الموضوع: صباح الخير صباح السياسه اللي تزهق

الواحد حاسس انه لو قالكم صباح الخير
حتقولوله صباح الدستور
خلاص حياتنا بقت منحصره في مرسي والبلد والسياسه والحكومه وسايبين نفسنا ؟؟
رصيدنا بدا يقل عند بعض جدا علي فكره
وعداوات وهميه طلعت بدون مبرر
والمحايدين زهقوا من دخول المنتدي
وانا بطلت اشارك او اكتب حاجه وناس كتير غيري مش انا بس
وناس كتير زهقت لدرجه القرف
هي الناس بتعمل كده ليه في نفسها ؟؟؟
شتيمه وسباب وتلبيخ
زي ما يكون خلاص الناس مبتعرفش تتكلم وثقافتها محدوده فبيرغوا في السياسه
فكرتوني بواحد قريبي كل ما يشوف وشي يقولي مش حتتجوز
في كل الاوقات بيقولها
في كل المناسبات
عندنا او عندهم
لو شافني في الشارع بيقولها
لحد ما ربنا كرمه وبطل يقولها
اصلي كرشته من المحل بتاعي لما كان معدي ودخل يكلمني في الموضوع ههههههههههههه

واحد شتم الريس ولا الحكومه
والتاني مؤيد للريس وللحكومه
واحد بيشتم في المعارضه
والتاني مع المعارضه
ايه لازمتها نخسر بعض ؟؟
حد فيكم لجان اليكترونيه وبيدفعوله ؟؟ اكيد لا
والمقابل الي بياخده مستاهل انه يقلل من نفسه او يشتم او يتشتم ؟ اكيد لا
خسرتم بعض وخسرتم احترام ناس ومظنش ان فيه مكسب
اللي بيدافع بيدافع لنفسه ومحدش حيصقفله
بس الي بيشتم الكل بيزدريه
زمان لما كنا نوقف حد كان بيعمل عضويه تانيه علشان مش قادر يبعد عن المنتدي
دلوقتي لما واحد بيتوقف بيعمل عضويه تانيه علشان يدخل يشتم
حتفضلوا كده كتير ؟؟
مكسبكم ايه ؟؟؟
غيرتوا ايه في البلد بالكلام ده ؟؟
كسبتوا ايه سواء مؤيدين او معارضين
مبقولش لحد متكونش مؤيد او متكونش معارض
بس فيه حدود مينفعش نتجاوزها
مش علشان رايك مش عاجبني تشتمني
مش علشان رئيسك مش عاجبني تهينني او تظن فيا السوء
ما كلنا في مركب واحده مش انت حتوصل وغيرك حيغرق
كلنا يا حنوصل سوا يا حنغرق سوا
اقسم بالله زمان كنت بدخل المنتدي علشان اضيع اكتئابي واقعد وسط الناس
دلوقتي المنتدي بقي مصدر للاكتئاب
محدش مستحمل التاني
كله متربص
كله حاطط السكينه ورا ضهره ومستني اللي قدامه يغلط علشان يمثل بيه
يا ريت محدش يرد ويقولي اصل فلان قال كذا علي الموقف السياسي المعين علشان كده رد الفعل بيكون كذا
ودا حيؤكدلي ان الناس مبتعرفش تتكلم غير في اللي بتسمعه في السياسه
ولا حد حلل
ولا حد فكر
مجرد نقل كلام برضه وخلاص
يا ريت حد يقولي عمل ايه لنفسه ولبيته
ماهو اللي حيعمله لنفسه برضه حيعود بالنفع علي البلد
خسرت كام واحد بسبب السياسه ؟؟؟
اهنت كام واحد ؟؟
كسبت ايه ؟؟؟
يا ريت نفوق لنفسنا ونحاول نعمل حاجه ملموسه بدل ما الحرب دايره ومفيهاش طرف كسبان ولا طرف خسران
يا الكل حيكسب يا الكل حيخسر

كلامي مش موجه لحد بعينه لاني معنديش عداوه مع حد ولا مؤيد لحد ولا متحزب ضد حد
كلامي للناس اللي خسرت وبتخسر بعضها