الموضوع: حد إتعامل مع الشركه المصريه للتأمين التكافلي - حياه

السلام عليكم ورحمة الله وبركاته،،،

حد إتعامل مع الشركه المصريه للتأمين التكافلي - حياه؟
من كام يوم حد من الشركه دية إتصل بي وجه قعد معايا وإتكلم عن الأنظمه بتاعت الشركه.

الخلاصه إنك بتدفع مبلغ معين كل شهر إنت بتحدده وفي حالة الوفاه أو المرض بمرض عضال زي السرطان مثلاً بيدوك مبلغ.

وفي نفس الوقت فلوسك بتستثمر بس ما ينفعش تسحبها إلا بعد مضي عدد معين من السنين. وبعد عدد سنين أكتر بتلاقي فلوسك بتزيد كمان.

يعني مثلاً لو بتدفع 500 جنيه في الشهر عند السنه السابعه هاتكون دفعت: 500*12*7 = 42000 وممكن لو سحبت فلوسك دية هاتسحبها كلها اللي هي 42000 عشان السنه السابعه هي السنه بتاعت التعادل يعني السنه اللي تقدر تسحب فيها نفس الفلوس اللي دفعتها.

لو سحبت فلوسك في السنه السادسه مثلاً هاتكون إنت دفعت: 500*12*6 = 36000 لكن لو سحبت فلوسك ولغيت الوثيقه هايدولك أقل من 36000.

لكن لو صبرت شويه ولغيت الوثيقه في السنه العاشره مثلاً مش هاتاخد 60000 بس، هاتاخد فلوسك زائد أرباحها. مع العلم طبعاً إن طول فترة الوثيقه دية إنت مغطى لا قدر الله لو حصلك حاجه.

السؤال: حد إتعامل مع الشركة دية قبل كده بالنظام ده؟ إيه تجاربكم؟

وإيه نظامها من ناحية الدين؟ هل هي حلال؟

شكراً

أنا العرض اللي شرحهولي كان إني أدفع 600 في الشهر وفي حالة الوفاه في أي وقت الورثه ياخدو 200 ألف وفي حالة المرض العضال يصرفولي 100 ألف.

ولو ما حصليش حاجه لو عايز أسترد فلوسي اللي دفعتها كاملة أقدر أعمل كده بدءاً من السنه السابعه. لو إسترديت قبل كده هاسترد أقل من اللي دفعته ولو استرديت بعد كده هاخد أكتر من اللي دفعته.