الشرطه اديتنى هديه راس السنه !!!!!!

**BESO516** · 01-01-2013 07:07 PM

كل عام وجميع المصريين بخير
النهارده كان يوم جميل جدا بالنسبالى بدايه من استلام شغلى الجديد لكن للأسف بدأ بدايه مش لذيذه

اول مأموريه فشغلى كانت عند شارع نادى الصيد من ناحيه الدقى
ولسه خارج من وزاره الزراعه الساعه 10 صباحا لقيت البهوات واقفين

الأمين طلب الرخص قالى انزل حضرتك الباشا عايز يقولك كل سنه وانت طيب

جه فبالى

مااحنا اتغيرنا بقى بعد 25 يناير

المهم قربت منه لقيت الأمين بيقوله مفيم العربيه كلها ياباشا وحاطط كلام كتير عليها

الظابط لقيته بيضحك وابتسامه الأطفال على وشه قالتله متفقناش على كده
الأمين بتاع حضرتك قالى الباشا عايز يسلم عليك ويقولك كل سنه وانت طيب
قالى طبعا مش اتغيرنا (:

هووووب مره وحده لقيته بيقولى يعنى اعمل معاك ايه دلوقتى اوديك تفحص وانت لسه مجدد من اسبوعين ( فعلا لسه مجدد الرخصه ) ولا اقعدك جنبى طول النهار تشيل اللى انت عامله ده ولا اكسرلك الأزاز والعربيه واخلص منك ههههههههههههه

وانا كل ده مقضيها هزار وضحك ولا انا هنا قولتله لأ شوف انت عايز تعمل ايه واعمله حضرتك

راح بنفس الأبتسامه الأولى قالى مبرووووك حضرتك اول واحد فمصر تقريبا يتعمله مخالفه ف2013

اتفضل

وخد 40 جنيه زى الباشا على الصبح