الموضوع: هبعتلك واحد ياخدك !!

السلام عليكم ورحمه الله وبركاته

طبعا العنوان غريب اعذوني
الحكايه وما فيها اني كنت ماسك جريده الوسيط بتاعت الدلتا بتصفحهاولفت نظري في قسم الوظائف
اعلان عن وظيفه في الزقازيق ده كان نص االاعلان
وكاله أجنبيه (خالوابالكم من أجنبيه دي ) في الزقازيق تطلب شباب للعمل في مجال التسويق بدخل يصل الى 5000ج وترقيات يشترط امتلاك سياره خاصه وحسن المظهر

تمام كده قلت اتصل اشوف ايه ظروف الوظيفه ام 5000 دي في الزمن ده
وقد كان اتصلت وطبعا انا متصل بوكاله أجنبيه بقه فمتخيل ان الصوت غالبا هيكون صوت ملائكي ناعم
وكانت الصدمه الاولى انه راجل قلت عادي وكان نص الحوار كالتالي

انا:سلام عليكم
هو: ايوه (بطريقه الصنايعيه مع التقدير للصنايعيه)
انا: طبعا اتصدمت من الصوت والطريقه بس قلت نكمل للاخر قلت له حضرتك مش عاملين اعلان عن وظفيفه؟
هو:سكت كده وبعدين قالي ايوه أؤمر
انا: طيب شركه ايه وطالبين ايه بالظبط
هو: انت اشتغلت في المجال ده قبل كده
انا:مجال ايه حضرتك مش كاتب اي بيانات في الاعلان اصلا بسلو تقصد التسويق عموما يبقى ايوه
هو:طيب كويس خلاص تعالا بكره
انا:طيب حضرتك اسم الشركه ايه او مجالها ايه يعني
هو:لما تيجي هتعرف
انا:يا فندم يعني اجي وانا حتى مشعارف اسم الشركه او شغال في ايه طيب
هو: تعالا بكره وانت تعرف كل حاجه
انا:طيب اجي ازاي العنوان ايه يعني
هو:الزقازيق
انا:كان نفد صبري بصراحه ايوه ياباشا فيييييييييييين في الزقازيق
هو:حي غرب
انا: يا مصبر الوحش فين في حرب غرب يعني انا معرفش اسم الشركه اصلا يبقى هوصلها ازاي
هو:تعلا بس حي غرب وكلمني
انا: اكلمك !! طيب وبعدين
هو: هبعتلك واحد ياخدك
انا:طيب متقولي العنوان وابعتلك انا واحد ياخدك وروحت قافل في وشه


ايه ده بقه ؟؟
انامش لاقي تفسير غير انهم طالبين ناس معهم عربيات ويقلبوا منهم العر بيات
وحاطين اعلان مغري وكاله اجنبيه ومرتب 5000
ولا ايه رأيكم !!