ملاحظات بعد 5000 على الماروتى و سخونة مش عالية بس فوق العادة

**bambino** · 19-11-2012 07:02 PM

السلام عليكم

دى ملاحظاتى على الماروتى بعد 5000

- العربية زيرو محتاجة ترصيص. قبل الترصيص بتبقى ثابتة أكتر على السرعات العالية و بعديه أخف.
- مش عارف ليه حسيت إن صوت الموتور أعلى سنة بعد تغيير زيت الألف.
- ضغط الكاوتش 27 و بيتملى 28 عشان مطبات مصر و بيقل يوميا بمعدل درجتين.

بالنسبة للسخونة: الموضوع ده لاحظته بس قريب. لقيت المؤشر بيوصل للنص - يعنى بيعمل عامود واقف 90 درجة و بعدين يرجع تانى ينزل. المروحة شغالة كويس الحمد لله و إلا مكنش ينزل بس هوه مكنش عمره بيعلى للنص تماما كده قبلها...كان دايما بيبقى فيه فرق بينه و بين النص و لو حتى مللى واحد.

فيه حاجة أنا خايف منها...كنت بوصل واحد صاحبى و مستعجل عشان يلحق أتوبيس..ماشى على 80 -90 فى شارع فاضى و واسع و هديت مرة واحدة لأنى عديت الشارع الجانبى اللى هوه عايزه
رجعت بضهرى بعد ما وقفت علطول و ساعتها شميت ريحة شياط خفيفة.

هل ده معناه إنى استعجلت فى الغيار و ده عمل خبطة فى التروس و عمل ريحة الشياط؟ و لا أنا بس متهيئلى؟

طيب سؤال تانى: هل لو حصل خبطة فى التروس و عملت مثلا رايش يكون ده سبب فى زيادة السخونية اللى أنا ملاحظها؟

برضه أخدت خبطة خفيفة فى بلاعة فى شارع التسعين و الحمد لله معملتش حاجة (أخدتها فى وسط العربية من تحت)- بصيت عليها بنفسى و أنا بغير زيت...هل ممكن يكون ليها تأثير؟ هل هزت حاجة ... أثرت على حساس الحرارة؟

أنا برضه لسه مغير زيت النهاردة و السخونية زى ما هيه أعلى من المعدل..أنا كل يوم بظبط ضغط الكاوتش و كنت ساعتها كل يوم ببص على المؤشر..كان دايما فيه فرق بين المؤشر و علامة النص...إيه ممكن يكون اتغير؟
نسيت أقول ...المية مستواها كويس فى الاحتياطى فوق الحد الأدنى بمسافة
جزاكم الله كل خير

**bambino** · 19-11-2012 07:06 PM

نسيت أقول ...المية مستواها كويس فى الاحتياطى فوق الحد الأدنى بمسافة

**alking_2006** · 19-11-2012 07:17 PM

السلام عليكم

- موضوع ان صوت الموتور على سنة فدا ممكن علشان هما حطوا زيت درجة لزوجته قليلة (تخليقى) زى موبيل
- موضوع ان الكاوتش بيقل يوميا بمعدل درجتين فدا مش طبيعى و حاول تكشف على الكاوتش عند اى محل "موثوق فيه"
- بالنسبة للسخونة المهم ان المؤشر ميعديش النص و انك تكشف بصورة دورية على الميه و ان الميه متكونش بتنقص
- ريحة الشياط دى نتيجة انك دوست فرامل جامد اوى فدى ريحة تيل الفرامل و دا مفيش منه مشكلة بس حاول على قد ما تقدر تقلل الفرامل المفاجئة الا اذا اضطرتك الظروف و ذلك للحفاظ على تيل الفرامل اما خبطة التروس فدى مش بتشمها دى بتسمعها صوت تروس بتحك فى بعض
- الخبطة فى نص العربية دا لو العربية اتحكت من تحت فاول حاجة تأثر فيها هيا كارتيرة الزيت و طبة الزيت فأنتا بص على مؤشر الزيت بصفه دورية و أتاكد انو مش بينقص

- سؤال بقى انتا بتحط زيت ايه؟ و اللى بيقعد كام كيلو

**bambino** · 19-11-2012 09:03 PM

بالنسبة للكاوتش مش بسيبه اكتر من يومين و فيهم بينقص ٣ درجات و الزيت كنت حاطط موبيل تخليقى ١٠٠٠٠ و ده عند ١٧٠٠ كيلو و غيرته النهارده بزيت وطنية ٥٠٠٠ عند ٥٨٠٠ كيلو

**وائل شويخ** · 19-11-2012 09:55 PM

باشا

عمر التروس ما تعمل ريحه شياط
الريحه دى من الفرامل او الكاوتش

والأخ alking_2006 جابلك من الأخر

ونصيحه منى ليك
متركزش أوى لان عربيات السوزكى بصفه عامه بحالات

**Amr Axel** · 19-11-2012 10:49 PM

الزتونة بتاعت القصة ديه كلها في الجملة ديه

المشاركة الأصلية كتبت بواسطة وائل شويخ

متركزش أوى لان عربيات السوزكى بصفه عامه بحالات

ههههههههه متستغربش لكن ديه الحقيقة ابقي تابع العربية هتلاقي اليوم اللي انت نازل مقريف فيه و زهقان العربية مش عايزة تمشي و شوف يوم رايق و فايق هتلاقي العربية ديه طيارة
شوف ساعة لما تبقي محتاج تحط بنزين و مش لاقي بزينة هتلاقي المؤشر اترفع و العربية كأن العربية فيها 10 لتر
و غيره من المواقف و اللي كلنا اجمعنا عليها هههههه

بخصوص العربيةelking_2006 جابلك من الاخر
ريحة الشياط غالبا من دوسة الفرامل و الكاوتش اما الاحتمال الاخر و مستبعد طبعا لأن العربية لسه 5000 هي اسطوانة الدبرياج

بخصوص السخونية ممكن يكون السبب في الزيت و نوعيته
الزيت اللي حطيته لزوجته ايه ؟؟
ع سبيل المثال لما كنت بحط موبيل في الأول كان المروحة كل شوية تشتغل سحب العربية ضايع و بتاكل بنزين و الزيت مية طبعا و صوت موتور عالي
انا بصراحة مجربتش وطنية عشان احكم عليه لكن جرب التغييرة الجاية فيسكو 3000 ( اسمه كده ) او شيل الاصفر و شوف الأفضل و اللي العربية ارتاحت معاه