الموضوع: ليه اشتريت ال بى واى دى اف ثرى byd f3 2013 ؟

المشاركة الأصلية كتبت بواسطة ahmedselaraby

يظهر إن العين دبت


الله أكبر ,,, الله أكبر ,,,, الله أكبر


قل أعوذ برب الفلق


النهارده كنت فى مشوار ,, و أنا لسه فى مصر الجديده ,, جت حته زى إشاره تقاطع و العربيات كلها وقفت و أنا منهم ,, فا أم ايه بقه ,, سواق تاكسى مش عاجبه انه يقف زينا فحب يعدينى من على شمالى و أنا واقف تماما فا أم كحت عربيته فى زاوية الإكصدام الخلفى بتاعى ,, زاوية الإكصدام دخلت لجوه و تجريحات فل إكصدام طبعا شالت البويه و البلاستيك الأسود ظهر ,, بس اللى عجبنى فل إكصدام انه رد تانى و لا كأن حاجه حصلت و فضلت التجريحات بس , يعنى الإكصدام مابيتكسرش و لا بيتقطم , ده بيرد تانى زى ما كان و لا كأن فيه حاجه ,, الله أكبر الله أكبر ,, الله أكبر

بالنسبه للتجريحات ,, أعمل فيها ايه ,, انا عايز الإكصدام يرجع شكله زى ما كان تماما , انا مابحبش العربيه يبقى شكلها مجرح ,, فا ياريت قولولى اعمل ايه و عند مين و حتتكلف كام ,, و هل الوكيل ممكن يعملى ايه و بكام

فعلا أمنت بالله

العين فعلا حق حق حق

أشهد ألا إله إلا الله و أشهد أن محمدا رسول الله

,,,,,,,,,,,,,, حقا حقا حقا

اولا موضوع رائع رائع رائع وعايز اقولك ان الساعه دلوقتى 5:40 صباحا و انا قاعد من حوالى ساعتين ونص او اكتر و قريت كل كلمه و بجد ربنا يبارك فى حضرتك و فى عربيتك و فى مشرفى القسم و المنتدى

ثانيا مبرووووووووك على العربيه مع انها متاخره جدا و يا رب يديك خرها و يكفيك شرها اللهم امين

ثالثا بقى انا شايفك زعلان من الخبطه و قلت استغل الموقف ده و اقولك انى هشترى منك العربيه و هعمل نفسى مش واخد بالى من الخرابيش و امرى لله

طبعا بهزر معاك يا باشا

رابعا انا الحقيقه مش قدامى غير المستعمل علشان مش معايا غير ستين الف و ممكن استلف عليهم خمسه بالكتير كمان و انت شايف الزيرو عامل ازاى و مش هينفع ادفعهم و اقسط الباقى لانى داخل جمعيه و زانق نفسى على الاخر علشان اجيب العربيه

خامسا انا بعد موضوعك الشيق ده طبعا خليت البى واى دى رقم واحد بالنسبالى و ربنا يوفقنى و الاقى واحده مستعمله بنت حلال و بسعر كويس يناسبنى

سادسا انا منتظر و بفارغ الصبر الاجتماع الشهرى علشان اقعد معاكم و اسلم عليك انت و الاستاذ باسم على وجه الخصوص و اشكركم بشده

سابعا و اخيرا يا ريت تكمل تجربتك مع السياره حتى لو كل شهر مره حتى يستفاد الجميع باذن الله

و جزاك الله كل خير

المشاركة الأصلية كتبت بواسطة bassem.naguib

تنورنا يا طارق باشا .. وخليك متابع معانا سواء معاك العربية أو لا .. اشتريتها أم لا .. فوجودك معانا يشرفنا .

بس أنا شايف المبلغ اللي معاك ممكن يخليك تصبر شوية وتزود عليهم وتشتري زيرو .. فالزيرو له رونق آخر سواء بي واي دي أو غيرها .. وربنا يكتب ليك الخير إن شاء الله .. خاااالص تحياتي .

ده انا اللى ليه الشرف انى ادخل المنتدى الرائع ده و اتعرف عليكم

و الحقيقه الجمعيه اللى انا داخلها انا رقم 3 من 15 اسم يعنى لسه فاضل فيها سنه كمان و معنى انى انتظر لما اكمل سعر الزيرو يبقى هستنى اكتر من سنه عقبال ما تخلص الجمعيه و اقدر احوش كام شهر عقبال ما يبقى معايا سعر الزيرو اللى هو الله اعلم هيبقى كام مع الزياده المستمره فى الاسعار

انا كمان عايز اسالكم عن موديل 2010 لو فيه مشاكل علشان ده كان اول سنه فى التجميع المصرى لان معظم المعروض على النت موديل 2010

ولكم تحياتى