الموضوع: لية اسعار جينز كار مبااااااااالغ فيها كدة ؟!

بصراحه مش عارف أقول ايه. كل اللي كنت عايز أقوله اتقال وأهم نقطه ان أي عربيه هتنزل بفئه فيها فرش قماش وفئه فرش جلد هتلاقي فرق السعر على الاقل خالص خالص 5 تلاف جنيه وممكن يوصل 15 ألف وشغل جينز كار على حسب مواضيع كتير جدا هنا في المنتدى ممتاز جدا ده غير ضمان 4 سنين محدش تاني هيدي الضمان ده الا لو كان فعلا واثق تماما من جوده الشغل. وخد بالك من نقطه فهمهالي واحد حداد لما كنت بعمل شغل حديد للبلكونات والشبابيك ان الشغل الغالي داخل فيه خامات عاليه والاهم الصنايعيه نفسها. قالي أنا مش بجيب أي واحد خالي شغل وأشغله حداد بيوميه 30 جنيه وأسيبه يهرس في الشغل لكن أنا عندي حدادين صنعتهم الحداده ومش هاخد منك عربون ولو الشغل معجبكش أو لو مجاش في معاده مش هتدفع حاجه وهركبلك الشغل لو عايزه. مع اني مفهمش في الحديد بس اقتعنت بكلامه خصوصا اني مش خسران حاجه ومش هدفع فلوس الا لما استلم الشغل وبعد ما ركبه وبعد كده بقيت أدقق في شغل الحداده في أي شقه عن أي حد من قرايبي حسيت بفرق كبير جدا جدا وعرفت اني كنت هندم جدا لو كنت استرخصت ولعلمكو أنا سمعت أسعار توصل لحد 800 جنيه في المقاوله وواحد تاني قالي 1500 وواحد تاني 2500 والراجل ده أنا دفعتله 3600 جنيه ومندمتش لحظه على الفلوس اللي دفعتها.

ومثال تاني كان مع بتاع الالوميتال كان أغلى شويه من ناس تانيه وقلتله ليه أدفعلك انت أكتر وفيه غيرك أقل؟ قالي الالوميتال نوع كذا اللي عندي هوه نفسه نوع كذا اللي عند أي محل بس فيه فرق كبير في التقفيل واللحامات والاكسسوارات ولو ارتحت في ميزانيه الشغل أقدر أركب عزل ممتاز ميسربلكش تيارات هوا في الشتا وأوكر نضيفه متبوظش كل شويه والسلك ميصديش ولا ينشف ويتقطع الخ الخ. وفعلا لما ناس بتجيلي وتشوف الاوميتال بتشكر في الشغل جدا وخصوصا اللحام اللي بيبقى في الزوايا مش باين خالص وكأن الشباك كله حته واحده.

أنا أسف اني دخلتكو في أمثله ملهاش علاقه بالعربيات بس حسيت انه بيوضح ان لكل شغلانه صنعتها وتفاصيلها اللي ممكن المشتري مياخدش باله منها بس بتفرق معاه كتير بعد الاستخدام.