الموضوع: Nissan Qashqai , Hyundai Ix35 , Chev. Captiva

بالنسبه للكابتيفا فهى سبعه راكب و الكراسى متقسمه الى ٣ صفوف ،لو الثلاث صفوف مستخدمه تبقى مساحه الشنطه 85 لتر فقط و لو طوينا الصف الثالث وده ممكن و هتبقى عدد المقاعد خمسه و سعه الشنطه ساعتها 465 لتر و فى امكانيه لطى الصف التانى كمان مع الثالث و ده يخللى مساحه الشنطه 930 لتر و بالتالى الشنطه ممكن تبقى كويسه لو طويت الصف الثالث لان حضرتك بتقول ان العدد ٥ أفراد . المشكله فيها انها موتورها كبير ٣٢٠٠ سى سى و بالتالى استهلاكها للبنزين عالى بالمنطق و ان كانوا كاتبين انها تمشى 100كم ب 8.9 لتر فقط مش عارف ازاى و كمان توكيلها سىء . الفكره كمان انها عربيه كبيره لكن استخدامها للمدينة كسياره عائليه مش بتاعه دخول صحراء مثلا و لا بتاعه بهدله و ممكن تلاقى عربيات كتير ارخص و اقل استهلاك للبنزين و الضريبه عنها و مش هتضحى بأى حاجه من اللى فيها و لذلك انا استبعدها من المقارنه. بالنسبه لل ix35 و القاشقاى العربيتين دول يؤدوا الغرض منهم و عندك ال ix35 موتور ٢٠٠٠ سى سى و ١٦٦ حصان وفيها كل حاجه ككماليات و ضمانها ٥ سنوات او ١٠٠ الف كيلومتر و دى ميزه ليها. مشكلتها بس فى عدم الانتشار لانها مش رخيصه و انها ٢٠٠٠ سى سى و كمان سياسه الصانع الكورى فى تغيير الشكل بسرعه و بالتالى هتلاقى فى خلال ال ١٠ سنوات نزل فيهم كذا جيل منها ومع انى كما ذكرت لحضرتك ان العربيه مش منتشره فى الشوارع ممكن جدا لا تجد لها قطع غيار بسهوله فى المستقبل و دى نقطه تقلق منها بغض النظر عن انها كمواصفات ممتازه . بالنسبه للقاشقاى نقدر نعتبرها الأصغر كموتور و الأرخص سعرا و لكنها الأكثر عمليه فيهم فموتورها ١٦٠٠ سى سى و ١١٨ حصان فقط و دفع امامى تناسب استخدامات المدينه و ترخيصها زى اى عربيه سيدان و هى الأكثر انتشارا و أحسنهم كسعر اعاده بيع و توكيلها محترم. و عربيات نيسان معمره بطبيعتها وتقدر تستحمل مع حضرتك ال ١٠ سنين عادى هى بالمناسبه المفروض هينزل منها جيل جديد خلاص بره لانها موجوده من زمان لكن لسه نازله عندنا جديد فشكلها مش هيتغير هنا