مع العلم ان التأمين بيخليني ادفع الاول وبعدين يعبرني بفلوسي بعد شهر او اكتر
كمان لو حد يعرف اسعار البابين دول استيراد يبقى كتر خيره
اه نسيت اقول ان العربيه لانسر بومه ٢٠١٢
وحسبي الله ونعم الوكيل

**moaaz** · 07-11-2012 06:41 PM

قدر الله و ماشاء فعل ...الحمد لله انك بخير..بخصوص التصليح انتظر راى الخبراء ..و ان كنت ارى ان التوكيل هيبقى تكلفة اوى عليييك ..حاول تشوف حد بررة ..فى ورشة نايل موتورز بيشكروا ف شغلها اوى ...و ربنا يوفقك و يعوضك خير انشاء الله

**AHMED_DINAMO** · 07-11-2012 06:47 PM

قدر الله ما شاء فعل
قول الحمدلله ان هى جت على اد كده ومفيش حد جراله حااااجه

**AhMeD MeTwAlY** · 07-11-2012 07:20 PM

الحمد لله وقدر الله وما شاء فعل
موضوع الاصلاح من رأي الشخصي انك تعملها في التوكيل مهما كان الفرق لان كدا كدا انت هتدفع فلوس بس في التوكيل هتستلم فلوسك وتاني شئ هيظبط العربيه ولو مش عجبتك هتقولهم مش مستلمها واظبطو العربيه
كدا كدا هتتبهدل عند السمكري وبعدين في الرش وحوارات كتيره انت في غني عنها وكمان مش هتاخد فلوسك ولو عربية مش مظبوطه وقولتله هيقولك طيب ويقعد يلعب شوية ويقولك اتظبطت
ولك حرية الاختيار

**ahhazem** · 07-11-2012 07:33 PM

شكراً ياشابا على المشاعر الرقيقه ربنا يخليكوا
انا عديت على سوسو بتاع الاستيراد اللي في الهرم من شوية ولاقيت عنده البابين اليمين عاملين ٢٠٠٠ جنيه كاملين بالمرايه والزجاج والماكنه ومفاتيح الزجاج والضفيره بفيشتها
بس لما قولتله اني مش عاوز كل الحاجات دي وعاوز الصاج بس قاللي انه هيفك الزجاج ومفاتيحه والمرايه بس وعاوز يحاسبني عليهم ب ١٥٠٠ جنيه
طبعاً انا شايفه بيشتغلني تمام التمام
بس قولت اسمع منه واشوف رأي الناس تاني يمكن اوصل لحل أفضل ان شاء الله

**sayed911** · 07-11-2012 08:24 PM

نصيحة مني كأخوك الصغير مدام العربية لسة جديدة حرام تضيع زهوتها على السمكرية واللون والرش والسمكرة والدوكو عليك وعلى التوكيل والحمد لله انك مأمن !

**mshmshm3** · 07-11-2012 09:31 PM

التوكيل ياباشا و ان شاء الله تبقي جديدة و زي الاول

**zizophone** · 07-11-2012 10:48 PM

اولا حمد الله على سلامتك ..

ثانيا بصراحة انا ليا رايي مختلف شوية مع الاعضاء .....

انا شايف انك ممكن تروح مركز صيانة محترم و تتتفق معاه انك حتجيب البابين استيراد و هو يعمل سمكرة و رش القايم و تتفق معاه ان حيعملك فاتورة للتأمين بكل حاجة و ياخد نسبتة من قيمة الفاتورة عادي " بعد كده تبلغ التأمين علشان المعاينة " ... و انت تتعب شوية معلش و تلف كدة لفة حلوة تجيب البابين استيراد بلون العربية حالة نظيفة مهما كان سعرهم ""نصيحة : هاتهم كاملين بلاش تجيبهم فاضيين "", حوار السمكرة الي ف الي القايم امره سهل و بعد كده اي حاجة تتبقي عندك يا تخليها عندك تنفعك فيما بعد يا تبعها يا تديهالي :) .... و تحت امرك ف اي خدمة

**salah_86** · 08-11-2012 01:08 AM

باشا اولا الحمد لله وقدر الله وماشاء فعل وبجد قلبى معاك فعلا الموضوع صعب بس بخصوص الاستيراد حضرتك غافل نقطة مهمة قوى
....................................* حضرتك لو ركزت هتلاقى ان الالوان من اول 2012 بالذات بدأت تخف درجة يعنى ركز كدا مع عربيتى مثلا 2009 فيرانى لو جيت تشوف 2012 او 2013 فيرانى هتلاقى اللون اخف بكتير ( فاتح يعنى )
فحضرتك بدل ما يبقى فى اختلاف فى الالوان وكمان هتبقى مغير بابين انا رأيى توكل على الله وشوف حد سمكرى نضيف صدقنى فى ناس بترد خبطات جامدة على البارد يعنى انا مع اختى جيتز كان سواق تاكسى غبى كسر الاشارة عليها ودمرلها الرفرف ولفيت بية وكنت هغيرة لولا ان فى سمكرى نضيف قالى اعملة ورجعه زى الاول من غير رش ولا حاجة وخد 250 جنية فحضرتك بس هتتعب شوية علشان تشوف حد يكون ثقة ونضيف لان العربيات دى ربنا يعلم احنا تعبانين فى فلوسها قد ايه وربنا الحافظ

الموضوع: العربية اتخبطت يا رجاله

LinkBack

أدوات الموضوع

عرض

العربية اتخبطت يا رجاله - انشر الموضوع فى :

-

-

-

-

-

المواضيع المتشابهه

الحقونى يا رجاله التويوتا...العربيه الجديده اتخبطت

العربية اتخبطت

العربية اتخبطت

العربية اتخبطت

العربية اتخبطت

الكلمات الدلالية لهذا الموضوع

المفضلات

المفضلات

ضوابط المشاركة