الموضوع: تغيير مساعدين ار بي تبع الضمان مجانا

1. ارسلت رسالة شكوي علي موقع هيونداي مصر يوم 12/1/2013 هيونداى مصر
   "لو مظهرش الموقع كتبت في جوجل نص البحث هيونداي مصر واخترت اول اختيار ظهر وهو Hyundai Egypt"
   تنص علي ان المساعدين الخلفيين بمجرد تحميل العربيه افراد بتنام في الارض
2. وصلني بريد الكتروني يوم 14 /1 ان ابعت رقم الموتور والشاسية ورقم الموبايل
3. اتصلوا بيا يوم 18/1/2013 لاخذ بيانات مكان التركيب وتاكيد الأمر واتفقنا علي ان المكان يكون ابو رواش رغم انه ابعد من قليوب بالنسبه لي "انا من المنصورة" بس اعتقد انه هيكون اقل زحمه "ده تقديري الشخصي"
4. اتصلو بيا تاني يوم 6/2/2013 بيبلغوني ان المساعدين وصلوا ومحجوزين باسمي واحب اركبهم فين وعليا اني اتصل بــ 16101 من الموبايل عشان احجز ميعاد طبعا انا قلت لهم اني فعلا حددت قبل كده انه يكون ابو رواش ولانه سألني تاني دخل الشك قلبي فقلت اتصل اتأكد
5. اتصلت وحجزت يوم 10/2/2013 وكمان اخدت نمرة الفرع ابو رواش عشان اتأكد ان المساعدين موجودين فعلا وكلمت المخزن و اكد ان المساعدين موجودين واني لازم الحقهم قبل ما يروحوا لصاحب النصيب
6. روحت ابو رواش وتوكلت علي الله وصلت خدت دوري
7. الوقت المستغرق بدايه من دخولي وحتي خروجي حوالي 3 ساعات + اني كشفت علي الفتيس لان في نتشفه بين النقله الاولي والتانيه ومش دايما بتظهر فقلت اطمن وقالو لي ان مفيش حاجه

الخلاصه

اولا المميزات:

• بناء علي اني في الضمان ومجرد اني اتصلت وافق علي التغيير بدون كشف علي العربيه وده طبعا انهم عارفين بعيب المساعدين ومع العلم انهم مطلبوش كتيب الضمان
• التغيير بدون مقابل مادي
• الوقت اللي قالوا عليه حوالي اسبوعين أو 3 بكتيره زي ما وعدوني

العيوب:

• التأخير في الدخول واخذ السيارة وتسليمها "المصري هيفضل مصري" او بمعني اصح المماطله

المعلومات اللي عرفتها
اتضح ان المساعدين السابقين زفت لدرجه ان هناك صدادات كاوتش لكل مساعد خلفي طبعا تآكل جزء منهم لان المساعد حمل عليهم لان كأن لم يجد فبهدلهم
طبعا انا معرفتش الحكايه دي إلا لما خرجت ورفعت العربيه عشان اشوف عملوا ايه ولقيتهم متأكلين "معتقدش انهم قشطوهم عشان المساعدين الجدد مثلا" واتفجئت من حاجه غريبه ويمكن انا الوحيد اللي مكنتش اعرفها قبل كده ان المساعدين متركيبن علي شكل 8 وان اليايات مش جواها المساعد لأ كل حاجه لوحدها
وياريت حد يقول لي هو ده نظام تعلييق نظيف ولا سئ واسم نظام التعلييق ده ايه

الأغرب بقي ان الصدادات دي مش متسعره اصلا في هيونداي يعني لو احتجتها مش هتلقيها



النصيحه

• انصح كل واحد مغيرش المساعدين لازم تغيرهم
  ولو متردد ارفع العربيه بالكوريك وبص علي الصدادات اللي موجوده جوه الياي هتلاقيها متأكله وكل ما انتظرت زاد التأكل وكمان مش هتلاقي لها بديل
• متبهدلش العفشه لان كل خبطة بتخزن في الشاسيه لانك كانك راكب عربيه بمساعدين بايظين وده رأيي الشخصي

ودمتم