الموضوع: مساعدة في شراء لوجان اتوماتيك

لو حلفتلك إن دي هي نفس الإسطوانة إللي أي حد فينا سمعها من إللي حواليه ساعت مقرر يشتريها، تصدقني؟ أنا شحصيا إتقاللي الكلام ده، بس نفظتلة كله. ليه؟ عشان مفيش حد من إللي قاللي الكلام ده، ركب العربية قبل كده + إن خلاصة تجربتي في شراء العربية، إن مينفعش تعتمد على رأي حد غيرك في الشراء في الحجات إللي فيها إختلافات فردية، يعني الإحساس بنعومة الباور وقوة السحب والحجات دي، ليه؟ ممكن تلاقس حد يقولك العربية باورها تقيل! ماشي بس مش تقيل بالنسبة لكل الناس، ممكن لوكنت سايق لانسر قبل كده تحسه أتقل لاكن مش معنى كده إن العربية مفهاش باور، نفس الموضوع بالنسبة للسحب كمثال، لو واحد بيحب الشد الموضوع هيفرق معاه لاكن ميفرقش لواحد سواقتة عاقلة وهكذا ...

عشان أطمنك هرد على كل نقطة حضرتك ذكرتها:

١- قطع غيارها غالية جدا - هي غالية في التوكيل بس زيها زي أسعار معظم العربيات في فئة ٨٠ - ١٠٠ ألف، وبعدين مش كلها غالية، في حجات أسعارها معقولة جدا، ده بالإضافة إنها أصبح متوفرة عن تجار خارج التوكيل بأسعار تصل للنصف. بشكل عام حضرتك متقارنش أسعار قطع غيار عربية ٢٠١٣ مع عربية ٩٣ مع إني أظن التمبرا قطع غيارها مش كلها مهاوده والله أعلم، بس أنا كنت بجيب المراية للمازدا ب ٣٥ جنيه!!! دلوقت المراية ب حوالي ٨٠٠ في التوكيل و ٢٥٠ بره التوكيل. عموما ربنا يحفظهالك ومحمجلهاش قطع غيار غير كل فين وفين.

٢- عفشتها وحشة و مش مناسبة للطرق المصرية - أنا مشفتش شكر وبالإجماع قد ما شفت في عفشت اللوجان! ده بيأكدلي إن إللي قاللك الكلام ده مركبش العربية في حياته! طبعا أنا جربت ده بعد مجبتها ومتفق مع كل الآراء فيه، عفشة اللوجان ممتازه مثالية للطرق المصرية، وطبعا الإرتفاع الممتاز المناسب لمطابتنا المحترمة.

٣- المتور بيسخن و مبيستحملش الصيف بتاعنا - أكيد أكيد إللي قال الكلام ده مركبش العربية!!! مؤشر الحرارة ثاااابت صيف شتاء صبح ليل على أربع شرط (ده المعدل المثالي حسب الكتالوج)، هو لو إلمقصود إن كابينة العربية بيوصلها بعض السخونة، فده من السربنتينة الخاصة بالتكيف السخن، حاجة معروفة وإتناقشت كتير، وهي في الصيف مقدور عليها بتشغيل التكيف (كده كده أكيد هتشغلة) وفي الشتاء مصلحة. هي مزعجة قليلا في بعض الأوقات بس مش الحاجة إللي تخليك تصرف نظر عن العربية أبدا.

٤- توكيلها وحش - هو فيه عربية في مصر توكيلها حلو؟!!! هو التوكيل مش وحش بس أكيد ممكن يقل في بعض الأحيان بسبب الزحمة أو طبع المصريين بس للأمانة لو شديت عليهم بيفوقو ويتعدلو. بس لو عندك أي مشكلة في العربية عيب صناعة في الضمان بيغيروها من غير تلكيك، الصراحة محترمين جدا في الحته دي.

٥- العربية بتخسر كتير عند اعادة البيع و مش بتتباع بسرعة - دي قاعدة توارثتها الأجيال بخصوص العربيات الفرنساوي في مصر بإستثاء عربية أو إثنين (البيجو التاكسي مثلا)، اللوجان هي آخر إستثناء من وجهة نظري. العربية في إنتشار مستمر وسمعتها متماسكة وده بيخلي ناس تقبل على شرائها مستعملة فبقى ليها سوق في المستعمل. حضرتك شوف على موقع كونتكت كارز أسعار اللوجان المستعمل وأحكم بنفسك (مع العلم إن موديل ٢٠١٠ مثلا كانت بتتباع جديدة ب ٦٨ أو ٦٩ حاجة كده). طبعا فيه عربيات ثانية نتتفوق في إعادة البيع زي اللانوس مثلا، بس إنت يهمك إيه في المقام الأول؟ إنت عايز عربية حلوه تركبها وبعد كده تتباع بسعر معقول، ولا عايز عربية تتباع بسعر ممتاز بس الركوبة نص نص؟

٦- صاجها ضعيف و خفيفة - بعض النقط ضعيفة شوية زي الرفارف، بس الحال ميفرقش في عربيات ثانية كتير خصوصا لو بتقارن في نفس رينج السعر، بس العربية في المجمل مش خفيفة لدرجة إنها ينضرب بيها المثل في خفة الصاج، تقل صاجها في نفس المتوسط بتاع الفئة دي وبعظ العربيات في الفئة الأعلى كمان.

أنا بس وضحتلك النقط إللي قلقاك بصفتي مالك للعربية من ٧ شهور، سمعت الكلام ده قبلك وسمعت أكتر منه كمان، أنا فاكر قريت حد كاتب إن اللوجان عربية عايزه معاملة رقيقة وإنها مش بتاعة بهدلة ومشاوير، كلام!! لكن في الواقع فيه ناس هنا معاها العربية من ساعت منزلت مصر من أكتر من ثلاث سنوات خدمة شاقة رايح جاي في قاهرة المعز ولسه زي الفل بشهادة أصحابها وهمه يقولولك بنفسهم.

في الآخر القرار ليك طبعا، بس لو الكلام ده خلاك تتراجع، ياتري إيه البديل المناسب في رأيك؟

لو محتاج تستفسر عن حاجة أنا تحت أمرك :)

المشاركة الأصلية كتبت بواسطة nadernabil

يا فندم الكلام اللي اتقال لحضرتك كله -مع إحترامي الكامل لقائليه- فتي و غير صحيح:

1- قطع غيارها أسعارها عادية و موجود منها الأصلي و اللي مش أصلي كمان و ده مساعده الإنتشار الجامد بتاع العربية في ال3 سنوات اللي فاتوا
2- العفشة بتاعتها هي أكتر حاجة بتميزها...ناعمة بشكل غريب و بتاخد و تدي مع المطبات بكل حنية و زود على كده إرتفاعها اللي بيخليها تقهر أعتى المطبات و المقبات و التلال و المرتفعات الموجودة في شوارعنا...أحب أنبهك كمان ان اللوجان مصممة و موجهة لدول العالم الثالث أمثالنا و بالتالي معمول حساب العفشة فيها كويس قوي
3- الموتور مظهرش منه ي شكاوي سواء ال 8 فالف المانيوال أو ال 16فالف الأوتوماتيك
4- توكيلها من أفضل التوكيلات في مصر...من حيث الإهتمام بالعميل و الضمان
5- مثال بسيط....لوجان 2010 فول أوبشن ماشية 20000 كم بتتباع النهاردة ب 61000 مع العلم انها جديدة كانت ب 68000...أعتقد السعر أكتر من رائع...العربية مطلوبة جداً في السوق و سوقها رائج...و تقدر تعرف ده من الأوفر برايس لما تيجي تشتري الزير
6- صاجها ضعيف...ممكن يكون فيه بعض من الصحة....لكن خفيفة مش صحيح...العربية معقولة جداً على الأرض و ماسكة نفسها كويس جداً...تحت ال 130 التحكم فيها و ثباتها زي الفل

و في النهاية العربية دي تعتبر من أفضل السيارات - في نظري- في فئتها السعرية سواء المانيوال أو الأوتوماتيك اللي نزل السوق المصري إلى وقتنا هذا...توكل على الله...و ديماً حط في بالك ان مفيش عربية كاملة من كل حاجة

والله أنا بقالي حوالي ساعة بكتب في المشاركة بتاعتي ومشوفتش مشاركتك غير لما نشرت مشاركتي وده بيأكد رأي الناس (إللي ركبوها وإمتلكوها) في العربية مفهوش إختلاف كبير.

الف شكر ليكم يا جماعة على تفاعلكم و ردوركم. انا كده اطمنت و حاتوكل على الله و حانزل احجزها الاسبوع الجاي ان شاء الله و حابقى ابلغكم بالتطورات