الموضوع: تغير موتور الكليو الـ1200 بالفتيس

السلام عليكم ورحمة الله

كيف أحوالكم يا وحوش الرينو.....الواحد بقالوا كتير معملش موضوع عليه القيمة وأحوال البلد شدة الأعصاب ومخليا الواحد قليل المشاركة في القسم

أنا عامل موضوع مفصل بالصور عن خطوات تغير موتور الكليو بالفتيس بالكامل.....أرجو أن يستفيد الجميع من هذا الموضوع

بسم الله وبه نستعين :

بداية للي متابع من الأول.....أنا كنت من سنتين أو تلاتة بدأت أشتكي من نقص في زيت المحرك وكنت تقريباً كل 4 ألف كم كنت بزود كيلو زيت لغاية ما الموضوع بدأ يتفاقم والعربية في بعض الأحيان ممكن تدخن بسيط والزيت كان منشع على الموتور كله فوق وتحت......عملت مقايسة إصلاح في مركز الرحاب وقالي عايزة طقم شنبر وأويل سيل وحاجات كتير ممكن تبان لما المكنة تتفتح فالأحسن تجيب موتور إستيراد أضمن وأنضف

بعد 6 شهور تقريباً كنت في الحرفيين بسأل لواحد صحبي على موتور إستيراد وقولت أعدي على عصام بشطر وأسأل على شورت بلوك بتاع الموتور بتاعي ( وش سليندر + بلوك ).....قالي الموتور والفتيس موجود وجديد زيرو كمان ؟!!.....قولتله جديد إزاي يعني ؟؟.....قالي عنده مكن 1200 مدخلش فيه مية !!!.......قولتله إنت أكيد بتهرج وإزاي المكن ده عندك وجبته منين ؟......قالي ده خط إنتاج وإتوقف والمواتير بالفتايس كانت في مخازن المصنع وبعها لوط كامل للتجار.......أنا قولت في بالي ده على كده هيقولي المكنة بـ6 أو 7 ألاف جنيه.....قالي المكنة الشورت بالفتيس بـ 4500 جم !!.....أنا نزلت معاه لغاية 3800 جم ......أنا مكنتش محتاج فتيس..بس قولت أجيب فتيس جديد أحسن طلاما الأسعار رخيصة كده وأكيد هيكون أحسن من فتيس عمره 380 ألف كم !!
قولتله لازم توريني المواتير دي عشان أستريح.....راح موديني المخزن بتاعه في الحرفيين وفرجني على مواتير فعلاً زيرو !!.....فرجني على كوع المية وكان جديد نوفي والترمستات النحاس فيه بيبرق !! وفرنة الشكمان مفيش فيها أي عادم أو هباب أسود !!!.....قالي متغيرش سير الكاتينة ولا طلمبة المية ولا طقم الدبرياج ( كله جديد أصلي لم يستخدم !) وهاديك سيور البارو والدينمو الأصلي الفرنساوي !!
عزمت وتوكلت على الله ودفعتله عربون وبعديها بيومين روحت جيبت الموتور والفتيس

في ملحوظة على الفتيس هو قالي عليها قبل التركيب : موديل الفتيس إلي بيجي من أوربا مكان بيبة السرعة مقفول في الحلة بتاعته عشان العربيات في أوربا بتاخد قراية السرعة من الـABS مش من الفتيس زي عندنا......قالي حلها بسيط....بتفح مكان بيبة السرعة دي عند الخراط أو تنقل الحلة بتاعتك ( الشاسيه الألمونيوم فقط ) إلي فيها مكان بيبة السرعة.....وقالي إلي بيعمل كده ومضمون هو عادل في صقر قريش......هأحكيلكم تفاصيل الفتيس قدام

اليوم الأول : إشتريت الموتور بالفتيس وقررت أركب عند محمد الشرقاوي

بدأت عملية فك الموتور القديم.....الصور موضحة حالة الموتور :





بداية رفع الموتور والفتيس من الحوض :





الموتور بالفتيس القديم بعد خروجه :



الموتور الجديد بالفتيس في إنتظار التركيب :







صورة الكاتينة في الموتور الجديد :



بعد فك الموتور القديم كان لازم يفك الفتيس القديم عشان أخد الحلة بتاعته وأركبها بدل الحلة إلي في الفتيس الجديد ( زي ما وضحت سابقاً )
أخدت الفتيس القديم والجديد وروحت بيهم عشان تاني يوم أذهب إلى عادل في صقر قريش عشان يعملهولي

اليوم الثاني :

توكلت على الله وذهبت صباحاً إلى عادل في صقر قريش......قولتله في الأول على موضوع فتح مكان بيبة السرعة في حلة الفتيس الجديد.....قالي الخراط بيعملها ومش مضمونة وعاملت مشاكل قبل كده والأحسن تبدل الحلة وبتتكلف 400 جم......قولتله توكل على الله
الموضوع تم من الساعة 11 ص إلى 4 عصراً وأخذت الفتيس وطيران على الحرفيين ألحق محمد عشان كان يوم سبت والصناعية بيروحوا بدري يوم السبت ومكنتش عايز أسيب العربية يوم الحد
الحمد لله وصلت بسرعة وركبه الفتيس في الموتور وركبه باقي الإكسوارات ( الدينمو – طلمبة الباور – الكمبريسور ) وتم تنظيف بوابة الإنجيكشين والمانفول وجميع الأجزاء
الحمد لله العملية تمت بنجاح وعند الدوارة الأولى كانت هذه النغمة التي تسمهعا تصدر من موتور جديد وعند تجربة العربية كان هذا الإحساس الذي تشعر به حين تشتري سيارة جديدة والسحب والتسارع ما شاء الله ممتاز

بعض الصور بعد التركيب









تفاصيل أسعار قطع الغيار والزيوت والتركيب :

1- موتور + فتيس 3800 جم
2- مصنعية تغير الحلة 400 جم
3- جوان غطأ التكيهات 90 جم
4- زيت كاسترول إيدج 15 ألف 280 جم
5- زيت بارو كاسترول 40 جم
6- زيت فتيس فالفولين ( 75W90 ) ثلاث ونص لتر 320 جم
7- مياه خضراء أسباني 30 جم
8- فلتر هواء بولندي 60 جم
9- فلتر زيت بولندي 60 جم
10- فلتر بنزين أصلي 75 جم
11- بوجيهات Beru فرنساوي 110 جم
12- مصنعية التركيب 550 جم
ــــــــــــ
الإجمالي : 5815 جم

أسعار قطع الغيار التي وجدتها تالفة وكان يجب تغيرها

1- الضفيرة العليا للموتور 500 جم
2- بيبة السرعة الأصلية 220 جم
3- الكوبلن اليمين الأصلي فرنساوي 930 جم


ملاحظات التركيب عند عادل صقر قريش :

طبعاً أنا كنت قارىء كلام كتير عن عادل بتاع صقر قريش وشكوى الكثير منه وأنا كنت رايح عنده وأنا حريص جداً إن ميبقاش في إشتغالات
عادل شاطر جداً في شغله وعارف هو بيعمل إيه.....المشكلة في الصانيعية إلي حواليه.....بيعكوا جامد جداً وهو ممكن ميتابعش وراهم فبالتالي ممكن يخربوا الدنيا

إلي حصل معايا إن عادل غير الحلة بنفسه بطريقة محترفة جداً وبعد ما خلص قال للصنايعي ركب الفتيس.....الفتيس عبارة عن جزئين.....الحلة إلي بيركب ناحيتها طقم الدبرياج والحلة إلي بتكون مغطية جميع التروس......زي الصورة كده

الخط الأحمر ده الفاصل ما بين الحلتين والسهم الأخضر بيوضح مكان بيبة السرعة


المفروض إن الصنايعي يضع القليل من السيلكون الحراري ما بين الحلتين....وهو يقفل أنا شوفته بيضع ماده لازقة غريبة وكانت بتخلص وعمال يخبط على الإزازة عشان تنزل....المهم قاعد يليس وكروت الموضوع وقفل على كده وطبعاً ده بان بعد ما الفتيس ركب ومشيت بالعربية......الفتيس كان بينقط زيت من مكان الفاصل
طبعاً أنا روحتله تاني وعملهالي وكانت شغلانة كبيرة لأنه فك الفتيس تاني وخرجه وتعبت جداً يوميها وأنا قاعد عنده طول اليوم......كانت معاناه بصراحة والحمد لله إنتهت على خير


بالنسبة للكوبلن :

أنا كنت مغير الكوبلن اليمين ده من سنة تقريباً بواحد صيني ( إتقالي إنه تركي ) عشان الحلة ( الكاسة ) الداخلية بتاعته إتنحلت وكانت العربية بترجرج وهي بتتسارع......المهم هو باظ تاني وكان بعمل صوت نقرة جامدة في طلعة الأول والتاني وكان بيخبط والعربية باردة......محمد لما فكه لقى الصليبة غير محكمة في مكانها على المشرشر وبتتهز جامد
نصحوني أجيب كوبلن إستيراد أحسن......ذهبت لعصام قالي معندوش وبعد كده روحت لمحل قطع غيار إستيراد إسمه الأوربية ( محدش يشتري من عنده كبالن !!) وجيبت واحد منه بعد معاناه عشان يطلعلي واحد نضيف أو نفس المقاس.....وأنا داخل على الشارع إلي قبل بيتي الحلة الداخلية فركت وعمل صوت رهيب وأنا ماشي وإفتكرت الفتيس وقع من مكانه .....حمدت ربنا إن ده حصل وأنا ماشي براحة وكنت جنب البيت لأني كنت راجع على الدائري وماشي على 100 - 120 كم.....كلمت الراجل وقلتله الكولن فرك من الحلة إلي جوه وهاجيلك بكرة أرجعه

قررت بإصرار على شراء الكوبلن الأصلي عشان أبقى في أمان وراحة تامة

إشتريت الكوبلن من ميشيل حليم في جسر السويس وهو فرنساوي ماركة GKN المشهورة وسعره 930 جم وجبت ميكانيكي من شارع دمشق معايا وركبه تحت البيت وأخد 150 جم

صورة الكوبلن :






الحمد لله تمت على خير وأي أسئلة أنا تحت أمركم

سبحانك اللهم بحمدك, أشهد أن لا إله إلا أنت, أستغفرك وأتوب إليك