الموضوع: عربيتك على شاسيه ولا على علب؟؟؟ اتعرف على طرق بناء السيارات

دلوقتي حنتكلم على العربيات اللي على علب



المعروف إن معظم عربيات الركاب حاليا على علب.. والموضوع بيزيد لدرجة إن فيه بعض عربيات 4×4 بدأت تتصمم بالطريقة دي




إيه بقى النظام؟؟

تصميم العربيات اللي على علب بيسموه "الهيكل الموحد" أو "Unibody" أو "Monocoque" بالفرنساوي ومعناه "الصدفة الأحادية"

أصل الفكرة دي كان معمول في تصميم الطيارات والمناطيد في أوائل القرن العشرين بغرض الحصول على وزن خفيف وقوي في نفس الوقت،



ويمكن أول شركة عربيات استخدمت طريقة التصميم دي هي "سيتروين" في أوائل الثلاثينات (عشان كده اسم التصميم منتشر بالفرنساوي)



وبعد كده بدأت شركات تانية تستخدم نفس الفكرة في عربياتها



المعروف إن جسم العربية بيبقى معمول من ألواح معدنية (صاج) بيتم قطعها وتشكيلها حسب المطلوب في مصانع متخصصة، وبعدين الألواح دي بتتلحم مع بعض في مصنع التجميع وتشكل جسم العربية.



والفكرة في التصميم ده ببساطة هى فكرة الصدفة اللي بتحمي اللي جواها، بمعنى إن جسم العربية يكون قوي بما فيه الكفاية إنه يشيل وزن العربية ويحمي الناس اللي راكبين فيها، وده على عكس طريقة الشاسيه اللي بيبقى عامل زي العظام في الكائنات الحية

الكلام ده بيتم عن طريق تصميم جسم العربية وتقوية الأجزاء اللي المفروض إنها حتشيل حمل الوزن وتتحمل القوى اللي بتتعرض ليها العربية وهي ماشية في الطريق، وأحيانا بيبقى فيها شاسيه مدمج في الجسم (ممكن يتعمل من كَمَر أو من ألواح سميكة).







معظم أجزاء العربية مهمة في قوة العربية، لدرجة إن فيه بعض تصميمات بيدخل في حساباتها تأثير وجود الزجاج الخلفي على قوة الجسم!!!!



وطبعا التصميم بالطريقة دي أعقد بكتير من طريقة الشاسيه، وحصل تطوير كبير فيها من بعد ما دخل الكمبيوتر في صناعة السيارات، وبقى ممكن يتعرف فين المناطق الضعيفة عشان تتقوى..





الصور اللي فوق دي بتبين اختلاف الأجزاء المستخدمة من ناحية قوة الحديد أو المواد المستخدمة..



وباستخدام الكمبيوتر بيتعمل نماذج محاكاة للواقع ومنها بيقدروا يعرفوا إيه اللي حيحصل للعربية عند الاصطدام،



ومؤخراً بقى يتعمل مناطق ضعيفة (عن قصد) لامتصاص الصدمات في الحوادث (بيسموها مناطق الانبعاج Crumple Zone) بحيث إن الصدمة ما يوصلش تأثيرها للركاب بقدر الإمكان.





وعلى سبيل المثال.. تويوتا عاملة حاجة إسمها GOA Body (اختصار لجملة Global Outstanding Assessment) وده معمول أساسا عشان تخفيض نسب الوفيات في حوادث الاصطدام في أركان العربية، وطبعا عشان يطابق معايير السلامة على مستوى العالم ..



وطبعا مش تويوتا لوحدها.. الشركات الألمانية رائدة في المجال ده..





طيب ليه معظم العربيات دلوقتي بقت بتتعمل بالطريقة دي

• التصميم ده خلى تكلفة تصنيع السيارة الواحدة أرخص، لإن المواد المستخدمة فيها بقت عبارة عن ألواح معدنية وبس.

• العربية بالطريقة دي بقت وزنها أخف، لإننا استغنينا (ولو بشكل جزئي) عن الشاسيه المنفصل، وده بيساعد على توفير الوقود.

• التصميم ده بيساعد إننا نعمل عربيات أصغر، وده بيدينا تنوع في المقاسات.. وبالتالي الميزانيات

• نسب الوفيات في العربيات على علب أقل من العربيات على شاسيه.. عشان بقى فيه منطقة امتصاص صدمات بتقلل من وصول الصدمة للركاب.

• العربيات على علب بقت أوطى على الأرض (لإن الشاسيه كان بيرفع العربية لفوق)، وده بيساعد على ثبات أعلى للعربيات

• العربيات على علب فيها مقاومة أعلى للالتواء من العربيات على شاسيه، وده بيساعد على ثبات العربية

• التصميم ده بيساعد إننا نوزع وزن العربية بشكل متساوي وده بيساعد كمان في ثبات العربية

طيب.. هو التصميم ده مالوش عيوب؟؟؟

إزاي؟؟؟ أهم عيوبه هي:

• العربية على علب بتتأثر بشكل قوي في الحوادث المتوسطة والقوية، وغالبا إصلاحها بيبقى صعب (ويمكن مستحيل) وتكلفته عالية، بالإضافة إلى إن الإصلاح لا يمكن يرجع العربية لنفس قوتها الأصلية إلا إذا اتعمل فيها نفس الشغل بتاع المصنع.

• الصدأ هو ألد أعداء التصميم ده.. وبالذات لما ييجي في الأجزاء اللي المفروض إنها تشيل الأحمال، والمعروف هندسيا إن الأجزاء المعرضة للأحمال بتصدي أسرع، وده اللي خلى شركات السيارات بتعالج عربياتها ضد الصدأ وكمان بتركز على الأجزاء المعرضة للصدأ فيها

• العربيات دي بتبقى حساسة شوية لما بنعمل تعديلات فيها.. وبالذات إذا كان التعديل بيمس أجزاء معدنية في جسم السيارة، لإن زي ما قلنا قبل كده كل جزء في العربية مهم في قوة الجسم، عشان كده التعديل لازم يبقى مدروس كويس قبل التنفيذ.

• الشغل على التطوير في المصنع بقى أعقد شوية... بس الكمبيوتر ما خلاش حاجة صعبة.

من أهم العربيات اللي وصلها التصميم ده:

مرسيدس M-Class





طيب... هو فيه طرق تانية لتصميم السيارات غير طريقة الشاسيه وطريقة العلب؟؟؟

ده اللي حنتكلم عليه إن شاء الله بعد كده


...