بركولى تليفونى الفخم جدا نوكيا x1 ابو خطين اتسرق

**lanos2004** · 03-12-2012 02:27 PM

وانا ماشى فى امان الله فى الزحمه وفاتح الزجاج اليمين نص كدة علشان الطراوة
هوب لقيت واحد بيخبط على العربيه مش تحاسب يا استاذ دوست على رجلى -انا -يا عم انا جيت جنبك -يا بيه الارض مش ليك لوحدك فيه ناس ماشيه عليها زيك-تانى هوة حد لمسك يا عم-قال روح ربنا يسامحك
كملت طريقى ومشيت
ببص على التليفون الفاخر ابو 100 جنيه بحالهم ملقتوش
طبعا مقدرتش امسك نفسى من الضحك
اتعملت قيا
بس انا كمان عملتها فى الحرامى -مش هيعرف يبيع التليفون 20 جنيه على بعض ههههههههههه-اصل حالته وحشه قوى وعرة قوى-دة حتى لما بروح مكان مهم مش بطلعه من جيبى علشان حاجه تكسف
حد يقلى وانته ليه يا استاذ مش شايل تليفون محترم
اقوله كان فيه يوم معايا تليفون محترم ووقع- ولقيت نفسى زعلت شويه عليه-ومن يومها بطلت اشترى حاجه غاليه
--المهم خلى بالكوا فى الزحمه والاشارات -بدل اما يتعمل فيكو زى ما حصل معايا وخاصه انى بشوفكوا ماشاء الله شايلين تليفونات بتتكلم لوحدها
كل واحد يتبرع بربع جنيه علشان محتاج 50 جنيه اجيب تليفون بخطين
على حساب رقم -هنيالك يا فاعل الخير-ومن قدم شىء بيداه التقاه-وحسنه قليله تمنع بلاوى كتيره-وادينى جنيه اجيب سندوتش-معايا عيال عاوزين يتعشوا-نعناع-مناديل-عاوز اجيب حق الدوا -وتلاقى الروشته طالعه من مستشفى بيطرى

**Mostafa.Mahran** · 03-12-2012 02:29 PM

لسه الموضوع ده حاصل مع صاحبى و تليفونه كان صينى و طالع عينه بس الزعل كله كان فى الارقام

**Ahmed_Ramadan** · 03-12-2012 02:35 PM

الموضوع ده حصل معاك فين ؟؟!

**swimmer25** · 03-12-2012 02:38 PM

حط تليفونك في جراب الباب اللي شمالك تحت

**hassaan2266** · 03-12-2012 02:42 PM

فكرتني باللي حصلي بس كان iphone أحمد ربنا

**Abo.Moazz** · 03-12-2012 02:42 PM

يستاهل اللى حصل فيه....... ( أقصد الحرامى )

**friendship7897** · 03-12-2012 02:52 PM

أحنا ممكن نعمل موضوع بعنوان ( مبروك مقدماً )
للي هيتسرق أو يتنصب عليه - لأنه واضح أوي إن موضوع السرقات والنصب دا زايد بشكل مبالغ فيه
عموماً - ربنا يعوض عليك وعلى كل اللي أتسرقوا من قبلك ومن بعدك
وأعتقد بالوصف بتاع التليفون الجبار دا ممكن الحرامي يدور عليك علشان يرجعه لك - ويسيب لك معاه خط تليفون هدية ( سرقه من حد تاني )
ربنا يستر