الموضوع: تجربة تفريغ نص بولو كلاسيك فى ابيزا 98

بسم الله الرحمن الرحيم

السلام عليكم ورحمة الله وبركاته

اسمحولى انقل لكم تجربتى فى تسقيط نص بولو كلاسيك (صالون) فى عربيتى ابيزا وده هيكون على كذا جزء لأن تقريبا نقلت كل مسمار فى العربية

الجزء الأول : ما قبل الشراء

فى البداية احب اعرف نفسى للأعضاء الجدد ونبذة صغيرة عن مواصفات عربيتى ومواصفات نص البولو

أنا اسمى كريم

عربيتى سيات ابيزا موديل 98 وشاريها من شهر 6/2012 بموتور 1000 سى سى 50 حصان وزجاج كهرباء امامى مع وحدة رفع ومرايات كهرباء فقط وكانت عاملة 104 ألف كيلو اللون اسود دواخل فبريكة بدون باور وبدون تكييف وجنوط الفبريكة مقاس 13 بوصة

تقرير عن حالة العربية قبل التجربة

بعد ما اشتريت العربية تقريبا بأسبوع جابت منى موتور وبعدين أشتريت موتور 1400 سى سى كامل بالفتيس والضفيرة والكونترول وركبته بس للأسف كان برده من غير تكييف وباور وكان 60 حصان وده موضوع انا كنت عامله عن تسقيط الموتور ده:

كنت فاكرو صوت تاكيهات واتارى الابيزا 98 مافيهاش تاكيهات

بصراحة الموتور ده كان جميل وقوته معقولة تناسب داخل المدينة، وفى السفر مش وحش
وكنت فى حرفيين القاهرة الجمعة اللى قبل اللى فاتت وراجع بالليل على الصحراوى 160 وكنت على 4100 RPM مع العلم ان الموتور ده بيطلع أقصى قدرة ليه عند 4700 RPM يعنى بيقفل ال 170 مرتاح وبالنسبة لأعطاله فأنا معملتش فيه أى حاجة من ساعة ما اشتريته فى شهر 6/2012 الى الان غير انى غيرت سير التقسيمة والدينمو لما كنت بسقطه وغيارين زيت لأنى عامل بيه تقريبا 10 ألاف كيلو ومغيرتش حتى البوجيهات بتاعته.

بس أنا بحب الجرى + انى كنت عايز اركب تكييف وباور,
كنت ناوى اعمل تعديلات فى الموتور تزود قوته وكنت ناوى اركب عليه تكييف وباور بس كان فيه مشاكل كتير بتقابلنى بتخلينى معملش كده

مبدأيا أى لعب فى أى موتور بيقصر من عمره الافتراضى وبيكون overload عليه وهتفرح بيه شوية وبعدين هيطير منك

ثانيا: عشان أركب باور لازم أغير الاسكترا واجيب خراطيم باور وطرمبة باور وخزنة زيت باور (هتخوشلك فى 1200 جنيه)

ثالثا: عشان أركب تكييف لازم اجيب كباس وتلاجة وسربنتينة وخراطيم ومواسير وزراير طابلوه وشغل عك وانا مش بحب كده (وهتخوشلك فى 2500 جنيه)
وهيكسحلك الموتور لأن كونترول الموتور متبرمج أنه نازل من غير تكييف يعنى برده هيكون overload عليه وهيطيروه بدرى بدرى وكمان مش هيكيفك

بدأت اتخنق وفكرت كتير انى ابيع العربية واشترى واحدة كاملة او انى اجيب نص كامل مكيف وافضيه عندى, الموضوع ده بأة اخدله بتاع 4 شهور تفكير لأن كل واحد مننا ليه مدرسة ووجهة نظر وأنا من النوع اللى يحب ياخد أراء ناس كتير وبعدين يقرر الأفضل والأنسب ليه

انا قررت انى ادخل فى حوار النص ده واشيل من دماغى فكرة المصاريف دى وانى مش هلاقى اللى صرفته لأنى باختصار من النوع اللى بيركب العربية سنين مش اللى بيبيع ويشترى كل شوية والحظ خدمنى فى الموضوع ده ان عندى واحد صاحبى معاه ابيزا وكان عايز يشترى موتورى وده قلل التكلفة عليا شوية

رحلة البحث عن الموتور الأنسب لسيارتي

بدأت رحلة بحثى عن نص كامل مكيف فى الاسكندرية ونزلت القاهرة ويكون ابيزا او كوردوبا عشان استفاد بكل محتواه من صاج وعفشة وتابلوه وفوانيس بس فى الاخر استقريت على نص بولو كلاسيك (صالون) وده لكذا سبب:

أولا: عفشة البولو الكلاسيك مختلفة عن البولو العادية (بطاحات – أكسات – قنطرة – مقصات - صدر) لأن البولو الكلاسيك أعرض من البولو العادية ولكنها متطابقة تماما مع عفشة الابيزا والكوردوبا (يعنى مش هضطر انى اشترى حاجة من الحاجات دى)

ثانيا: معظم الابيزا والكوردوبا اللى بتيجى استيراد بتكون 1400 سى سى وطبعا مش هشيل موتور 1400 سى سى عشان احط واحد 1400 سى سى عشان التكييف

ثالثا: رفارف وفوانيس وكبوت البولو الكلاسيك نسخة طبق الاصل من ابيزا 98 و 99 وبالنسبة للشبكة والطارة يركبوا بس شيل علامة الفولكس
وبالنسبة للتابلوه برده زى الابيزا بس امبير الحرارة عليه ارقام درجة الحرارة وزرار الانتظار بيكون على يمين ذراع المساحات تحت زرار سخان الزجاج الخلفى بعكس الابيزا بيكون على زور الطارة
وبالنسبة للأكصدام برده يركب بس الكساحة والهواية اللى فى المنتصف شكلهم مختلف وهو ده الحلو اللى فيهم انهم شكلهم مختلف (وجهة نظرى)
وبالنسبة للطوربيدو برده شكله مختلف بس بيركب عادى

والغريبة ان كل حاجة مكتوب عليها Made In Spain مع انها فولكس بس ده دليل على انها كوردوبا مع اختلاف العلامة


مواصفات نص البولو الكلاسيك

الموديل: 1998

اللون : رصاصى

عدد الكيلومتر: 82 ألف كيلو

الموتور: 1600 سى سى 8 صباب 101 حصان عند 5800 RPM وعزم 140 نيوتن عند 3500 RPM 74 كيلو وات

ملحوظة: الموتور ده الكود بتاعه AFT وده بينزل فى الابيزا والكوردوبا والتوليدو والبولو الكلاسيك (مش بينزل فى البولو العادية) والجولف 3 والفينتو والباسات وبس


الكماليات

تكييف + باور + وسادة هوائية للسائق فقط + زجاج كهرباء أمامى + ايموبلايزر + طارة متحركة

نظام التعليق: مساعدين غاز KYB Excel G

ودى مقارنة بسيطة بين الموتور ال 1400 بتاعى وال 1600 بتاع البولو الكلاسيك



ملحوظة: يوجد اربع انواع من الموتور ال 1600 بيركبو فى الابيزا من موديل 94 الى 99




قبل ما أشترى النص جبت معايا ميكانيكى و دورناه على الأرض (النص معاه مفتاحه) والحمد لله دار من أول مرة مع انه اكيد بقاله سنين مدارش وكمان حطينا البنزين فى البوابة مباشرة لأن طبعا مفيش طرمبة بنزين وكمان مفيش علب شكمان (وده معناه ان ماشاء الله حالته كويسة)

ملاحظات علي النص قبل التجربة

1. خرطوم الردياتير العلوى والسفلى مقطوعين عن قصد وده عشان يفضوا المياه اللى جواه قبل التخزين عشان متاكلش فى الردياتير

2. زور مقاس الزيت مكسور لأنه بينشف عشان بلاستيك

3. كابلات البطارية الموجب والسالب أطرافهم مقطوعة ومفيش اواطيش

4. الرفرف الشمال مخبوط وفانوس الاشارة اليمين مكسور حتة صغيرة وهوايات الشبورة فى الاكصدام مش موجودة وكل ده بسبب النقل والتخزين

شيلت النص بالكلارك على نص نقل ووديته للميكانيكى وكان قايللى انه هياخد من اسبوع الى 10 ايام لأنه هو اللى هيعملى كل حاجة (ميكانيكا وعفشة وكهرباء)

أسيبكم مع شوية صور للنص












لمزيد من التفاصيل والصور أقرأ
تجربة تفريغ نص بولو كلاسيك فى ابيزا 98 (الجزء الأول)

الجزء الثاني : تركيب الموتور والتكييف والعفشة

الميكانيكى كان متفق معايا انه هينقلى كل حاجة من النص حتى الكليبسات

اول حاجة عملناها اننا فضينا حوض عربيتى بالكامل وده لكذا سبب:

أولا: انه ينضف الحوض مطرح الطينة اللى كانت جواه عشان يشتغل على نضافة
ثانيا: ان يركب اى حاجة يفكها من النص مباشرة عشان مفيش حاجة تتنطر وعشان الحاجة متتبهدلش

الخطوة الأولي : الحوض

طبعا الاكصدام والصدر بيتفك وبيشيل الموتور بالعافشة قطعة واحدة


ودى صورة المرحوم




وبعدين بيشيل ضفيرة الحوض والكونترول
الحاجة الوحيدة اللى مشالهاش من الحوض هى مواسير الفرامل لأن شيلها ممكن يبوظها + انها مش بتبوظ يعنى مش بتحتاج تتغير

الخطوة الثانية : الصالون

بيشيل كرسى السواق وعصاية الفتيس والقاطمة وبيفك هوايات وعدادات والفبر عشان يفك التابلوه


الخطوة الثالثة : التجهيز

يعني ايه التجهيز ؟؟؟
يعنى انك تتأكد ان كل حاجة هتركب من النص الى في عربيتك بدون مشاكل!!!!
طبعا حد هيقولى انت بعد ماعملت كل ده لسه هتتأكد؟؟؟
هقوللو ان عربيتى نازلة من غير تكييف لكن النص ده مكيف يعنى لازم اتأكد من مداخل ومخارج مواسير التبريد من والى الصالون

• معلش نقطة كده بره الموضوع: مفيش حاجة اسمها عربية مجهزة ان يتركبلها تكييف
الكلام اللى جاى ده هيبينلك التكييف بيركب فبريكة ازاى وانت احكم


الخطوة الرابعة : تركيب التكييف

مبدأيا لازم نقول التكييف بيتكون من ايه:

1. كومبريسور (كباس)
الموتور لما يكون نازل بكباس غير نفس الموتور لما يكون من غير كباس

نستفاد من الكلام ده ان الكباس لازم يكون معاه كونترول نازل فيه اوبشن التكييف عشان يفهم اللى بيحصل لما بتشغل التكييف

2. سربنتينة
ودى بتكون مع الردياتير ولازم الردياتير يكون الكبير بأتنين مروحة وبالتالى لو انت الريدياتير بتاعك الصغير يبقى مش هتغيره لوحده, ده انت هتحتاج كمان تغير الصدر اللى بيشيله لأن القواعد مختلفة




وطبعا بيكون معاه مواسير التكييف اللى ممكن برده تدوخ عليها
وده الفرق بين الصدر القديم والجديد
خد بالك من القواعد اللى بيركب عليها الردياتير



3. تلاجة (كويل)
ودى لازم تيجى مع الزراير بتاعت التابلوه

وده البلاور القديم



4. فتحة دخول المواسير
نيجى بقى لأهم نقطة فى الموضوع اللى هى فتحة المواسير اللى داخلة من الحوض للتلاجة وفتحة الفايظ

فتحة المواسير بتكون فبريكة مش موجودة فى العربيات اللى مش مكيفة بس بتكون بارزة ومتحددة عشان لو حبيت تقصها زى ما أنا عملت, وفتحة الفايظ كمان بتكون نفس الموضوع



حاجة تانية مهمة وهو العزل اللى جوه الصالون

طبعا مفيش اى اختلاف وكمان العزل بتاع ال 1000 زى 1600 زى 2000 سى سى زى البولو زى الابيزا

ودى الصورة بعد ما التلاجة اتقفلت



على فكرة الميكانيكى مرداش يخلع اللباد من النص لأن خلعه هيتلفه لأنه ملزوق + ان اللباد عندى كله سليم

ودوول زرارين التكييف اللى مش موجوين فى العربيات اللى مش مكيفة




وبكده نكون خلصنا جزئية التكييف, ومتهيألى اى حد معاه عربية مش مكيفة وعايز يكيفها هيعمل حاجة من الاتنين
يشترى نص وينقل كل حاجة فيه لعربيته
او يبيع عربيته ويشترى واحدة مكيفة فابريكة


الخطوة الخامسة : الكهرباء

بالنسبة لشغل الكهرباء:
مش هتكلم عليه كتير لأن مجمله بسيط بس شغله صعب ولازم واحد بس اللى يشتغل فى الضفيرة من الاول للأخر عشان يبقى حافظ بيعمل ايه
عموما علبة الفيوز واحدة فى كل الابيزا والبولو لكن الضفيرة هى اللى بتختلف حسب الاوبشن اللى نازلة بيه العربية

فيه كذا حاجة قابلتنى فى الكهرباء:

كان فيه كبارى كتير معمولة وانذار بلدى ووحدة رفع بلدى وشغل عك
حاولت ارجع سنتر الفابريكة بس للأسف لقيت كابل طرمبة الهواء بتاعت السنتر مقطوع

النص ده نازل من غير فوجات فبالتالى الضفيرة مفيهاش فيش للفوجات والزرار مفيهوش اوبشن الفوجات

أما بالنسبة للتابلوه فكان الاختلاف فى ان عربيتى مفيهاش وسائد هوائية لكن النص فيه واحدة للسواق ودى ليها سيستم عشان تركب يعنى مش مجرد طارة بتروح تشتريها من عند بتاع الاستيراد وتقول دى فيها طارة اير باج
طبعا الطارة تركب عادى جدا بس الاير باج عمرها ما هتفتح حتى لو جبت وش العربية فى ضهرها
الاير باج عشان يشتغل يركب معاه كونترول خاص بيه بيركب تحت التابلوه

والطارة بيكون مكتوب عليها Air Bag (بالنسبة لعلامة فولكس اللى على الطارة وان عربيتى سيات, ده غطاء ممكن يتغير بكل سهولة لأنها نفس الطارة مع اختلاف الغطاء)



الخطوة السادسة : تفريغ النص

تقريبا هى نفس الخطوات اللى حصلت فى عربيتى مع الحذر الشديد عشان مفيش كلبس يتكسر وعشان كده هو بدأ بعربيتى

بدأ بفك الصدر وخلع الرفارف والطوربيدو والمساحات



وبعدين دخل على الصالون وفك القاطمة والتابلوه وعصاية الفتيس وقاعدة البدالات



وحل الموتور بالعافشة حتة واحدة فيما عدا المساعدين والسيرفو




نيجى بقى لشوية مقارنات

1- السيرفو
السيرفو القديم اصغر من السيرفو الجديد وده طبيعى لأن الطنابير واجهزة الفرامل اكبر من عندى ودى عملتلى مشكلة بس هقولها فى وقتها

2- القنطرة
القنطرة القديمة المفروض انها نفس مقاس القنطرة الجديدة ودى حاجة انا كنت متأكد منها زى اسمى
بس حصل حاجة خليتنى اشك فى اسمى وهى ان القنطرة القديمة (بتاعتى) كانت اعرض من الجديدة ب نص سنتيمتر
وكنت قربت اقتنع واعرف انى مذاكرتش صح لولا انى شوفت حاجة دايقتنى وفرحتنى فى نفس الوقت

الحاجة اللى دايقتنى ان القنطرة الجديدة طلع فيها تقويسة بسيطة والحاجة اللى فرحتنى انى اثبت ان المفروض ان الاتنين واحد وانى صح

ولأنى متأكد ان النص ده سليم فبدأت أدور على السبب وطلع



فعصة فى المدادة (سلاح الشاسيه)

قولت اوبببااااااا, النص ده كان عامل حادثة وغير اكصدام عشان يدارى الحادثة
بس الميكانيكى قاللى لأ, وقاللى ده بسبب النقل والهبد

عموما الموضوع ده اتحل عن طريق انى ركبت القنطرة القديمة بس اخدت قاعدة الموتور اللى فى القنطرة بتاعت النص وركبتها عندى

3- عصاية الفتيس
عصاية الفتيس القديمة اقصر من الجديدة لأن الفتيس مختلف وجيل أقدم من اللى كان راكب عندى



4- ماسورة الشكمان
قطر فتحة شجرة الموتور 2.25 بوصة وقطر فتحة الشكمان بتاعى 1.75 بوصة

يعنى لازم الشكمان بالكامل يتغير ويكون نفس القطر بتاع شجرة الموتور

5- الطنابير
الطنابير وجهاز الفرامل اكبر من اللى عندى وده برده عمل مشكلة مكنتش عامل حسابها خااااااالص بس الحمد لله احسن




بعد تفريغ النص

أسعد لحظات حياتك وانت بتكتشف حاجات فبريكة فى النص مش موجودة فى عربيتك زى:

1- صدادات فلين خلف الاكصدام



2- مسامير الشبكة والفوانيس

3- قواعد موتور الفبريكة

4- كابل دبرياج الفبريكة

5- بطانة الكبوت

6- الكاوتشة اللى بتكون فى طرف الكبوت من ناحية القفل

7- كاوتشة بتركب تحت بدال الدبرياج

8- كلاكس فولكس الفابريكة

9- كونترول للمروحة!!!!!




لمزيد من التفاصيل والصور أقرأ
تجربة تفريغ نص بولو كلاسيك فى ابيزا 98 (الجزء الثانى)

الجزء الثالث : تركيب التابلوه ومرحلة ما بعد التجربة والتكلفة

تسقيط الموتور نفسه مفيهوش اى مشكلة لأنه شاله حتة واحدة وسقطه حتة واحدة على نفس القواعد ونفس الحوض

الخطوة اللى بعد كده انه بدأ يقفل فى التابلوه والضفيرة بتاعته وركب القاطمة والعدادات والزراير



وده الشكل بعد التابلوه ما ركب



كده يبقى احنا خلصنا جوه
نطلع بقي برة

تقفيل الشغل والنواقص

1- كابل البطارية
كابل البطارية اللى كان فى النص كان مقطوع من عند القواطيش وكمان الكابل بتاعى كان معمول بلدى والميكانيكى صمم انى اجيب كابل فابريكة عشان ميهربش كهرباء ويعمل مشاكل بعد كده
ده شكل الكابل اللى كان فى النص



2- كاوتش الكوبلن
كان فيه كاوتشة كوبلن داخلى مقطوعة بسبب الكلارك وهو بيشيل النص وجبت واحدة جديدة بالشحم والمسامير بتاعتها



3- خراطيم الردياتير
وكانت الخراطيم اللى طالعة وداخلة من الردياتير مقطوعين عشان يفضوا المياه منها قبل التخزين وحل الموضوع ده ان الميكانيكى راح للناس اللى بتعمل الخراطيم وخلاهم يعملوا وصلتين بقطر اقل عشان يباتوا جوه الخرطوم المقطوع وقفلهم بأفيز حديد عشان ميحصلش تسريب

4- حساس الشكمان
الموتور كان طالع من النص من غير حساس شكمان بس الفيشة بتاعته كانت موجودة بالسلك, يعنى اللى قطع النص قطع قبل جسم الحساس نفسه مباشرة وساب السلك كله
حساس الشكمان ده انا بقالى اسبوعين بدور عليه وفضلت ماشى بالعربية طوول الاسبوعين من غيره بسبب انه غير حساس الشكمان اللى كان فى الموتور القديم والاختلاف مكنش فى الحساس نفسه, الاختلاف كان فى طول السلك!!!!!
بالصدفة كنت جنب واحد بتاع قطع غيار فولكس استيراد مشهور قوى عندنا بس مجاش فى بالى قبل كده انى اسأله, قولت مش هتخسر حاجة, والحمد لله لقيت عنده واحد بسلك طوييييل



ركبنا الصدر اللى بيركب عليه الردياتير



وركبت الشبكة والفوانيس القديمة

وركبنا البطارية وحطينا مياه للردياتير من الحنفية مؤقتا لحد ما اجيب مياه حمراء وحطينا زيت mobil xhp على الفلتر اللى جاى مع الموتور وعلى نفس سير التقسيمة وعلبتين زيت فرامل dot4 ودورنا

طبعا الصوت زى صوت الرعد لأن لسه ملحمش الشجرة مع الشكمان
جاب واحد بتاع شكمانات يلحم الشجرة مؤقتا مع الشكمان بتاعى لحد ما اركب الشكمان اللى كنت هاخده من عربية واحد صاحبى عشان اكبر من حيث القطر



طبعا اللحام مكنش كويس لأن فيه فرق فى القطر نص بوصة بين الشجرة وبين شكمانى والفرق ده عمل تسريب جامد للهواء وبالتالى الصوت لسه موجود بس أقل من الأول شوية

ركبنا الطوربيدو الجديد واللى شكله كان مختلف عن اللى كان فى عربيتى لأن اللى كان عندى كان مدغدغ بس ركب عادى وشكله حلو



5- الجنوط والكاوتش
كده فاضل اننا نركب فردتين الكاوتش اللى قدام عشان ننزل العربية ونسحب هواء من الفرامل ونطلع نجرب

الجنط مش عايز يركب!!!!!!!!! الجنط الفبريكة مقاس 13 والعفشة الجديدة طنابيرها وجهاز الفرامل اكبر من القديمة وده اللى مخلاش الجنط يدخل اساسا (ازاى مفكرتش فى حاجة زى كده؟؟!!!!!!), الميكانيكى قاللى لازم على الاقل جنط 14 , طبعا مكنتش عامل حساب حاجة زى كده, يعنى المفروض اجيب جنوط وكاوتش

كلمت واحد صاحبى قاللى عنده الجنوط الحديد ال 14 بتاعت الاوبل فيكترا

جيبنا جنوط الفيكترا وبنركب واتفاجئنا ان صرة الجنط بتاع الفيكترا اصغر من صرة الطنابير بتاعتى, وركبناها حشر وركبنا اللى قدام بس وسيبنا اللى ورا 13

نزلنا العربية وسحبنا هواء من الاربع عجلات وشيكنا على الانوار والمروحة شغالة وكله تمام, وطلعنا نجرب



طبعا طالع متعكنن عكننة جامدة لأن بعد كل المجهود والوقت ده طالع بالعربية من عند الميكانيكى ب فردتين كاوتش قدام 14 وورا 13 وصوت الشكمان اللى كان بيفرج الناس عليا ومخلينى مش سامع صوت الموتور اساسا وبالتالى مش قادر احكم عليه وكان بيرج العربية كلها لدرجة ان الطرمبة جالها ارتجاج وده اللى خلاها فصلت منى الجمعة اللى فاتت, وكمان مفيش حساس شكمان ومخلى العربية تبرجل

طبعا مفيش مجال للتجربة اساسا ولفيت ورجعت تانى نزلت الميكانيكى عند الورشة وقاللى 1000 كيلو وتعالالى نعمل السرفيس بتاعها بس اهم حاجة كل يوم تكشف على الزيت والمياه

وطلعت على واحد بتاع جنوط استعمال انا عارف انه بيسهر عشان اشوف جنط ليا, مشيت حوالى 5 كيلو بدأت اسمع صوت ونة!!!! بتبان وانا دايس بنزين وبتروح لما بدوس دبرياج, كده يبقى فيه حاجة فى الفتيس, لفيت ورجعت للميكانيكى وقولته يبصلى على زيت الفتيس عشان الصوت ده, فعلا لقينا الزيت ناقص حوالى 2.5 كيلو وساعتها صاحب الورشة بص للصنايعى نظرة لووم رهيبة معناها انك ازاى مبصيتش على حاجة زى كده كانت ممكن تطير الفتيس لو اللى سايق مخدش باله من الصوت ده وقاللى كويس انك جيت على طوول وممشيتش عليه كتير وزودنا الفتيس بزيت موبيل لون الجركن ابيض بدرجة 90 80w api gl5ومرداش ياخد منى حق الزيت اللى زوده, وطلعت من عنده والصوت راح خالص

تانى يوم الجمعة جالى مشوار مهم قبل الصلاة لوادى النطرون!!!! اليوم ده عملت حوالى 300 كيلو وطول السكة ماشى 100-120 وجيت فى وقت اضطريت امشى 160 بس كان لمدة حوالى 5 دقائق بس كان غصب عنى

اول 4 ايام كنت بنقل على 2.5 – 3.5 rpm وبعد كده بدأت ازود الموضوع تدريجيا لحد مابقيت بوصل ل 5800 rpm وده مش على طول وغالبا بيكون على الغيار التانى والتالت لأن كل مشاويرى كانت جوه البلد

جنوط الأبيزا كوبرا GTI

طالما الموضوع دخل فى جنوط وكاوتش يبقى ده ميعاد الخطوة اللى كنت مأجلها
جنط الفابريكة بتاع سيات ابيزا كوبرا gti موديل من 97 الى 99 مقاس 16 بوصة وعرض 6 بوصة و 4 مسمار



كاوتش مقاس الفبريكة 16 45\195 تايلاندى ماركة accelera



طبعا الاحساس بعد التركيب كان حاجة تانية خصوصا ان الكاوتش ال 13 بتاعى كانت حالته صعبه

لسه بطلع من عند بتاع الكاوتش ورايح ارجع الجنوط اللى كنت واخدها من صاحبى وبعديه بحوالى 10 كيلو لبست حفرة على سرعة بالعجلة الامامية شمال عملت كاللو فى فردة الكاوتش!!!!!!!

ضبط الزوايا

تانى يوم ظبطت زوايا وبكده يبقى فاضل الشكمان وحساسه

طول الوقت ده كنت مستنى صاحبى اللى كنت هاخد منه الشكمان اللى فى عربيته بس فى الاخر اكتشفنا انه مش هينفع!!!! لأن ده شكمان موتور VR6 2800 سى سى 6 سليندر ولو ركب عندى العربية مش هتجرى لأن مش هيكون فيه كبس بسبب كبر حجم المواسير
وفى الأخر رسينا انى اركب شكمانى وانه مش هيفرق ومش هيكتم وممكن فيما بعد اجيب علبة اكبر او فلتر سبور

تانى يوم اشتريت حساس الشكمان عشان الراجل بتاع الشكمانات يركبهولى وهو بيظبط شكمانى, وبما ان الراجل ده راجل فاهم كويس فقالى ان علبة الشكمان بتاعتى تشيل لحد موتور 1800 مع انه كان ممكن يقولى انها لازم تتغير وقاللى ان علبة البيئة ملهاش لازمة وان هى اساسا فاضية من جوه وبترن وانه هيجيب ماصورة 2 بوصة تاخد من الشجرة لباقى ماصورة الشكمان (يعنى ننزل من واسع لأضيق عشان الكبس) والماصورة دى هركب فيها صامولة عشان يركب فيها الحساس



بعد ما خلص اللحامات دورت العربية وأول مرة كنت اسمع صوت موتورى وطلعت جربت والنتيجة مرضية الحمد لله بس سامع صوت كركرة وغالبا ده من عدم توافق العلبة مع الموتور

طرمبة البنزين

الجمعة اللى فاتت قبل ما أعمل الشكمان العربية وقفت منى!!!! كنت واقف على مطلع وبدوس بنزين عشان امشى لقيتها بتلت وبعدين بطلت, ادور مش عايزة تدور,
فتحت الكابوت وبصيت على الكابلات كله تمام, اسمع صوت الطرمبة, مش سامع, الطرمبة فصلت,
روحت لكهربائى وفكها عشان اجيبله واحدة زيها, بعد ما فكها وصلها على كهرباء خارجية راحت اشتغلت, طلع ان كان سلك الارضى بتاعها مهزوز, ومن بعدها مشيت عادى.

امبارح الجمعة سافرت القاهرة عشان مقابلة القسم, طوول السكة 140 160 وشوية 170 180 والحياة حلوة, كان فيه صوت عندى مش عارفله تفسير وسئلت عليه ايهاب منصور أثناء المقابلة, جيت ادور الموتور مش عايز يدور, طرمبة تانى!!!!
شيلت الكنبة دب دب دب برده مفيش, يبقى لازم تتحل, بعد ما ايهاب حل الطرمبة فعلا لقينا كلبسات الكبلات اللى فى الطرمبة ملخلخة وايهاب خلعها وديقها بالبنز وركبها تانى وفعلا بطلت تتهز

وكان عندى مشكلة تانية فى الطرمبة وهى انى لما بفول المؤشر مش بيوصل للأخر وقد ساهم الاخ مصطفى شعلان فى تشخيص العطل وقال ان الشريحة لازم تتنضف عشان دراع العوامة مش بيطلع للأخر, عموما اكتشفنا بعد كده ان مش ده السبب بس برده نضفنا الشريحة ودخلنا الطرمبة غرفة العمليات برعاية الدكتور ايهاب وكل واحد من الاعضاء الحاضرين ساهم ب أداة من ادوات العملية, الجزء بتاع الشريحة اتفصص واتنضف بفرشة سنان وصنفرة







والحمد لله كل حاجة ركبت مكانها بسلام والعربية دارت بس لسه مشوفتش موضوع المؤشر لأنى لسه مفولتش بس عموما ايهاب متأكد انها هتظبط لأن السبب طلع فى طريقة تركيب الطرمبة نفسها وعدلتها

استهلاك البنزين

بالنسبة لأستهلاك البنزين فى الموتور الجديد: انا عملت اليوم ده 500 كيلو 90% طوالى معظمهم سرعات عالية و rpm مش اقل من 4500 والباقى داخل المدينة واللمبة لسه منورتش

التكاليف

نيجى بقى لتكاليف موضوع تفريغ النص زى ما وعدتكم انى هكتبه فى الجزء الأخير:
سعر النص: 5500
مصنعية: 1500
كاوتش وجنوط: 3000
طلبات(زيوت وكاوتش كوبلن و حساس شكمان........) 500
نثريات(مصاريف نقل و اكراميات) 500
المجموع= 11000 جنيه ولسه السمكرة والدوكو

طبعا سعر النص من الواضح انه معمول فيه واجب بس موضوع الجنوط والكاوتش اللى مكنتش عامل حسابهم خلونى غير مستفيد بالواجب (الحمد لله)

انطباعى وتقييمى للموضوع بالكامل

أولا: السلبيات:

1- فلوس كتيرة اتصرفت كانت ممكن تركبنى ابيزا موديل 2000 كاملة
2- اجهاد بدنى رهيب لأنى كنت برجع من شغلى على الميكانيكى كل يوم لمدة 10 ايام مدة التسقيط
3- ضغط نفسى وذهنى جامد بسبب خوفك ان بعد كل ده متبقاش مبسوط من الشغل اللى هيتعمل فى عربيتك

ثانيا: الأيجابيات:

1- معاك عربية عارف كل مسمار فيها حالته ايه
2- تحويل كامل للعربية كأنها طالعة من المصنع بالمواصفات اللى انت مختارها

فى النهاية احب اوجه نصيحة لكل اللى بيقرأ موضوعى
1- خلى بالك, الموضوع مش سهل لأنك طوول ما انت بتعمل فيها هتتفاجئ بحاجات مكنتش عامل حسابها وطالما بدأت يبقى مش هينفع توقف غير لما تخلص ودايما اعمل حسابك على فلوس اكتر من اللى انت كنت حاسبها لأنك مش بعد كل المصاريف دى هتيجى تستخصر فى حاجة زيادة عن الحسبة طالما العربية طالباها

2- عايز موتور اقوى من اللى فى عربيتك يبقى تجيب موتور بفتيسه بكونتروله
3- عايز باور يبقى تجيب طقم الباور
4- عايز تكييف يبقى تبيع عربيتك وتجيب واحدة مكيفة فابريكة

عايز الحاجات دى كلها يبقى برده تبيع عربيتك وتنقى واحدة على كيفك

بس برده اكيد الواحد حس بمتعة حاجة معملهاش قبل كده والحمد لله النتيجة طلعت مرضية

تحت امركم فى اى استفسار
ربنا يستر طريقكم
السلام عليكم ورحمة الله وبركاته

لمزيد من التفاصيل والصور أقرأ
تجربة تفريغ نص بولو كلاسيك فى ابيزا 98 (الجزء الثالث)


تم تنسيق الموضوع بواسطة منسق القسم