الموضوع: تقرير عن تغيير عفشة الافيو ..

السلام عليكم و رحمة الله و بركاته ..

من أسبوع و أنا ماشى على طريقى للشغل (الغير ممهد و المكسر كالعادة) لقيت فجأة صوت دبدبة جامدة اوى من قدام من ناحية الشمال ... طبعا انا حسيت ان المساعد خلاص انتهى ... و فعلا عديت على العفشجى حط ايده على المساعد من تحت و طلعها لقيتها ملاينة زيت ...قالى هات جوز مساعدين و البطاحات و بعد ما نفك العفشة نشوف لو فى حاجة تانية عايزة تتغير ...
بصراحة أنا فرحت ...لانى أخيرا هاتخلص من العفشة اللى حاططهلنا منصور فى العربية ...

المهم ...راجعت كل التقارير بتاعة تغيير العفشة للافيو لقيت التقرير بتاع ا. أشرف العدوى وكان من سنة تقريبا و بصراحة استفدت كتير منه...

بدأت بالبحث عن المساعدين .. سألت لقيت ان الافيو نازلها المساعدين الكورى و المونرو و الKYB ...و اللى عرفته ان ال KYB بينزل منه تايوانى للافيو و مافيش ليها يابانى لكنه بنفس الكفاءة لانها شركة واحدة لكن لها مصانع فى تايوان و اليابان و امريكا ..

نزلت التوفيقية .. لقيت المساعدين الكورى ب 450 جنيه (طبعا كنت استحالة اجبهم بعد اللى شوفته من المساعدين اللى كانوا فى العربية) .... عديت على لهيطة مالقتش عنده المونرو قالى هيجى بعد كام يوم .....سألت عند واحد لقيت عنده نوع المانى (اسمه تقريبا مايل) ب 600 جنيه بس خفت اجيبه لان ماحدش عارفه أوى... سألت عند واحد تانى لقيت عنده KYB تايلاندى غاز و زيت بس قالى سعرهم 750 جنيه !!! و حسيت كده ان الراجل بيشتغلنى .. فسبته و مشيت من التوفيقية خالص و رحت فيصل عند واحد مشهور فى اول الشارع و فعلا لقيت عنده ال KYB تايلاندى غاز و زيت ب 620 جنيه .. و جبت البطاحات الاصلية GM ب 170 جنيه ( كان فى تايلاندى ب 70 جنيه) ...

بعد فك العفشة ..العفشجى قالى ان المقصات و الجلب سليمة و ان هنحتاج بس تغيير عمودين الميزان و بارات الدريكسيون ...
2 عمود ميزان CTR كورى ب 120 جنيه
2 بارة دريكسيون CTR كورى ب 175 جنيه
جبتهم من محل فى امبابة قريب من العفشجى ...بصراحة حسيت ان الاسعار مبالغ فيها لكنى كنت مضطر اجيبهم و خلاص .. لكن المهم انهم كورى لان فى CTR صينى و سعرهم بيبقى النصف...

و تم بحمد الله تغيير العفشة الامامية و تربيط و تشحيم الخلفية ( الحمد لله سليمة) ..و تم ضبط الزوايا

و تقييمى بعد مرور عدة أيام كالاتى:
* على الطرق المكسرة و المدقات: أخيرا أختفت أصوات الدبدبة تماما اللى فضلت اسمعها 3 سنين من ساعة ما اشتريت العربية و أصبحت العربية اكثر نعومة و راحة ...
* على الطرق السريعة : مشيت على الدائرى لمسافة 40 كيلومتر بسرعة تصل الى 120 ..الاحساس بالفواصل قل جدا ...السيارة اصبحت اكثر ثباتا خاصة فى الملفات ... و أصبح عندى لاول مرة الثقة انى اخذ ملف بسرعة من غير ما اهدى .
فاضل بس أغير الكاوتش الكومهو الصينى اللى نازل مع العربية لكن هأجله شوية علشان المصاريف .





موقع KYB التايلاندى للحصول على معلومات عن المساعدين :

http://www.kyba.co.th/product.php?ref=do:read/id:7



صورة علبة المساعد من الخارج :











صورة المساعد الKYB :





صورة البطاحات ال GM الاصلية :





اتمنى انى اكون قد افتدكم ..