موضوع مهم عن ثبات الفيرنا

**ramyworm** · 19-02-2013 05:03 PM

انا شايف الناس كلها بتتكلم وتشتم في ثبات الفيرنا مع اني معايا الفيرنا ومش شايف انها للدرجة اللي بيقولوا عليها حد يقولي هي الفيرنا اللي معايا غير اللي مع الناس مثلا .
اولا عشان نبقى متفقين لما نقارن العربية لازم نقارنها بعربيات في نفس فئتها واللي هما اللانوس واللوجان والاسبرانزا بس كدا عشان الاقي واحد راكب هوندا سيفيك ولا مرسيدس ونازل يتكلم على الفيرنا ويقولك ثباتها زي الزفت . وفي حالة المقارنة مع فئتها مافيش حد يقدر يقول على ثباتها سئ جدا بالمقارنة مع فئتها
ثانيا لو الشخص اللي بيشتم في الفيرنا بيتكلم عموما وبيقارنها بكل العربيات احب اقوله ان زي ما في عربيات الماني وثباتها احسن منها بمراحل في عربيات ثباتها اسوا من الفيرنا بمراحل والفيرنا تعتبر عربية متوسطة في الثبات
وابسط مثال عربية زي التريوس الجديدة ثباتها مرعب بجد مقارنة بالفيرنا مع ان تمنها تقريبا ضعف تمن الفيرنا
فبلاش كل الناس تردد الفيرنا ثباتها وحش وخلاص وتلاقي نصهم ماركبش الفيرنا ولو ركبها تلاقيه ماركبش عربيات تانية اصلا
معلومة بس بسيطة انا كل يوم رايح جاي بالفيرنا على طرق سريعة عشان شغلي و العادي بتاعي 140/ 150 و الطريق كله مطبات هوا وطبعا اكيد جربت امشي بيها اكتر من مرة 190 و 200 بس مانصحش حد يجرب الكلام ده عشان فعلا خطر والعربية خفيفة جدا على السرعات دي والعربية ستوك مافهاش حتى جنط على العكس تماما وانا راكب التيريوس مش بعرف اكسر فيها ال100 ولو وصلت لل 120 كدة ده اخري وببقى مرعوب يمكن المرة الوحيدة اللي زودت فيها ل 140 كان على طريق اسكندرية القاهرة الصحراوي عشان متسفلت كويس
ياترى مين متفق معايا في الكلام ده

**S O P H O S** · 19-02-2013 05:09 PM

بعيدا عن ان العربية خفيفة او الثبات قليل
حضرتك بتقول العادي 140 او 150 ياريت حضرتك تراجع نفسك فالسرعة دي لان العربية مفيهاش اي وسائل امان
وهي فئة مش للسرعة دي فرأي اتمني تتقبل كلامي
وربنا يستر طريقك
تحياتي ..

**dolly13** · 19-02-2013 05:13 PM

اوافقك الراى تماما وفعلا ياريت تراجع نفسك فى موضوع السرعة لان الغلطة مع الفيرنا نتيجتها مش حلوة خالص ويارب انا كمان اسمع الكلام ده لانى غاوية سرعة كدة برده

**AlGazar2** · 19-02-2013 05:15 PM

يا باشا الفرق الى بتحسه مع التريوس ده عشان العربيه عاليه عن الارض و عرضها قليل و طولها قليل برضه فمش هتلاقيها بتحسسك انها ثابته على الطريق زى معظم العربيات العاليه

الفيرنا بالنسبالها واطيه فمش هتحس الكلام ده كله بس لو فى ملفات بقى و طريق مش عدله هتلاقى اللانوس و اللوجان على الرغم من علوها و الاسبيرانزا بتتفوق على الفيرنا لانهم اتقل منها

**Sehsss** · 19-02-2013 05:19 PM

ماهو أي عربية لو في خط مستقيم هاتبقى ثابتة

**S O P H O S** · 19-02-2013 06:29 PM

المشاركة الأصلية كتبت بواسطة Sehsss

ماهو أي عربية لو في خط مستقيم هاتبقى ثابتة

تمام الا فحالة ان الجو هواء وبتراب شديد فليلة شتاء
وده مش كتير فمصر طبعا ولازم طريق مفتوح ..

**AlGazar2** · 19-02-2013 06:47 PM

المشاركة الأصلية كتبت بواسطة amrelsaqqa

اللانوس كوزن مش اتقل من الفيرنا ، بالعكس

العملية عملية شاسيه وعفشة

اعتقد ان وزن اللانوس اكتر من الفيرنا او الاتنين زى بعض
و تصميم الشاسيه بتاع اللانوس فى اعتقادى انه احسن من شاسيه الفيرنا و العفشه كذلك
و الاتنين عفشه خلفيه مالتى لينك

**amrelsaqqa** · 19-02-2013 06:57 PM

المشاركة الأصلية كتبت بواسطة AlGazar2

اعتقد ان وزن اللانوس اكتر من الفيرنا او الاتنين زى بعض
و تصميم الشاسيه بتاع اللانوس فى اعتقادى انه احسن من شاسيه الفيرنا و العفشه كذلك
و الاتنين عفشه خلفيه مالتى لينك

لا في فرق حلو في الوزن ولصالح الفيرنا !
بس هى اللى مش ثابتة نعمللها ايه بقى :D

وشاسيه اللانوس افضل لانه في الاساس شاسيه اوبل استرا 92

والاتنين عفشة dual link و ليس multi link وشتان بينهما :)

مالتى لنك ده للناس المتدلعة اللى عايزين ياخدوا ثبات ونعومة في نفس الوقت وده طبعا مش في الفئة دى خالص
الكلام ده في مازدا في اوكتافيا في بيجو ....... اااااااه تصور جعت على رأي اشرف عبد الباقى ههههههههههه

**miceg** · 19-02-2013 07:03 PM

اولا في نقطة مهمة لازم تكون واخد بالك منها
الثبات حاجة لو ماشي في خط مستقيم
والثبات حاجة تانية لو ماشي خطوط متعرجة بالبلدي كده بتغرز بين العربيات
يعني مافيش مانع انك تمشي على السرعة 140 او 150
رغم اني منصحكش نهائي لعدوم وجود وسائل أمان نهائي
لكن صعب انك تمشي وانت بتغرز مابين عربيات ولو سلمت فوحده مش هتسلم فالثانية .
ده انت لو مسكت فرامل حتى مش هتعرف تكنترول العربية .
وربنا يكفيك شر الطريق