صراع العقل والعاطفة - موضوع غير رومانسي :)

**Haitham Yehia** · 10-02-2013 11:51 AM

صباح الجمال عليكم جميعا.

انا أول مرة اشتري عربية رغم اني باسوق من فترة والحقيقة اني بامر بتجربة متهيألي قابلت ناس كتير هنا وفي مصر وهو آختيار السيارة الأولي ليك. انا معايا مبلغ ما يعديش ١٣٥ ألف بكل الأحوال. وبعد البحث المرير وصلت للنيسان التيدا الهاتش باك وبعد ماركبتها وسقتها وسافرت بيها حسيت ان هي دي العربية اللي حارتاحلها نفسيا وكمان حجزتها من أوتو ايجيبت.

دلوقتي وانا مستني العربية في صراع جوه دماغي بينها وبين اللانسر الجديدة. ودي نقط العذاب في التفكير بالنسبالي:

ليه لانسر؟

١- قطع الغيار قطع الغيار قطع الغيار. اللانسر قطع غيارها مرمية في كل حتة في شارع ذمشق وغيره وماشفتش محل مافيهوش قطع غيارها وممكن تجيبلها أي حاجة من عند البقال. التيدا نادرة ولازم التوكيل وحاتطلع عيني. في مصر الموضوع ده مهم نظرا للطرق وطزيقة السواقة في بلدنا.

٢- انا حانقل التجمع الخامس قريب ومحتاج عربية تستحمل المطبات والتكسيرات والطرق السريعة وتكون ثابتة ومعرضة تتخبط وتتحك وتتصلح بسرعة وماتخلينيش اقعد جنبها واخد مواصلات لحد ماتتصلح.

٣- لو نمت وحلمت اني بابيع اللانسر حاصحى الاقي نفسي بايعها .. التيدا لازم ادورلها على مشتري قبلها بكذا شهر.

٤- اللانسر أي ميكانيكي ممكن يشتغل فيها ولو عطلت على طريق حالاقي أي سواق يساعدني في تصليحها ( خصوصا اني ماليش خبرة كبيرة في الميكانيكا ) التيدا حاتبقى أصعب.

٥- دي أول عربية ليا. فممكن اجيب حاجة اجرب فيها زي اللانسر واتعلم عليها الميكانيكا والتصليحات والأماكن الخ. بعدين بعد سنتين أبيعها وماخسرش فيها قوي واجيب التيدا وبالمرة تكون اثبتت هي مكملة ولا حاتفشل.

٦- سمعت من ناس كتير ان اللانسر ثابتة أكتر وصاجها أنشف وبنزينها أقل خصوصا لو ١٣٠٠

ليه تيدا؟

١- باحبها وحاسس اني عايز اركبها وحاسس ان هي دي عربية أحلامي. اللانسر قفلت منها لما ركبتها بس مش مأساة.
٢- سعرها هايل بالنسبة لكل الأوبشنز اللي فيها. اللانسر مافهاش نص الاوبشنز وبنفس السعر
٣- تركب العربية تحس بالنعومة والعزل وصوت الموتور اللي مش مسموع والتقفيل الممتاز. ياباني بجد. اللانسر باحسها مزعجة.
٤- قطع غيارها نادرة وغالية آه بس مش مستحيلة وفي نفس الوقت معمرة. عديلي عنده تيدا بقالها معاه سنتين من غير مايغير لمبة. غير طبعا الصيانات العادية.
٥- شكلها جديد والهاتشباك تحفة والشنطة كبيرة جدا بالنسبة لهاتش باك. اللانسر شكلها تاكسي وبقت موجودة في كل شارع في مصر.

أفتكر ان المقارنة دي أي حد بيشتري عربية فكر فيها. يا ترى اخترت بعقلك ولا عاطفتك ولا الاتنين؟ اختار بعقلي لأول عربية وعاطفتي لما أغير؟ ولا انبسط بأول عربية ليه والعمر لحظة وكده؟

سؤال فلسفي عميق :) :)

ساعدوني :)

**S O P H O S** · 10-02-2013 12:22 PM

انا شياف انك مدام بتفكر تبيع بعد سنتين
هات مستعمل نظيب للانسر او كورولا او ياريس حاجة منتشرة
لو عاوز ركوبة هات التيدا زيرو
مجرد رأي ..

**Sehsss** · 10-02-2013 10:03 PM

برضه التيدااااااااااا، وعلى فكرة قطع غيارها مش نادرة ولا حاجة ومعمرة جدا، وعفشتها أفضل من اللانسر وتكييفها أفضل وارتفاعها أكبر وصالونها أوسع.... إلخ

**kliken** · 11-02-2013 11:55 PM

تيدا يا باشا و مفيش قلق خالص من قطع الغيار متوفره بكثره

**shaaban2008** · 12-02-2013 03:53 AM

اشتري العربيه اللي تحبها
وبعدين التيدا عربيه محترمه اوي واعتماديه
وتوكيلها محترم زي ما اخوانا هنا في المنتدي بيقولوا

**Dr'AhmZZong** · 12-02-2013 08:36 AM

اللي يقولك إن قطع غيار التيدا مش موجودة يبقى اعرف انه ماشفش العربية اساسا ..

الانسر عربية ممتازة و سوقها كبييييييير بس للاسف فقدت رونقها كعربية اعتمادية بسعر مناسب .. لما تكون بـ 90 100 بالكتير آاااااااه ماشي يبقى أنت ركبت عربية محترمة بـ 100 ألف .. لكن تركب عربية عفى عليها الزمن بـ 130 و 138 كمان و تقولي اعتمادية لااااااااااا .......... فرق السعر ده اللي هو 30 ألف تيجيب بيه قطع غيار لمدة 50 سنة قدام :))

و ده لا يمنع إني بحب الانسر جدا و شايفة عربية ما شاء الله نص نقل بس على ملاكي هههههههه تستحمل أي حاجة :))))