الموضوع: نظريتي المتواضعه في تحويل العربية للغاز الطبيعي

المشاركة الأصلية كتبت بواسطة Adham

طبعا كلام حضرتك مضبوط, حاتاكل نص الشنطة و كمان وجود انبوبة غاز في شنطة السيارة هو قنبلة موقوتة محطوطة ورا منك

موضوع ان الديزل دة حايدي قوة اكبر هي معلومة خاطئة شائعه, لان الديزل بيدي عزم مابيديش لا قوة و لا تسارع و لا لفات ار بي ام عالية
الديزل علشان تاخد منة سرعه يبقى يركب على فتيش نقلاتة كتيرة علشان مشوار نقلتة صغير, زي البيجو كدة لما عملوا فتيس 7 نقلات لمحركات الديزل علشان يتلافوا عيب قلة عدد لفات الار بي ام بتاعه الموتور الديزل و يستغلوا عزم الديزل

انما علشان تجيب موتور يديلك 205 هورس باور زي موتور العربية الاصلي ال 3200 سي سي ب 24 صباب و 4 كامات حاتحتاج موتور عربية نقل و حايستهلك جاز كتير و في الاخر برضة لفاتة اقل و صوتة اعلى

واستحالة تعرف تشغل موتور تويوتا ديزل او غيرة على فتيس الفرونتيرا الاصلي لان الفتيس دة بيشتغل بانترفيس (كونترول يونيت) و بالتالي بياخد اشارات من حساسات الموتور الاصلي بتاع العربية زي حساس البوابة التي بي اس و بالتالي استحالة يشتغل الا على موتورها, او على موتور الديزل بتاعها و هو 3000 سي سي في 6 سلندر بالطول بس عيبة مش موجودة و مالوش اي قطع غيار و لا معروف هنا اساسا يعني لو جبتة استيراد حايتعبك

وكمان لو ركبت الفتيس المانيوال بتاع موتور الديزل اللي حاتسقطة يبقى حاتلغي الغرز بتاع العربية لانة راكب على فيسها الاصلي , أعتقد دة ممكن يتعدل على فتيس مانيوال بس مش حايبقى شغلانة سهله و لا مضمونة

أولا... Welcome Back :)

ثانيا بالنسبة لنقطة فتيس الغرز
انا معايا رانجلر شلت منها الموتور الأصلي و الفتيس الأصلي بالغرز بتاعه بكل حاجة.... و جبت موتور ايسوزو NKR تيربو ديزل.... بالفتيسين بتوعه (العاده و الغرز)
و بكدا استفدت من ميزة العادة و الغرز
من ناحية تانية.... التيربو في الديزل التسارع بتاعه مبيختلفش عن البنزين (شوف التويوتا الهاي ايس التسارع بتاعه و السرعة القصوى - كمان شوف الايسوزو الديمكس الجديدة بالتيربو التسارع بتاعها عامل ازاي)
و الجميل في الموضوع أن محركات الديزل الحديثة قللوا من صوتها جدا....

كان معايا عربية جي ام سي كنت عامل عنها موضوع هنا.... ركبتلها موتور 3900 سي سي تيربو ديزل
عايز في مرة اخليك تعمل تست درايف للعربية ديه
صوت الموتور مش مسموع و انت جوة الصالون
و انت بتجري بيها...هتلاقي نفسك جبت 140 من غير ما تحس اصلا !

المشاركة الأصلية كتبت بواسطة ahmed_eng2001

كلام حضرتك متفق معاك فيه
كلامك عن الفرونتيرا مقنع جدا ( انا معرفش حاجة عن الفرونتيرا )
انا كنت بتكلم عن موتور الكامنز او الجى ام الديزل ... و ده فيه منه موديلين بينزلو فى البليزر
الموتور 6.2 لتر تيربو ديزل .. بينزل معاه فتيس اوتوماتيك و معاه فتيس غرز كمان و تمنه ممكن يعمل 7000 جنيه
مشكلته انه مش منتشر و ملهوش قطع غيار
بصفة عامة ... بيعجبنى المحرك الديزل فى قوته ... مشاكله قليلة ... عمره طويل جدا
مشكلته الوحيدة فى طرمبة الجاز .... لو مظبوطة ... تعيشك عيشة هنية
لما تبرجل .... تكرهك فى العربية

كان عندنا مشكلة فى فورك ليفت ... بطل مرة واحدة و انا سايقه ... و حلف براس ابوه ما هو داير تانى
مديرى الله يكرموا قالى ... الديزل خلص
حطيت ديزل ... فقالى الفلتر مش نظيف ... فتحنا لقيناه وسخ و نظفناه ... برضو مرضيش يدور
فقلت له احتمال يكون الفلتر التانى ... اول مرة كان يعرف ان الديزل فى الغالب بيبقى فيه 2 فلتر ديزل على الاقل
فقالى .. اوكى ... اتصرف انت فى الفورك
المهم انا بدات افتى .......و افك و اربط و فى الاخر ... قلتله ....
الفورك بايظ و احنا عاوزين ميكانيكى و رحت مبتسم ابتسامة عريضة
و سبتهم و انا عامل برئ و لا كانى عملت حاجة :)

نحن فى انتظار مينا يدخل برايه معانا .... علشان هو من المؤيدين لفكرة تحويل المواتير البنزين للجاز

العيب بتاع البرجلة مش من الطرمبة ده من فلتر الجاز

عشان من عدم تغييره اتسد و خلى الموتور يتكتم

موضوع انه بطل و مرضاش يدور...هو ببساطة أخد هوا

كان حقك غيرت الفلترين ب2 جداد (أو نضفتهم بالبنزين لو مفيش جديد) و تملا التنك و تكارك من الطرمبة عشان الهوا يطلع من الدورة

و دور بعدها هيدور معاك علطول.... الموضوع شديد البساطة.... انا شخصيا عمري ما عطلت مني عربية ديزل لسبب من الموتور.......

المشاركة الأصلية كتبت بواسطة hany121

أستاذ مينا. تعديل الرانجلر كلفك كام؟؟

الرانجلر اللي معايا أنا مظبط حاجتها من ناس بيني و بينهم حسابات عشان كدا التكلفة اللي كانت عليا مش هي اللي نحسب عليها

لكن عموما... هي مش عملية رخيصة
موتور الديزل من 12-15 الف تقريبا... بالفتيس بتاعه و بتحتاج تغير عداداتك كلها ... لأنك لو خليت العدادات القديمة بتاعت البنزين مش هتظبط زي بتاعت الديزل... يعني قول كمان 1000-2000 جنيه ضفيرة كهربا و عدادات و تقعيد الموتور.... حوالي كمان 1000-1500
ممكن نقول هنعمل حسابنا في 20000 مقفولة

عشان كدا اللي بيكون عايز يركب رانجلر ديزل.... بنقوللو هات عربية كهنة...مفيهاش حاجة سليمة و نعملها من اول و جديد لأن كدا كدا كله بييجي جديد

يعني لو افترضنا انك جبت العربية ب10000 مجرد بودي و بيبان و شاسيه بس.... من غير حتى طابلوه....
هتصرف كمان 20000

كمان هتجيب عفشة كاملة... 4 مساعدين و جلب سوست و علبة دركسيون (عشان دايما بتكون بايظة)
( المساعد ب150 * 4 = 600 و علبة الدركسيون بحوالي 250-300 بالكتير) قول حوالي 1000 جنيه كمان

ترخيص 3 سنين 5000 جنيه (لو الموتور فوق 2000 سي سي)

و لو حبيت تسمكر و ترش و تعمل فرش جديد و تجيب اكسسوارات .... هتزودلك كمان 2000-3000
يعني في الآخر مش هتعدي معاك ال40 ألف... بس كل حاجة في عربيتك هتكون جديدة و مضمونة