الموضوع: حصريا ::: شرح خطوات استخراج رخصة القيادة الخاصة في السعودية

بسم الله الرحمن الرحيم
هلا والله ومليون غلا منورين المنتدى

طبعا فى ناس فى المملكه ربنا يصلح حالهم جميعا وحال بلدنا
عاوزين يطلعوا الرخصه بس مش عارفين هايعملوا ايه
انا بقا هاقلكوا على كل حاجه بالتفصيل

اول حاجه هاتعملها وتوكل على الله وقول بسم الله
هاتروح المرور وتدخل جوه اى شباك يقابلك قله
لو سمحت نموذج استخراج رخصه

هايطلب منك الاقامه وصورة شخصيه عشان
يدبسهالك فى الورقه وعليها ختم المرور

هاتاخدها وهى ورقه بيضا طبعا مش هاينفع تمشى بيها كده فى جوه فى المرور ملف اخضر علاقي بيتباع بريالين
او هاته من اى مكتبه بس مدام انته فى المرور
يبقى اسهلك وتحط الورقه فى الملف الاخضر

بعد اما تاخدها بتمشى من المرور وتطلع على اى مستشفى او مستوصف وتروح الاستقبال
وتوريله الاقامه وتقله استخراج ملف رخصه حسب مايقولك السعر
بعد كده بيديك وصل يثبت انك دفعت بتاخده وتطلع على دكتور العيون وانت معاك الملف الاخضر بيختملك الختم فى المكان المخصص فى النموذج

بعد كده بتطلع على المختبر لتحليل فصيلة الدم وبيختملك الفصيله بتاعتك فى النموذج
بعد كده بتطلع على دكتور الاذن برده بختملك الختم فى المكان المخصص فى النموذج

اخر حاجه اقبل ماتمشى من المستشفى اطلع على مكتب المدير وقله لو سمحت اختملى النموذج
هايختملك ختمين ختم وزارة الصحه وختم المستشفى او المستوصف

ياسلام ياسلام هانت هانت

بعد ام تاخد الملف الاخضر وفى كله حاجه تمام
لو لحقت المرور بتروح فى النفس اليوم ملحقتش يبقا روح بكره لان المرور بيقفل 12

المطلوب منك فى المرور
1- صورة الاقامة
2- صورة جواز السفر
3- 5 صور شخصية 4×6
4 - صورة الرخصه المصريه (لو انته مطلعتهاش من مصر مفيش مشكله)

طبعا فى مكتبه فى المرور واللى بيصورلك هو اللى بيزبطلك الورق
بعد كده بتطلع ع الظابط بيشوف الملف ويديك ورقه ويقولك روح للشباك اللى جمبى
بتاخدها وتروح طبعا ده كله وانت معاك الملف بيبعتك على اخر شباك اللى هو دفع رسوم التعليم
طبعا ياحبيبى لو انته معاك رخصه مصريه هاترتاح
هاتقولى ازاى ياعم هاقولك هاتدرب اسرع
والتكلفه اقل هاتدفع 100 ريال بس

ممممممممممممم

طب واللى مش معاه رخصه
عادى جدا هايتعلم 10 ايام او اكتر وطبعا دى ب 500
متزعلش نفسك اهم حاجه بتعرف تسوق
بعد ام بتدفع الفلوس وياخد منك الورق بيطلب منك 5 صور شخصيه

بعد كده بيديك وصل وعليه صورتك الوصل ده مكتوب فيه عدد ساعات التدريب
وبيقولك روح للجمبى هايديك ورقه كبيره فيها اشارات المرور ويقولك تعالى الساعه كام
بتبدأ من نفس اليوم او تانى يوم

طبعاا نظام التدريب نص ساعه نظرى ونص ساعه عملى
وبتختلف من مرور لمرور
النظرى سهل
اهم حاجه العملى فى مهندس مصرى بيقولك ع الخطه او اى مهندس
خطة مين ياعم متستعجلش صبرك عليا
بيدربك على اللى هاتعمله اقبل ماتمتحن وبذات الباركنج ويعينى ع الباركنج

اللى مطلعين رخصه مصريه بيدرب مره واحده وبيقوله على معاد الاختبار وهايختمهولك فى الورقه
انت كل شويه تقولى ختم ختم انا زهقت معلش ياحبيبى هى المملكه ماشيه كده
طبعا بتروح معاد الاختبار ونصيحه خليك هادى واوعه تتوتر او تتلغبط
لو غلطت بالسلامه هاتعيد الاختبار وهايختملك برده راسب لاول مره
ويعاد الاختبار فى نفس اليوم من تاريخه

لو نجحت هايقلك اطلع ع الصاله اللى بره ودى بيبقه الاختبار النظرى وده كله بيترعب منه
مش عارف ليه مع انه شوية اشارات وكلام طبعا انت مذاكر الورقه اللى المرور مدهالك يبقه طظ فى اى حاجه

طبعا فى واحد بينادى بره لما تسمع اسمك ادخل هاتدخل جوه هايقولك اسمك ايه هايشورلك ع المكان المحدد اللى هاتقف فيه اقدام ع الكمبيوتر

ياسلام ياسلام الكمبيوتر يفتح نفسك كده تتش يامعلم عامل زى الصراف بتاع الفيزا بس على مينى هاتلاقى اسمك
فى الشاشه منور بعد كده هايقلك اختار اللغه هاتختار طبعا عربى لان فى جميع اللغات
وتبدأ الأختبار لو جاوبت 6 صح الف مبروك النجاح

المهندس هايقولك كام سنه الرخصه ان شاء الله هاتقوله 2 5 10 سنين زى مانته تحدد

وبكده تكون خلصت فاضل اخر حاجه هاتروح لاى صراف وتدفع فلوس الرخصه وتحدد عاوزها
كام سنه بعد مابتدفع المرور بيعرف وبتاخد الرخصه فى نفس يوم الاختبار
والف مبروك

الموضوع ده انا تعبت فيه
ومش عاوز منكم غير حاجه واحده
تدعولى بالتوفيق
واى استفسار انا فى الخدمه