الموضوع: استفسار مهم بخصوص زيت الماكينة ؟؟

اهلا بيك يا باشا ..
انا معايا سبورتاج 2012 فى السعودية موتور 2400 دفع رباعى ومن اول الزيرو والجبر وكيل كيا بيحطلها كاسترول GTX العبوة البيضاء اللى بيتغير على 5000 كم وادائه زفففففففففت وماكانش عاجبنى خالص وفضلت عليه لحد 17500 كم
لحد اما روحت معرض الرياض من شهر تقريبا وهناك لقيت استاند لكاسترول من الامارات وسألتهم عن الماجنتيك .. قعد يشرحلى الفروقات والتآكل والعربية باردة اول ما تدور الصبح وحبيبات الماجنتيك وخلافه
سألته على الوكيل ومكانه عشان عاوز اشتريه واركبه
علما ان عربيتى مكتوب فى الكتالوج زيت لزوجة 5W30 كاختيار اول و10W30 كاختيار تانى (اغلب كيا وهيونداى كده والجديد كله كده على فكرة)
وصفلى مكان موزع معتمد فى طريق الخرج بجنوب الرياض .. روحتله ودورت عليه لحد اما وصلت وقبلها كنت باسال عليه برة فى البنزينات ومحطات تغيير الزيوت
لقيته اللتر ب50-55-60 ريال حسب المكان !!!!!
بصراحة كنت بادور على ليكوى مولى لأنى استخدمته فى مصر فى عربيتى الصنى تحفففففففففففففففففة والمانى اصلى لكن للاسف اللى لقيته فى السعودية كله العبوة الموف او الزرقاء لزوجة 10W40 و 5W40 سوبر لايتلوف وده اكتر للعربيات اللى بتحرق وتجرى بيها وكان سعره 45 -50 ريال للتر
فى حين ان الGTX ثمنه 14 ريال اللتر وفى التوكيل بيوصل ل16 ريال اللتر

نرجع تانى لموزع كاسترول .. هو بيبيع جملة مش قطاعى بس تخيل لقيت عنده السعر كام ؟
كرتونة 12 عبوة * 1 لتر = 290 ريال !!!!!!
يعنى بحسبة صغيرة اللتر واقف ب25 ريال بدلا من 55 !!!

طبعا بدون فصال خدت كرتونة لأن السبورتاج بتاخد 4.6 لتر (يعنى 5 عبوات)
واخويا كان لسه مستلم نيو الانترا وبتلين اديته 3 لتر وباقى العبوة المفتوحة عندى والباقى خليته لتغيير الزيت الجاى
وكمان اشتريت عبوة زيت فرامل DOT3 كاسترول ب10 ريال بالباقى ههههههههههههه

على فكرة الماجنتيك بيتغير كل 10 الاف كم وتخليقى بالكامل وممكن يقعد لحد 12 الف كم اذا كان استهلاكك ليهم فى سنة كحد اقصى

نيجى بقى للاداء ... نعومة وسلاسة وهدوء فى الصوت ع السلانسيه (صوت السبورتاج عامة عالى عشان تقنية الموتور قديمة) ولحد دلوقت من 17500 الى 21200 كم وسفر لمكة وجدة رايح جاى اكتر من 2000 كم على سرعة 120-160 كم/س ولزوجته تحفة وتسارع العربية بقى اخف خاصة بعد ما غيرت البوجيهات فى صيانة ال20 الف كم بنوعية بلاتينيوم بدلا من العادية والاتنين NGK

لكن استهلاك البنزين مش ملحوظ اوى لأن اغلب مشاويرى داخل الرياض اللى بقت ازحم من القاهرة فى اوقات الذروة اللى هى على مدار اليوم صباحا ومساءا وكمان تكييف احيانا فنفس المعدل تقريبا قبل = بعد

معلومة كمان .. الاهم من معامل اللزوجة هو مواصفات الزيت وفى الماجنتيك اعلى بكتير من الGTX وباقى الزيوت الموجودة ومضروبة فى السعودية

والماجنتيك تصنيفه API SN طبقا للمقاييس الامريكية و A5 طبقا للاوروبية يعنى احدث حاجة
فى حين ان GTX تصنيفه API SL !!!! (حسبى الله ونعم الوكيل فى الجبر وامثاله اللى بيضروا المواتير عشان يضمنوا العملاء كل شوية يغيروا زيوت معدنية او نصف تخليقية كل 5000 كم)

اما الايدج فلزوجته 10W60 وده تقيل على الماكينة خاصة فى المشاوير القصيرة وعاوز عربيات رياضية كوبيه ورودستر و6 سلندر فما فوق ومناسب اكتر للمجانين اللى بيمشوا على 180-200 كم/س

المشاركة الأصلية كتبت بواسطة msco

الف الف شكر ياباشا وفعلا استفدت من حضرتك جدا

انا معايا كيا سيراتو 2011 وكنت بغير في الوكالة الحراميين على طول لكن بعد ما نزلت مصر بيها وغيرت برة ... اتشجعت اني اغير برة المرة دي كمان

ولما رحت معرض السيارات في جدة اول امبارح لقيت بردة بتوع كاسترول هناك وقعد يشرحلي مميزات المجنتك للموتور والحبيبات والكلام ده فاقتنعت وخصوصا بعد جولة على النت .. لقيت نسبة كبيرة بتشكر فيه

بس لسة معرفش سعرة كام وقالولي الوكيل هو الجميح

بس الوقتي لو انا جبت كرتونة بسعر الجملة اكيد هيعدي عليها اكتر من سنة معايا ويمكن اكتر لاني مش بمشي كتير .. يعنى متوسط المسافة عندي 2400 كيلو متر شهريا

فهل لو الزيت عدى عليه فترة كبيرة ينفع استخدمة برده ولا خلاص بخ

السؤال الأهم في الموضوع كله انا هحط ماجنتيك دلوقتي على 30 الف كيلو

وصيانة الاربعين الف هعملها في الوكالة لان فيها تغييرات كتير مهمة واكيييييد هيحطولي الجي تي اكس تااااااااني

هل التغيير ده يأثر على الماكينة بالسلب ؟؟؟؟؟؟؟

بالمناسبة انا سألت على سعر اللتر الجي تي اكس في الورش قالي بعشرين ريال ؟؟ وهسأل النهاردة على سعر الماجنتيك وربنا يستر ويكون اللي عند الورش ده اصلي

1. بدون فصال او تفكير الكاسترول ماجنتيك افضل 100 مرة من gtx اللى بيحطه التوكيل
2. اسأل فورا على سعره فى وكالة الجميح واكيد هايكون ارخص من اللى بيتباع برة عند محلات الزيوت
3. الافضل تجيبه بالجملة زيى بالظبط لأنه ارخص بكتيييييييير من انك لو اشتريت كفايتك دلوقت وخلاص .. والافضل انك تشوف حد من اصدقائك او معارفك هايغير زيت قريب هو كمان وتقنعه بيه وتقسمهم معاه لو شايف ان 12 لتر كتير عليك لوحدك
4. لو حضرتك بتمشى 2500 كم/الشهر يعنى هاتغير زيت كل 4 شهور تقريبا او 10 الاف كم وطالما العبوات مقفولة ومتبرشمة يبقى مفيش قلق تقعد لحد سنة وزيادة كمان بدون اى ضرر بشرط انك تحفظها فى مكان بالبيت غير معرض للحرارة واوعى تسيبهم فى شنطة العربية
5. مش عارف السيراتو بتاخد كام لتر زيت بس اكيد زى الالانترا 3-3.5 لتر بالفلتر مش زى السبورتاج بتاخد 4.6 لتر .. يعنى فعلا لو قسمتهم مع واحد كل واحد ياخدله 6 لترات ويشترى عليهم واحد لتر اضافى للتكملة فقط وهايكون اوفر من الشراء ب60 ريال اللتر من اى ورشة
6. عمر ما التغيير من gtx الى ماجنتيك هايأثر بالضرر على الماكينة انما العكس هو الصحيح والاستمرار على الgtx هو الاكثر ضررا !!!!
7. مفيش اى مشاكل ابداااااااااااا من انك تغير الزيت برة التوكيل من غير ميعاد الصيانة بشرط انك تشترى فلتر الزيت اصلى من الجبر (انا اشتريته ب14 ريال للسبورتاج وغيرت الزيت برة على 17500 كم)
ووقت الصيانة بلغ مهندس الاستقبال انك مغير زيت برة نوع كاسترول برضه لكن ماجنتيك وده افضل 100 مرة من اللى هما بيحطوه الgtx ونفس معامل اللزوجة الموصى به فى كتالوج العربية 5w30 وحمايته للموتور اكبر .. وساعتها كل اللى هايعمله هايخصم ثمن تغيير الزيت والفلتر بالمصنعية من كامل تكلفة الصيانة (غالبا بيكون 146 ريال)

ودى اسعار جدول صيانات كل طرازات كيا بالسعودية عند الجبر


نصائح هامة:
1. احتياطيا عشان تكتم مهندس التوكيل لو لا قدر الله قالك العربية تخرج من الضمان ولازم تغير الزيت والكلام التجارى ده .. احتفظ بعبوة الفلتر الاصلى اللى حضرتك اشتريته من الجبر وعبوة فارغة من الزيت الجديد معاك وقت اجراء الصيانة عشان ترميهم فى وشه لو فتح بقه معاك وتدخل لمدير المركز لو لزم الامر وأخره لو نشف دماغه هايعمل الصيانة عادى بدون تغيير الزيت ويكتب فى دفتر الضمان عبارة (بدون تغيير الزيت فى الوكالة)
2. يستحسن تغير الزيت برة عند اى مركز قبل الدخول للوكالة عشان تخليهم يشيكوا على تربيط الفلتر والطبة كويس وهما بيعملوا باقى الصيانة بدلا من حدوث العكس اى تعمل الصيانة الاول وتغير الزيت بعدين
والافضل تسال لو ينفع تروحلهم بالزيت زى مصر وهما يحطوه مع الفلتر مع احتساب المصنعية (75 ريال تقريبا) بعد خصم ثمن الزيت الgtx اللى بيحطوه
3. هتلاقى كل محطات الزيوت اللى برة فى الشارع بيقولولك ما ينفعش تجيب الزيت معاك عشان تنفعهم يعنى وتدفع ثمنه الضعف زى بترومين وغيرها واللى هايرضى يغيرك زى اللى لقيتهم هايطلب منك 30 ريال مصنعية تغيير ههههههههه مع ان الحكاية كلها مش محتاجة فن ولو انا كنت فاضى وعندى جراج كنت غيرته بنفسى
4. لازم تكون عارف معيار الزيت لعربيتك بالظبط لأن الفتى كتير هنا زى مصر خاصة من العمالة فى المحطات .. يعنى انا لما غيرته عايرت الزيت بنفسى 0.6 لتر قبل ال4 لترات وخليته يحطه ولما دورت وقاسه قالى شوفت ناقص ازاى؟ العربية دى بتاخد اكتر من كده 5 لتر او اكتر !!!!!!!!!
قولتله بكل ثقة فى النفس انا عارف عربيتى اكتر من اى حد تانى وشكرااااااااااااااااااا وعالعموم هاقيسه تانى ولو لقيته ناقص هازوده بباقى اللتر المفتوح (خدته معايا طبعا)
وتانى يوم الصبح قيسته طلع بالمللى على علامة الF
5. نصيحة وهاتدعيلى بجد لما تعمل الصيانة فى الجبر واكيد هاتغير بوجيهات لعربيتك .. هات النوع البلاتينيوم لو كان اللى راكب فى عربيتك نوع عادى هاتحس بسحب اكتر والحرق كمان هايتحسن كتييييييييييير وتلاقى استجابة الموتور فى الزحمة اسرع من الاول
والفرق بين الاتنين ان الNGK العادى سنه على شكل حرف 7 بالعربى وشرارته اضعف وثمنه 23 ريال للبوجيه الواحد وبيتغير كل 20 الف كم
اما البلاتينيوم برضه NGK اصلى من عندهم وسنه بيكون مدبب على شكل ابرة وشرارته اقوى وثمنه 46 ريال للبوجيه الواحد وبيتغير كل 40 الف كم
يعنى من الاخر هى هى نفس التكلفة مع فارق الاداء والعمر ..

لمزيد من الاستفسارات انا موجود لأنى شبه عملت ماجيستير فى كيا والجبر (حسبى الله ونعم الوكيل فيه)