تحيه واجبه لمركز اوتو ايجبت للصيانه

**noon_eg** · 05-03-2013 04:15 AM

الحقيقه انا كتبت هذا الموضوع لاعطاء كل ذى حق حقه

منذ ان بدات فى عمل صيانات لعربيتى نيسان صنى موديل 2010 فى شهر اغسطس 2010 للاسف لم اشعر باحترافيه فى اعمال الصيانه

بل و كنت اشعر ان مركز الصيانه يحاول التملص من وجود بعض العيوب بالعربيه ( اما لانه يحتاج لتغيير حاجه مكلفه ومحتاجه وقت - ضفيره مثلا - أو لانه عيب صعب اكتشافه وبالتالى يكون مصدر حرج لهم ) والحاجتين دول حصلوا معايا فى احد مراكز الصيانه بدون ذكر اسمه

المهم انى قررت اجرب مركز صيانه اوتو ايجبت ابو رواش بعد افتتاحه بمده قصيره و الفضل فى ده يرجع للاساتذ / احمد مصطفى اللى كان حلقه وصل ممتازه بين اعضاء المنتدى واوتو ايجبت سواء مبيعات او صيانه

المهم علشان ما اطولش عليكم

اول انطباع بعد صيانه 30 الف فى ابورواش ان كل حاجه اتعملت بدقه تامه بدون اى معرفه ولا توصيه ودى نقطه مهمه جدا - كذلك كانوا عاملين عرض اول 3 شهور الصيانه مجانيه ومشاريب مجانيه و واى فاى والمكان جميل وواسع وبتشوف العربيه وهى فى الورشه

تانى انطباع انهم بيتابعوا العميل بعد الصيانه باهتمام شديد

فى صيانه 50 الف اشتكيت من العفشه وقاموا بتغيير المقصات فى الضمان من تلقاء انفسهم بدون مماطله او تاخير - تحيه واجبه للمهندس الخلوق / محمد رفاعى - وهى دى اول مفاجأه لى لان تكلفه المقصات 3700 جنيه

اشتكيت من العفشه تانى فى صيانه 70 قاموا بتغيير قاعده موتور وجلده تراب مساعد خارج الضمان بتكلفه حوالى 650 جنيه
وقالوا لى ان علبه الدركسيون محتاجه تغيير وسيتم تغييرها فى الضمان اول ما توصل من المصنع لانها غير موجوده وتكلفتها حوالى 4500 جنيه

تابعتهم لمده اسبوعين واول ما وصلت حجزت ميعاد وذهبت بوم 3-3-2013 وتم تغيير العلبه وبعد كده العفشه بقت ممتازه جدا - تحيه واجبه للمهندس المحترم / محمد درويش

طيب انا ليه باكتب دلوقتى وكنت كاتم فى قلبى طول الفتره اللى فاتت ؟

لان فيه توكيلات كتير مش بترضى تعترف بعيوب فى العربيه وحتى لو اعترف بالمشكله يقول لك التصليح خارج الضمان وتدفع مبالغ كبيره

اما نيسان واتوا ايجبت على وجه الخصوص فضربوا لى مثل فى كيفيه ارضاء العميل بجد

انا باكتب هذا الشكر الواجب لهم بعد ما انتهت فتره الضمان بتاعت العربيه تقريبا - مش فاضل غير شهرين - وغالبا لو احتجت حاجه من التوكيل بعد كده حتكون خارج الضمان - بمعنى اصح انا مش حاكون محتاج انى اتملقهم او امدحهم خالص

الخلاصه لما تلاقى حد بيعاملك بامانه بتفرق معاك كتير وتحس انه مهتم كانها عربيته

اتمنى ان باقى مراكز صيانه نيسان وغيرها من الماركات المحترمه انها تحذوا حذو هذا المركز المحترم لتحوذ اعجاب العملاء اللى من النوع بتاعى - ما بيعجبوش العجب ولا الصيام فى رجب -

والسلام عليكم ورحمه الله وبركاته