وعليكم السلام ورحمة الله
أولاً أنا مش خبير بس هرد عليك باللي أعرفه
أنتاج الميتسوبيشي لانسر البومة المفروض أنو يكون أنتي 2008 مع نزول الشكل الجديد اللي هوا القرش.
ولكن بما أن الشكل الجديد القرش لم يحظي بشعبية كبيرة في السوق المصري وبما أن الوكيل نزله بسعر خرافي فا دا خسر العربية جامد ومقارنة بسعر البومة اللي كان سوبر ممتاز لعربية ياباني وتقفيل ياباني من الساس للرأس فكانت صفقة رابحة.
وطبعاً عشان الوكيل ميخسرش كل حاجة نزل البومة تاني لموديل 2008 جنب الانسر الشارك
وكانت في زروتىة في السوق وسوء فهم بسبب أنك تلاقي في الجرنان أو في كتالوجات المعارض
لأنسر 1300 ولانسر 1500 ولانسر 1600
بدون توضيح أيه دي وأيه دي مع العلم أن اخر فئتين ال 1500 وال 1600 كان فيهم حوالي 3 فئات تانين للفول أوبشن وفتحة السقف والكلام دا..
وطبعاً ال 1500 الوحيدة للي فاهم هيا الشارك (الشكل الجديد) وال 1300 وال 1600 هيا البومة
نيجي بقي لنقطة
أنت مفكر ان التجار عندهم عربيات قديمة وبيبيعوها علي أنها جديدة وموديل السنة, دا غلط
لأن العربيات ليها ورق جمارك بيكون مكتوب فيه تاريخ شحنها من بلد المنشأ وتارخ التصنيع,
والحقيقة أن العربية لسه بتنتج لحد أنهارده لأنها مطلوبة في الميدل أيست عمتاً, معرفش لو كانت بتتصدر لدول تانية في اوروبا أو أسيا.
فامفيش خداع, ولا حد هيقدر يديك رقم في الغالب..
لأني سألت نفسي السؤال دا كتير وسألت ناس من سنة 2008 لحد أول السنة دي 2013
ومفيش أجابة, فمتخليش الموضوع دا يقلقك..
ومعلومة مني بقي عال ماشي, أنا أمتلكت العربية سنة 2007 وكانت موديل السنة 2007
1300 سي سي مانيوال, وقعدت معايا ل 2010
لو كنت بتقول عال عربية دي خارقة من غير تريقة وأنا عارف انك مش بتتريق, فاهي سوبر خارقة ومش خارقة بس.
العربية انا عملت بيها 72 الف كيلو في التلات سنين دول, ومكنتش بتطلب مني غير إني أغير لها زيت وفلتر زيت وبحط بنزين بس.
والله لا طلبت بوجيهات ولا تيل فرامل لحد 70 الف كيلو.. مع أني كنت بجري بيها علي طول وكانت كل نقلاتي قبل الريد لاين.!
مقارنة بالعربيات الاوروبي زي اللي بيجو اللي معايا أو الاوروبي كله عمتاً اللي لازم تعمل لها الصيانة في مواعيدها وتغيرلها قطعها في مواعيدها وإلا هتقرفك في السواقة فالبومة كانت جنة الصراحة.
وأنا لو كنت إلاقيها دلوقتي بنفس السعر اللي أشتريت بيه أيامها كانت بحوالي 88 الف كنت هشتريها تاني بدون تردد.. لانك لما بتشتري عربية ياباني وتقفيل ياباني علي عكس النيسان الصني التقفل مصري مثلاً فأنت بتضمن أنك هتعد عال أقل 3 سنين من غير ما العربية تبدأ تطلب منك مصاريف أو تقرفك..
لكن مقارنة بسعر السوق دلوقتي وأول فئة بتتكلم في حوالي 113 الف اخر سعر سمعته عنها واللي انا كنت شاري بيه من حوالي 6 سنين ب 88 الف, فانا اعتقد أنو مش صفقة رابحة أني أشتري عربية كانت ب 88 من 6 سنين بالسعر دا أنهارده,, لكن تاني مقارنة بالعربيات اللي بتتباع جنبها في السوق سواء كوري او صيني او ياباني فهيا تعتبر صفقة رابحة حتي لو كانت أمكانياتها في الكامليات مش زي الكوري الجديد فاجودة الياباني أنت هتحسها عال طريق وهتقدرها أكتر مع الزمن لما تلاقيها زي ما هي مش بتقل مع الوقت..
كمان الوكيل الجديد دايموند موتورز تقريباً اللي أخد وكيل ميتسوبيشي مؤخراً لاقي انها سلعة مطلوبة وناجحة, وأعتمادية جداً ومشاكلها تكاد تكون معدومة مقارنة مع عربيات كتير جديدة أوروبي أو غيرة. فالوكيل حب يكسب منها مع قلة شعبية الشارك فرفع سعرها بشكل غير مرضي من وجهة نظري ليكون في نظير السيارات الكوري, وانت يبقي أمامك الأختيار لو عايز كوري أشتري, لو عايز ياباني بنفس السعر أشتري..
أتمني أكون جاوبتك, وأخر سنة تنزل ليها أعتقد دي في أيد الوكيل أو في أيد المعارض اللي بتطلب من برة طول ما الشعب لسه بيطلبها
الشعب يريد لانسر بومة.. وأنا كمان..
المفضلات