الموضوع: للبيع شاهين 2004 فابريكه بالكامل

المشاركة الأصلية كتبت بواسطة engwael

اعتقد ان السعر مبالغ فيه

بعد الرجوع لصاحب السياره اقدر اقول ان السعر قابل للتفاوض

تحياتى

المشاركة الأصلية كتبت بواسطة shaf3y

السلام عليكم
صديقى راح شاف العربيه بعد مشوار بعيد لانه من محافظه تانيه (المنيا) انا قلتله المعلومات الى حضرتك كاتبها
اخد احد سمكرى وراح قابل صاحب العربيه
العربيه على كلامه ان حالتها اقرب للكنبه منها لعربيه
الموتور مسيل زيت والصالون مبهدل بطريقه غريبه والعربيه بتاعت مندوب ومادراكم بعربيه مندوب يعنى شقيانه شقى غير طبيعى والمشكله الى بيتحجج بيها ان العربيه فابريكه بره وجوه
فلو سمحت الى يحط اعلان لعربيه ليحط ليها صور او يكتب المواصفات بما يرضى الله لانى للاسف قلت لصاحبى ان العربيه تمام وثوقا فى اعضاء نايل موتورز والراجل ضيع يوم كامل وتطلع بمواصفات تانيه خالص
وتقبلوا تحياتى

العضو المحترم shaf3y

انا مش متاكد اوى اللى هقوله صح ولا لاء بس لو صديقك اللى بتقصده ده اللى هو المدعو عليوه اللى كان بيكلم صاحب العربيه يبقى اذا خلينى اوضح بعض النقاط مع الوضع فى الاعتبار ان مرجعيتى فى تخمين انه عليوه هو كلامك ان (صديقك اصطحب معاه سمكرى):
اولا عليوه ده اتصل بصاحب العربيه على انه واحد صحبى يعرفنى من طرفى وده اللى قاله باللفظ(انا اعرف جورج واعرف فعلان وعلان وترتان مما اثار ريبه صاحب العربيه) وبعد مماطله ولف ودوران فى الكلام مع صاحب العربيه صارحه انه تاجر
ثانيا قام صديقك الفاضل عليوه بتحديد ميعاد ولم يلتزم به مع صاحب العربيه وطلب منه تأجيل الميعاد ليوم ثانى وده بعد فشل محاولته للضغط على صاحب العربيه انه يخليه يروحله بالعربيه من مدينه نصر لحلوان!!!!!!!
ثالثا بالرجوع لصاحب العربيه بعد قرأه تعليقك ابلغنى ان بعد معاينه صحبك عليوه والسمكرى المصاحب له اعجبت عليوه والسمكرى اللى كان معاه كمان وكانوا بيتحايلوا على صاحب العربيه علشان يخلصوا فيها وكانت فلوسهم جاهزه وتنازل صاحب العربيه عن شرط البيع بعقد مسجل ووافق على البيع بتوكيل لكنهم اختلفوا على السعر لان هذا العليوه كان ماسك على 38000 وصاحب العربيه ماسك على 41000
رابعا بعد معاوده الاتصال بصاحب العربيه والرجوع للمدعو عليوه بعد قرأه تعليقك المحترم اقسم هذا الشخص عليوه انه لم يقل اى كلمه من اللى انت كاتبه ده بل واقر للمره التانيه ان العربيه عجبته بل واقسم انه لم يقل ان الموتور مسيل زيت وباقى الكلام اللى انت قلته
خامسا صديقك كان موجود فى حلوان اصلا مش جاى من المنيا مخصوص يعنى مش جاى مشوار مخصوص للعربيه دى وده كلامه

اخيرا وبدون ذكر تناقدات اكتر من كدا احب اوضح بعض النقاط
اولا عربيه صديقى هى فى مجملها عربيه حالتها متوسطه وانا مكتبتش اى كلمه تقول انها بشوكتها او ان اللى هيشتريها هيشترى عربيه بكيسها وانا غير مسؤل لو انت فهمت كدا بدون السؤال اولا عن اى تفاصيل
ثانيا فى كلام كتير من اللى حضرتك قلته ينم عن اندفاع يمكن او عدم فهم او يمكن محاوله لحرق العربيه بسبب عدم الاتفاق مع صديقك التاجر عليوه ده
ثالثا اذا كنت انت دخلت وكتبت تعليقك ده بناء على كلام من واحد صاحبك وانت ماشفتش العربيه فأنا بتكلم على عربيه انا شايفها قدامى من سنين ومالكها صديقى يعنى انا شفت مش سمعت بس وللعلم صاحب السياره هو دكتور صيدلى ويملك هذه السياره من سنه صنعها وهو اول مالك للسياره وللعلم ايضا صديقى بدأ العمل كمندوب من شهور قليله وقبل كدا كان يعمل بمصنع ادويه لسنين طويله وليس مندوب يعنى العربيه دى فضله مركونه لا تستخدم غير للمشاوير الشخصيه قرابه ال4 سنين ويمكن اكتر ده غير انه يملك سياره اخرى وهى لانسر واعتقد ان الكلام ده قاله لهذا التاجر عليوه
اخر نقطه احب اقولها انى لو انت شايف انى بعلن عن عربيه واعلانى به مغالطات او عدم صراحه فبرجاء مراجعه مواضيعى وتاريخى وتاريخ انضمامى للمنتدى قبل الاندفاع فى الكلام والتقليل من شأن شخص او سلعه بالمنظر ده

اخيرا لا اعتقد انه لابد ان يكون اعلان بيع العربيه يحتوى على صور علشان يكون صادق بما يرضى الله...فيه ناس كتير بكلامها من غير صور ممكن تشوه صوره حاجه من غير ماتشوفها وشايفه ان ده صدق بما يرضى الله برضو

اخر حاجه احب اقولها ان لو طلعت متعرفش هذا المدعو عليوه اذا انا اكون مخطأ فى كل كلمه قلتها واتمنى تقبل اعتذارى عن كل الكلام ده مع انى اشك انك متعرفوش بل واشك انك انت كمان تكون تاجر زيه

تحياتى