الموضوع: مشكلة غريبة في فتيس بومة مانيوال

السلام عليكم,

حصلت عندي مشكلة في الفتيس بعد صيانة ال40,000 , النقلات مش راضية تدخل في مكانها,
الغريب في الموضوع ان الحكاية دي مش دائمة, بمعنى, اول ما بطلع بالعربية, و اخد ترتيب النقلات العادي 1,2,3, مبتحصلش مشكلة, لو اضطريت اني افك النقلة و ارجعلها تاني, او انقل لغيار اققل لسرعة الطريق, عصاية الفتيس مبترضاش تدخل في مكانها, و بقعد احايل فيها لغاية ما ترضى, مش بتعافى عليها, لو وقفت و ابتديت من الاول, تظبط معايا.
الاعجب بقى و الاغرب, ان الموضوع ده كله بيختفي تماما بعد فترة من المشي و لا كأن فيها حاجة اصلا, انا اخدتها و رجعت مركز الصيانة, و جربها المهندس, معملتهاش ولا مرة مع انه كان بيضغط على النقلات و ينقل نقلات مش منطقية على سبيل التجربة, و جربتها معاه, ولا الهوا, تاني يوم رجعت زي ما كانت.

الموضوع ده حيجنني, لا فاهم فيها إيه و لا عارف اوديها لمين, و خايف عليها.

افيدوني افادكم الله.