حد ليه تجربة في تحسين إضاءة اللوجان؟

**ahmed_m_ashraf** · 25-11-2012 08:45 PM

أولا إضاءة اللوجان الستوك مفيهاش أي مشكلة، بس أنا عندي مشكلة في النظر بتخليني محتاج شدة إضاءة أعلى من المعتاد شوية لما يكون الطريق كحل.

بالمناسبة أ نا تقريبا قريت كل المواضيع في قسم الإضاءة بخصوص لمبات زي فيليبس رالي وأوسرام بايت بريكر و ونجسرام ١٠٠/١٤٠ والكلام ده كله، بس أنا عايز لو فيه تجارب من ملاك وخبراء اللوجان بالتحديد يريت يفيدنا لأن فيه أنواع كتير في السوق من اللمبات ومحدش جاب سيره عنها.

كمان، ياريت بلاش حد لومني إني همي على نفسي ومش هاممني إني أضايق الناس بالإضاءة... إلخ. أنا مضطر لكده وفي ظروف محدوده مش طول الوقت، في أوقات متباعدة لما أحتاج أركب الطريق الدولي الساحلي أو الزراعي أومحور التعمير، وطبعا إللي مشي فيهم عارف إن فيه ماطق متبقاش شايف جناب الطريق غير بالعافية ده غير إنهم مش متخططين!! وأنا أدعي إني عندي ما يكفي من الإحساس إني مدايقش إللي جاي قدامي بالنور وبحرص على الحكاية دي جدا (للأسف بلاقي العكس من الآخرين في معظم الأحيان).

أنا كل إللي عايزه إن النور الوسط يكشفلي الأرض كويس حتى لو معلهاش تراب (الأرض الترابية بتعكس الضود فبتكون واضحة)، والعالي يرمي لأبعد مسافة ممكنه عشان يكشفلي أي أجسام من يعيد خصوصا لو غير مضيئة (حد معدي الشارع مثلا).

حد جرب نوع لمبات كويس وعمره معقول ومش مبالغ في ثمنه، أنا معنديش مانع أدفع في حاجة تستاهل بس التجار لما بيلاقو فيه طلب على حاجة مش منتشره في السوق بيبالغو في ثمنها جدا (مثلا النايت بريكر كان الجوز ب ١٠٠/١٢٠ ولما إتعرف والطلب زاد عليه وصل ل ١٦٠/١٨٠.

مثال شوفت من فترة حاجة فيليبس إسمها Diamond Vision لونها أبيض، حد جربها؟ أنا أعرف إن الأبيض مش فعال في الشبورة، بس هل في الظروف العادية أفضل من الأصفر؟ أنا أصلا لو في شبورة عمري ما هسوق.

الزينون مش ميال ليه، فيه لعب في كهربة العربية من ناحية، والأنواع إللي في السوق كلها صيني ومش مضمونة، وعشان يكون تمام لازم يركب على عدسات وإلا هعميإللي قدامي وهيديني شدة إضاءة يمكن أقل من اللمبات الهالوجين.

معلش أنا نسيت نفسي وطولت عليكم، بس أعتقد الموضوع ده ممكن يفيد بعض الناس. وطبعا إدعولي مشاكل النظر عندي تتحسن جزاكم الله خير :)

**mo_x5** · 26-11-2012 12:47 PM

متابع ....

**sherifboo** · 26-11-2012 02:34 PM

يا ريت فعلا الوحوش يساعدونا عشان انا كمان طريقي كله صحراوي و دائري بس انا كحل مؤقت عملت رجلاش للانوار و الدنيا كويسة شوية انا بحس ان اضائة الاستوك ضعيفة مقارنة بعربيات تانية مع ان الاستوك محترم نوعه فيلبس 55/60 بس هادي اوي على الطريق

**Ahmed A Rahman** · 26-11-2012 04:34 PM

انا قبل الكتاوت كنت مركب فيليبس او اوسرام:
PHilips Extreme power اي نوع فيليبس ثاني ارمي في الزبالة (لو ينتكلم من غير كتاوت)
Osram night breaker اي نوع اوسرام ثاني ارمي في الزبالة (لو بنتكلم من غير كتاوت)

بعد الكتاوت:
Tungsram 140/100 وعيش حياتك
العالي بتاعها بيعمل فرح ورائع على السفر
بس انا ركبت الكتاوت الجاهزة وبعت جبتها من ادفعلي
H4 9003 Harness Relay Halogen Headlight lamp Booster | eBay

**Ahmed A Rahman** · 26-11-2012 10:43 PM

المشاركة الأصلية كتبت بواسطة ahmed_m_ashraf

الله ينور عليك يا دكتور.
جميل قوي موضوع الكتاوت الجاهز ده، بس ليا كام سؤال:
- كلفك كام إجمالي؟ موقع إدفعلي بيقول حوالي ٢٢٠ جنيه، هل كان معاك أكتر ولا أقل من كده. أنا بسأل عشان مجربتش إدفعلي قبل كده فمش عارف مدي دقة تقديره للتكلفة الإجمالية. ده بالنسبة لإدفعلي.

- بالنسبة للكتاوت الجاهز، هل إنت جبت نفس المنتج بالضبط ولا مثيل ليه على إي باي؟ وهل كان طول أسلاكه مناسب ومحتاجش تطويل؟
- اللمبات إللي ذكرتها (فيليبس، أوسرام، تونجسرام) عمرها كويس ولا بتتحرق بسرعة ووجع دماغ؟
- لما بتعمل صيانه، هل بتشيل الكتاوت وترجع اللمبات الأصليه ولا محدش بيعلق عليها.
بس كده وأكون شاكر ليك جدا يادكتور. معلش بتقل عليك.

انا جبتها في وسط كذا حاجه ووصلت كمان على كذا مرة فكنت بدفع دفعات مش مرة واحدة
التكلفة بالضبط كام مش فاكر بس تقريبا هي نفس اللي مكتوب على ادفعلي

المنتج اللي في الصورة هو بالضبط اللي وصلني ونفس الشركة

مش محتاجه تطويل ولا اي حاجه ركبت في 3 دقايق لانها جاهزة

في الصيانة ولا بيعلقوا عليها في حاجه , هما مطنشين وانا مطنش بس خلي بالك اناطلعت من الضمان فكده كده مش فارقة معايا
وبعدين حتى قبل الضمان كنت مركب انذار فالضفيرة كده كده بره الضمان

تونجسرام لسه مكلمتش سنة
بالنسبة لفيليبس اكستريم او اوسرام نايت بريكر انت قصدك اللي بيركبوا من غير كتاوت
الاثنين بيقعدوا سنة بالمللي يعني ال 3 سنين مغيرهم 3 مرات بالضبط وواحدة تتحرق بعدها بيوم الثانية تتحرق !!
والاثنين مفيش بينهم فرق

التونجسرام طبعا اقوى بس عايزه كتاوت

حاجه اخيرة الكتاوتش الجاهزة اكثر راحة واحسن وجاهزة تتشال ومفيهاش لعب في الضفيرة ومش غالية نسبيا
بس السلوك مش تخينه زي لو عملت السلوك عمولة اخرها تقريبا 1.5-2 مللي
بس برضه انظف واحسن من تقطيع الضفيرة الاصلية بتاعة العربية

**profrivo** · 26-11-2012 10:57 PM

هو ايه الكتاوت الجاهزة دي؟

**ahmed_m_ashraf** · 27-11-2012 12:05 AM

المشاركة الأصلية كتبت بواسطة profrivo

هو ايه الكتاوت الجاهزة دي؟

ده بدل ماتروح لكهربائي يركبلك كتاوت ويقطع ويلحم في أسلاك ضفيرة النور في العربية، دي بتبقى ضفيرة جاهزة بالكتاوت وبالفيش كمان، بمعنى إنها بتركب على الضفيرة الأصلية من غير أي لعب ولا تقطيع ولحام وبعدين تركب فيها اللمبات.

هي ممكن تتعمل بس أنا ماليش طولت بال على الموضوع ده ومعرفش ممكن ألاقي الفيش الثلاثية بتاعت اللمبه ال h4 ولا لأ، فبالنسبالي الحل ده أفضل مع إنه هيكون أغلى، بس مفيش حاجة تغلى على لوجي ;) ههههه

أنا بالفعل عملت أوردر بس شكلة هياخد وقت طويل جدا على ما يوصل (من تايلاند لأمريكا لمصر لإسكندرية، إشي خيال ياناس هههه)، يعني لسه قدامنا لشهر يناير وعليكو خير.

**tamer61** · 27-11-2012 11:55 AM

المشاركة الأصلية كتبت بواسطة ahmed a rahman

انا قبل الكتاوت كنت مركب فيليبس او اوسرام:
philips extreme power اي نوع فيليبس ثاني ارمي في الزبالة (لو ينتكلم من غير كتاوت)
osram night breaker اي نوع اوسرام ثاني ارمي في الزبالة (لو بنتكلم من غير كتاوت)

بعد الكتاوت:
tungsram 140/100 وعيش حياتك
العالي بتاعها بيعمل فرح ورائع على السفر
بس انا ركبت الكتاوت الجاهزة وبعت جبتها من ادفعلي
h4 9003 harness relay halogen headlight lamp booster | ebay

الله ينور عليك يا دكتور .... بس ليا سؤال بخصوص أسعار اللمبات إللي حضرتك رشحتها بدون كتاوت بكام ومتوفره في كل الأماكن ولا ليها أماكن معينه بتتجاب منها

وتقبل خالص تحياتي