الموضوع: مؤشر الحرارة مش منتظم ؟؟؟

حصل معايا كده و في صيانه ال25000 كلمت الفني اللي بيقولوا عليه مهندس يا باشمهندس مؤشر الحراره عندي بعد ما يوصل ل 4 شرط ينزل ل2 فتره و يرجع تاني 4 قال لي عادي ( الكلمه المشهوره في بقهم ) قلت له لا مش عادي المهم قال حنشوفه . بعد الصيانه لقيت الورقه اللي بيدوهاني بعد الصيانه تفيد ان صلح فيها عدد 2 شكوي من العميل ( مؤشر الحراره و كانت فيها رجه من تحت ) النهارده و انا رايح الشغل لقيت المؤشر زي الاول يطلع و ينزل بصراحه اضيقت و قلت لما اروح اكلم الخط الساخن 16202 و اللي سبق و اني كلمتهم للحجز . المهم النهارده و انا في الشغل لقيت الموبايل بيرن
صباح الخير يا فندم
انا : صباح النور
معاك المصريه العالميه للسيارات توكيل رينو
انا : اهلا و سهلا
سيادتك كنت من يومين بتعمل صيانه ال 25000 لك عليها اي ملاحظات
انا : قلت لها بصراحه انا مش مبسوط منكم
خير يا افندم
انا : كل اللي قلت لهم عليه مفيش فيها حاجه اتعملت
طيب ممكن يا افندم تتصل ب 16202 و تحجز تاني علي الميعاد اللي يناسبك و هما ان شاء الله يقوموا باللي سيادتك تقول لهم عاليه
انا : طيب يا ستي ليه مش من الاول . عموما شكرا لكم

و انهيت المكالمه

طبعا انا طولت عليكم بس حبيت انقل لكم اللي حصل معايا بدقه

و علي أني كنت متضايق الصبح الا اني مبسوط ان هناك متابعه من الشركه علي ورش الصيانه .
مع العلم ان دي مش اول مره تتصل بيه الشركه بعد الصيانه .
شكرا رينو

تكمله للموضوع . اتصلت ب 16202 و حجزت في سموحه امبارح . روحت الساعه 9 قابلتي مدموازيل هناك استمعت للمشكله و نادت علي الفني قالت الاستاذ شاكي في الشركه علي مؤشر الحراره و فيه صوت من تحت العربيه . استلموها مني ضبطوها و بعد الظهر استلمتها . بصراحه و كانها علي الزيرو . المؤشر علي 4 شرط لا يطلع و لا ينزل و الصوت اللي تحت راح و حاسس اني لسه شاريها جديد . اليوم اتصلوا بيه الصبح و سالوني علي اخبار العربيه قلت لهم زي الفل بس ليه مكنش الكلام ده من الاول . ضحكت و قالت لي ان شاء الله مش حيحصل كده تاني . شكرا رينو .

شكرا frhateg :)