الموضوع: إنا لله وإنا إليه راجعون

السلام عليكم أخوانى الكرام

أسألكم الدعاء لصديقى محمد شعيب بالرحمة والمغفرة ودخول الفردوس الأعلى وأسأل الله أن يجمعنى به فى الفردوس الأعلى مع النبيين والمرسلين والصديقين

محمد شعيب من بلدى وكان شخص طيب جدا وودود وبرئ زى الأطفال بالضبط عمرى ما شفت أبسط من محمد وأكثر منه رضا بحاله ياااااااااااااه على القناعة اللى كان يتحلى بها

كان يؤدى فروض الله كاملة مكنش لسانه مكنش بيطلع الغلط إطلاقا عمرى ما شفته بيشتم طول معرفتى بيه

طول عمره صاحب مرض الله يرحمه كان مريض بالقلب عمل عملية صمامات ونجحت وعاش بعدها بحوالى 6 سنين بدأ يتعب تانى جات له جلطة فى المخ وعانى منها عدة أشهر وتعافى جزئيا ولكنها أثرت عليه جامد

بعدها جاتله جلطة تانى وتعب جامد وراح المستشفى ومكنتش أعرف إنه تعبان عرفت بعدها بكام يوم..... رحت زرته واطمنت عليه وكنت فرحان قوى أنى شفته كنت خايف أحسن يموت

بعد مارجع بيته رحت زرته مرة وبعدها غبت فترة وانشغلت فى هموم الدنيا والله مشاكلى كتيرة فى حياتى

كل شوية أقول لنفسى أقوم أروح له وأكسل وكل ما افتكر كنت بكسل وأقول هيروح منى فين مهو معايا ولما أفوق لنفسى شوية هبقى أروح له

محمد تعب امبارح وجاله نزيف فى المخ وبابا راح وداه المستشفى معرفتش غير بعد مابابا جه من المستشفى بالليل واليوم دا مكنتش موجود فى البيت من الصبح من سوء حظى

ولكن روحه صعدت إلى خالقها وأنا النهاردة لسة جاى من مراسم دفن صديقى العزيز ...... بس أنا حاسس بذنب كبير يا جماعة والله كان نفسى اشوفه والله ندمان أشد ندم

أنا لو كنت قابلته قبلها مكنش زمانى تعبان بالشكل دا

أنا حاسس إن ربنا بعدنى عنه عشان هو أحسن منى مش عارف ليه بيراوضنى الأحساس دا إنى مكنتش أستاهل أنى أشوفه
حتى لاحظت الناس اللى كانوا معاه فى آخر أيامه هم حفظة القرآن وكانوا بيعلموه يحفظ قرآن وأحاديث فى عز مرضه مكنش بيفوته فرض

يارب سامحنى وأغفر لى وأدخلنى معه جنة الفردوس

يا جماعة أنا زرته بالفعل لكن قعدت فترة كبيرة مسألش عليه بس فيه مرة كلمته ووعدته أنى هجيله ومحصلش نصيب ونسيت وفاتت الأيام ... يارب صبرنى والله العظيم أنا مش مصدق الموقف اللى أنا فيه صعب جدا

كل ما أكلم حد يقول لى عادى ناس كتير بتموت من غير ما نشوفها وبيبقوا أقرب ما لينا وكل واحد قعد يسرد لى قصة مر بيها شبيهة

وبعدين أنا كنت فاكر إن حالته مستقرة نوعا ما مكنتش اعرف إن ممكن يحصله كدا أو مكنتش اتوقع بس كنت عارف إنه على طول بيتعب الله يرحمه ويسامحنى


لما تعب المرة اللى فاتت كنت قاعد أدعى ربنا يااااااارب أشوفه يارب أشوفه وفرحت لما رحت زرته وشفته

المرة دى دعيت ربنا وقلت يارب أشوفه على أمل أن كنت هزوره النهاردة لكن الله يرحمه ويحسن مثواه والله يا جماعة شخص برغم كبر سنه لكنه برئ زى الأطفال

فى عز مرضه كان قنوع جدا وبيضحك ..... أنا اتعلمت منه دا أنا عشان حصلت ظروف مخلتنيش أقبل فى كلية شرطة خربت الدنيا زمان وبهدلت نفسى واتعقدت ودخلت فى متاهات كتيرة وهو فى أقصى ظروف مرضه كان بيضحك وفرحان طالما قادر يضحك لا حول ولا قوة إلا بالله

حتى بنت خالته اللى كان بيحبها مرضيش يصارحها بحبه للزواج وقال لى مرضتش عشان عارف نفسى وهى قالت له إنه بتحبه بس هو من حبه فيها مرضيش عليها إنها تستحمله وهو تعبان يا الله ربنا يبدله بأهل خير من أهله وبزوجة لم يراها من قبل على وجه الدنيا


الغريب فى كل دا إنى مافيش دمعة من عيونى نزلت