الموضوع: أول رشة للعربية ... معاناتي مع الحفاظ علي عربيتي

السلام عليكم و رحمة الله و بركاته
اولاً احب اباركلك على العربية بعد الدهان و ربنا يباركلك فيها
ثانياً انا كنت هعمل موضوع عن الدهان لان انا عربيتي وديتها تترش كلها مع الدهان بتعها الاصلي . بس حضرتك سبقتني
اللي خلاني اعمل كدا و ادهنها كلها اني خبط العربية خبطه رخمه اوووي في الجنب الشمال ورا .. و كان فيه خبطه في الرفرف اليمين قدام .. رحت اشتريت الرفرف من عربيه مقطعه مافيهوش اي مشكله نضيف بالكامل خالي من الصدمات تماما .
رحت اشتريت دهان ماركة (AUTO-COLOR) معرفش ده موجود في مصر ولا لا المهم الدهان ده صناعة انجليزية و معاه جميع الخامات الخاصة للدهان ( التنر - الكير كود - ماده تجفيف و لمعة .
طبعاً تم اختيار الماركة دي بالذات لانهم متخصصين في اصباغ السيارت باحترافية كأن اللون المصنع
وانا بشتري اللون من ماركت اللالوان الراجل سألني على رقم اللون ،، و زي ماهو متعارف على مجموعة فولكس انها بتلصق LABLE فيه كل المعلومات عن العربية من (كود الماكينة - كود الجيربوكس - كود اللون الخارجي و الداخلي ) الملصق ده مكانه عادة بيكون تحت غطاء العجل في شنطه العربية ترفع الغطا هتلاقي تكت ملزوق بالشكل في الصورة
و دي صورة توضيحية لل LABLE


لو اخدنا بالنا في الصورة هنلاقي اربع حروف مظلله باللون الازرق و ده كود اللون الخارجي و اللي جمبه الرقم للون الداخلي .
هناخد الرقم ده و نروح محل الالوان و يبدتي يفحص اللون اللي على العربية بجهاز شبه الكاميرا بالضبط بيجي على اللون و يروح لزق الكامير المخصوصه دي في العربية و يفحص اللون بالليز بشرط يكون اللون الاصلي علشان يعمل حاجه اسمها color analysis او تحليل للون بعد مرور الزمن عليه .. لان لو جابلك نفس الرقم اللي موجود في اللستيكر عندك بردو هيطلع فرق لون لان اكيد الشمس اثرت على لون العربية فهو هيعالجلك فرق اللون ده على الكبيوتر علشان يديلك نفس الدرجه لو انت حابب تدهن اجزاء في العربية
لكن لو هتدهن العربية بالكامل مافيش داعي لكل الفحص و تحليل اللونو الكلام ده .
نجي بقا لاهم جزء
فيه نوعين من الاصباغ او الالوان
نوع يسمى ( plastic coat) و ده بيديلك لمعه مؤقته لمده لا تزيد عن 6 اشهر و بعد كدا بتضطر تعمله بوليش خشن علشان يرجع تاني يدي لمعة و يزهزه (رخيص الثمن نسبيا)
نوع تاني يسمى (base coat) وده بطفي مره واحده فقط بعد مده لا تزيد عن 6 شهور .. حضرتك تروح تعمل بولش يرجع تاني تمام و خلاص ما يطفيش
طيب الموضوع خلص كدا .. هقولك لا
النوع التاني ده بيتضاف عليه اضافات معينة و الاول بردو بيتضاف عليه نفس الاضافات و لكن النوعية التانية (base coat) اضفاته مخصوصه اووي و بتكون عباره عن (تينر نقي جدا - مادة اسمها clear coat - ماده مجففة )
طيب التنر عرفناه خلاص و الماده المجففة باين من اسمها طب ايه بقا clear coat ؟؟؟
دي الطبقة اللي بتترش بعد ما الراجل بتاع الدهان بيدهن العربية و تمام بيروح راشش بقا clear coat علشان اللون يدي لمعة و في نفس الوقت دي الطبقة اللي بتحمي اللون من عوامل الجو

اهم حاجه بقا و ده اللي يهم صاحب الموضوع .. ان بتاع الدهان لما دهن اللون بتحس ان دهان محبب و تحس انه واخد تراب شوية و كمان تحسه فيه ريجه اكنه مش صافي او ميته واحده ( الكلام ده كله طبيعي) هو كدا كدا هيسنفر الاجزاء اللي تم رشها بورق سنفره بعد ما اللون ينشف خالص برقم معين سواء خشنة او ناعمة و بعد كدا هيجيب الصاروخ و راكب عليه قرص مصنوع من الصوف و يبتدي يحط بولش و يشتغل بالصاروخ و في الاخر العربية تطلع من الفرن زي حتته البقلاوة

فيه ناس بتبقا عربيتها مخبطه و مكحته من كل حته و شكل عربيته يقرف مع العلم انها ممكن تكون 2008 او 2009 و تلاقيه يقولك دي فابريكه دي بويه المصنع .. انا مش هرش خليها
(فعلاً رش المصنع لا يعوض) بس هعمل ايه همشي بالعربية شكلها زباله في الشارع ؟؟

و تلاقي ناس تانية تقولك انا مش هرشها علشان لما هاجي ابعها ما اخصرش .. بالذمة ده كلام ؟؟؟ هو انا جايبها علشان هبعها في يوم من الايام ولا علشان استمتع بيها ؟؟؟
و بعدين مهو انا ممكن وانا ماشي لا قدر الله و اعمل حادثه (قضاء الله و قدره) و العربية كلها تتدشمل مني .... بقت فابريكه كدا ؟؟؟؟
بنفكر الفكر اللي اكننا عارفين ان عربيتنا مش هيحصلها حاجه في يوم من الايام علشان انا بحافظ عليها و تلاقي نفسك واقف بتضربلك كوبايتين عصير قصب ( هههه اصل بحب القصب) و تلاقي واحد بيركن جمبك عاوز يضرب هو التاني و راح داخل في الباب مطبهولك
نسينا اخطاء الاخرين خااالص

من وجهة نظري الشخصي العربية لو مدهونه بالكامل من الخارج دهان نضيف ( ماركة كويسة + بتاع دوكو معلم ) لا يعيب العربية في حاجه

انا عن نفسي وانا ببيع عربيتي القديمة كانت يعني شكها زفت مع ان دهانها كان الفابريكة و اقسم بالله اني دهنتها علشان تتباع بيعه حلوه مع انه الناس تقولك لو ادهنت خلاص سعرها نزل ، اول واحد قلتله العربية رشه بره طالب كام طالب كذا قالي دي راشة قلتله مش هبيع و سيبته و مشيت (طب استنى طب هقولك ... وانا ابدا) تاني واحد نفس الكلام اقسم بالله فضل يتصل بيا لحد ما زهقت منه بعتهاله و بالرقم اللي انا عايزه
انا عندي اولع في عربياتي ولا حد يجي يخسف بيها الارض علشان يتمصلح من وراحها سواء هيركبها او هيستنفع منها في بيعة (في الاخر هي حتته حديدة لا راحت و لا جت انا اللي جبتها مش هي اللي جبتني)

انا عارف اني زهقتكم من رغيي بس انا كنت والله هعمله موضوع بس صديقي سبقني
انا هستلم العربية من الفرن بكره ان شاء الله و على فكرة انا دهنتها base coat و ده اللي شركة فولكس بتطبقه عندها في دهناتها .
و ان شاء الله هقولكم النتيجة

سلام الله عليكم و رحمته و بركاته