حد جرب التايم شير مع عامر جروب (بورتو) ؟

**A_H_M_A_D** · 16-12-2012 03:25 PM

كنت ماشي في سبينس و قابلني واحد من بتوع التايم شير , في الاول كنت هاسيبه و امشي كالعاده , بس لما لقيته تبع عامر جروب قلت استنى لما اسمع هايقول ايه , لأن عامر جروب شركة كبيرة و ليها سمعتها في البلد

لقيته بيكلمني عن بورتو مارينا الجديده , فسألته معندكوش حاجه في العين السخنة قالي فيه قرية جديده اسمها Porto South Beach

قالي انها على بعد 12 كيلو من بورتو السخنة , والنظام ان ليا 30 يوم في السنة لمده 50 سنة , الاسعار بتبدأ من 30 الف جنيه , ادفع 10% مقدم و الباقي على سنتين بدون فوايد , وعند الاستلام بدفع 3000 جنيه صيانه تدفع مرة واحده بس

بصراحة الكلام عجبني و الاسعار كمان كويسه قوي , يعني ليا شهر في السنة في بورتو الجديده وبسعر ممتاز

المشكلة ان التايم شير في مصر عموما مش بيتنفذ صح , ودايما بتظهر مشاكل كتير قدام , فقلت اسألكم ايه رأيكم في الاشتراك معاهم , وهل فيه حد مشترك معاهم بالفعل يقولنا رأيه عن تجربه

**احمد المصرى** · 16-12-2012 04:29 PM

طول عمرى مش مقتنع بموضوع التايم شير وخاصا فى مصر بحس انه نصب فى نصب لا اكثر

**A_H_M_A_D** · 17-12-2012 09:07 AM

المشاركة الأصلية كتبت بواسطة احمد المصرى

طول عمرى مش مقتنع بموضوع التايم شير وخاصا فى مصر بحس انه نصب فى نصب لا اكثر

ماهو انا برضه عندي الانطباع ده عن التايم شير , عشان كده مقلق اني اشترك معاهم رغم ان النظام بتاعهم مغري , وبورتو السخنة شغاله زي الفل و مفيهاش مشاكل

المشاركة الأصلية كتبت بواسطة dede_dodo88

كنت قريت الموضوع ده من فترة عندي في الشغل عشان كان عامر جروب عامل corporate offer للشغل عندي و منزل في سعر الحوار ده و مطول في مدة السداد..
الفكرة كانت عجباني الصراحة و لوهلة فكرت أني أدوس في الحوار بس كان عندي ألتزامات تانية تمنعني..

طيب ياريت حضرتك تسألي الناس اللي اشتركت معاهم في الشغل عندك , رايهم إيه في الموضوع؟ وهل حد راح و شاف المشروع بنفسه وهو بيتنفذ ؟ لأن المفروض فيه مرحلتين خلصو و جاهزين وفاضل مرحله واحده في مرحلة الانشاء , وتسليم المشروع كله هايكون في 2014

**ahmed4000** · 06-01-2013 10:20 AM

بص ياباشا لانى بقلب فى الموضوع ده بقاله فترة
بتاع العين السخنة مش فى بورتو نفسها فى بورتو قريبة من الزعفرانة لسه بتتبنى وحتتسلم 2014
يعنى لسه متبنتش وكلها حتبقى تايم شير وده قلقنى انه ميهتمش بيها
ثانيا معظم الحاجات اللى بيقولوهالك السيلز مش مكتوبة فى العقد ولما تقوله كده يقولك هو عامر حيضحك عليك هههههههه
فى حاجة غريبة رغم ان سعرها رخيص بس مش عارف يخلصها بقاله فترة

انا صرفت عنها نظر لكن من يومين لقيته ابتدى يعمل نفس الموضوع على بورتو مارينا
وميزة مارينا انها مبنية وموجودة قدامك يعنى مش لسه حتشوف شكلها ولا مستواها وهى نفس بورتو العادية وحتاخد التبادل بتاع انترفالز (تبادل دولى) دلوقتى

المشكلة برده فى موضوع العقد وهل لما احب احجز حيدونى حجز ولا شغل المصريين حيشتغل ويعملى افلام

**wwaeel** · 06-01-2013 02:40 PM

انا مشترك في الموضوع ده في العين السخنه واعتقد انه احسن من التيم شير انا روحت شوفت المشروع خلص معظمه وهيتسلم فعلا في 1 /2014 ومستوي القريه هيكون احسن من بورتو السخنه والمرحله الاولي المساحات الكبيره متباعه تمليك والي عرفته كمان انه هيفتح موضوع التبادل ده مع بورتو مارينا وشارم ومرسى مطروح مع دفع فرق بسيط لو المكان الي هتروحه سعر ايجار الليله في اغلي من السخنه غير انه مفتوحلك التبادل بتاع انترفالز (تبادل دولى) هو فكره المشروع انه بيبيع كل شاليع ل 10 افراد فقط مع عدم تثبيت شاليه لفرد وده عشان لما تيجي تحجز في اي وقت تلاقي مكان وممكن تنزل في اي شاليه وانت ممكن تحجز قبلها بي مده زي ما انت عاوز عشان تضمن تلاقي اماكن وممكن تاجر كمان ايام من ال 30 يوم بتوعك وعامر جروب هو الي بياجرها وبياخد 50% من قيمه الايجار بتبلغ في اول اسبوع في السنه هتاجر كام يوم من ال 30 يوم علي مدار السنه وفي نهايه السنه بيديك ايجارهم

**aser_007** · 08-01-2013 12:32 AM

المشاركة الأصلية كتبت بواسطة wwaeel

انا مشترك في الموضوع ده في العين السخنه واعتقد انه احسن من التيم شير انا روحت شوفت المشروع خلص معظمه وهيتسلم فعلا في 1 /2014 ومستوي القريه هيكون احسن من بورتو السخنه والمرحله الاولي المساحات الكبيره متباعه تمليك والي عرفته كمان انه هيفتح موضوع التبادل ده مع بورتو مارينا وشارم ومرسى مطروح مع دفع فرق بسيط لو المكان الي هتروحه سعر ايجار الليله في اغلي من السخنه غير انه مفتوحلك التبادل بتاع انترفالز (تبادل دولى) هو فكره المشروع انه بيبيع كل شاليع ل 10 افراد فقط مع عدم تثبيت شاليه لفرد وده عشان لما تيجي تحجز في اي وقت تلاقي مكان وممكن تنزل في اي شاليه وانت ممكن تحجز قبلها بي مده زي ما انت عاوز عشان تضمن تلاقي اماكن وممكن تاجر كمان ايام من ال 30 يوم بتوعك وعامر جروب هو الي بياجرها وبياخد 50% من قيمه الايجار بتبلغ في اول اسبوع في السنه هتاجر كام يوم من ال 30 يوم علي مدار السنه وفي نهايه السنه بيديك ايجارهم

صح جدا الكلام ده

**ahmedkhairy** · 08-01-2013 04:47 PM

متابع

**bassem100** · 05-06-2013 04:26 PM

طيب مفيش اى اخبار عن أى مصاريف تانية مش باينة يعنى مثلا استهلاك الكهرباء واو المياة او اى شئ ممكن يولد مصاريف غير مذكورة

**nona_yaris** · 05-06-2013 04:59 PM

المشاركة الأصلية كتبت بواسطة bassem100

طيب مفيش اى اخبار عن أى مصاريف تانية مش باينة يعنى مثلا استهلاك الكهرباء واو المياة او اى شئ ممكن يولد مصاريف غير مذكورة

بتدفع هاوس كيبينج 50 جنيه في المرة بحد ادنى مرة واحدة علشان اللي بعدك يستلم الشالية نظيف ولو عاوزهم ينظفولك الشالية ويغيرو الفرش تاني كل مرة ب 50 جنيه
استهلاك الكهرباء والمياة بكارت مدفوع مقدما بتشتريه انت
الحد الادنى للحجز في الاعياد اسبوع كامل
وفي نهاية الاسبوع والاجازات 3 ليالي
غير كدة ممكن ليلة واحدة
وعامر جروب شركة كويسة ومش زي الشركات المجهولة لأن لهم سمعة يخافو عليها