الموضوع: 504 كربيراتير

السلام عليكم . شكل العربية في الصورة هلوة. المرايات فيه نوع بيركب علي الفيات 132 شبه اللي في الصورة وحلوة جدا هتلاقيها عند بتوع الاكسسوار بتاع الفيات واللون الاسود فيها جامد. الجنوط اللي في الصورة انا كنت مركبهم في العربية القديمة وبدور عليهم برضو يعملو بتا 1400 لحد 1800 انا شفتهم عند واحد بتاع كاوتش في شارع جسر السويس في الالف مسكن. بس بصراحة الظروف المادية متسمحش دلوقت اركبهم.
نيجي لموضوع السخونية ونقص المية في الرادياتير. اولا دور علي سبب السخونية ممكن يكون وش سلندر.او تكيهات عايزة تتظبط. او طرمبة مية مش شغالة كويس او غطا الرادياتير متهالك. احسن رادياتير للبيجو النحاس السعودي لانه كبير ومش هتحتاج تعديل الالمونيوم حلو بس مش للبيجو. وربنا يوفقك وانا تحت امرك في اي سؤال . بس انا مش بفهم كتير في الميكانيكا والاسماء والمصطلحات الضخمة زي اعضاء كتير محترمين هنا .انا خبرتي بس من خلال التعامل مع العربية.انا عربيتي البيجو الاولي 1976 قعدت معايا 9 سنين متواصلة سفريات شرم الشيخ-اسيوط شهريا ولفيت بيها كل جنوب سينا. بجد العربيات دي اصيلة بس ظبطها صح يا برنس وهتعشقها

انا اسف نسيت سؤال حضرتك عن الكاربرتير : من رأي انك تروح لحد بيبيع قطع غيار بيجو مستوردة واعتقد في الحرفيين زي ما بسمع وهات واحد استيراد مستعمل هيحتاج شوية نضافة بس. وهييجي يركب من غير قلق والاهم انك تصلح اللي فيها وتخليه في عربيتك للطوارئ. انا عندي موبينة ومارش ودينامو احتياطي.كا نو باظو واشتريت غيرهم وصلحتهم. وكمان سير دينامو احتياطي وحطه في غطا الكبوت.لو مش هتحتاجو هتلاقي حد غيرك عطلان في الطريق ومحتاجله. في شهر 5 اللي فات كنت راجع بالعربية من الغردقة ومعايا اسرتي علي طريق اسيوط- سفاجا (صحرا صحرا صحرا) ولقيت بيجو واقف عطلان علشان السير اتقطع فالحمد لله اديتو الاحتياطي اللي معايا ودور ومشي زي الفل. فلو هتسافر بعربيتك علي طرق سريعة يبقي اعمل حساب للملحوظات دي.لانها مهمة

شكرا جدا لحضرتك يااستاذ abumiriam