الموضوع: قصتى مع ال a4 موديل 99

الحمد لله بعد مشوار طويل من البحث استغرق شهر جبيت اوكتافيا a4 موديل 99 كاملة اوتوماتيك ، بس كان فيها شوية حاجات عايزة تتظبط هاقولكم عملت ايه وايه اللى لسة لو حد يستفاد او يفيدنى .
اول حاجة كانت كل ماتدور الصبح لمبة الحرارة تنور وتعمل صوت وشوية وتطفى روحت لمحمد سكودا فى دير الملاك هو ميكانيكى اسكودا فى التوكيل وفاتح قدامه بس على اده شوية ، المهم بنبص لقينا كوعة المياه الفيبر بتنقط فروحت اشتريت غيرها ب 50 جنيه جديدة من دير الملاك بردوا وركبتها وبعدين كان فى زيت مرشح قالى جوان غطاء التاكيهات اشتريته ب 85 جنيه اسبانى وانبوبة سيليكون وغير ت زيت وفلتر واشتريت فلتر ب 50 جنيه بوش المانى ، وبعدين كانت لمبة ABS منورة جاب الجهاز وكشف قالى دا حساس العجلة اليمين قالى عايز يتغير قولتله مش مشكلة دلوقتى ودفعت مصنعية لكل دا وكشف الجهاز 130 جنيه بالاكرامية

وبعدين روحت لكهربائى فى دير الملاك عشان يشوف التكييف مش واصله كهرباء ليه فك التابلوه من قدام من عند لوحة المفاتيح ولقاها بايظة مش شغالة خالص وبعدين روحت اشتريتها من من عند الطحاوى من دير الملاك ب 250 جنيه ركبها لقى سرعة رقم 1 ورقم 4 مش شغالين قعد حوالى ساعة يجرب وبعدين فك فيبرة من ورا درج التابلوه فيها مقاومة اد مشط الكبريت قالى دى مقاومة السرعات هاتلى زيها اتصلت بالطحاوى قالى . مكتوب عليها حرف قولى عليه لقيته h25 قولتله قالى موجودة روحت جيبتها ب 150 جنيه وركبتها عند الكهربائى وبعد كدة روحت لبتاع التكييف شحن والتكييف اشتغل زى الفل كل السرعات بعد لحام فى السربنتينة اتكلف 30 جنيه والشحن ب 170 جنيه . بس فى ملحوظة عايز اقولهلكم على موضوع قطع الغيار الاستيراد من عند الطحاوى (الراجل متهاود لأبعد درجة انا كنت بتصل بجريدة فى الحرفيين وابراهيم سكودا فى السبتية اسأل على الأسعار قبل مروحلة كله فرق 100 وساعات 150 جنيه فى الحاجة الواحدة )
وبعد كل دا فى اليوم التانى قالولى فى واحد اسمه سيد عبده فى جسر السويس لو عاوز تظبط الماتور والعفشة لو فى حجاة قولت اروحله . روحت والطريق زحمة جدا جدا لحد ما لقيته سألت عليه قالولى روح بس قول عندك ايه قولتهلهم عندى قفشة فى العجلة الشمال كل ماجى اطلع مش عارف من ايه بتفك بعد مادوس فرامل قالى تعالى نجرب . وان القفشة تيجى ابدا مش راضية تيجى خالص ، قالى مش هاعرف اعملك حاجة غير لما اسمع . قولتله طب عداد الكيلو متر بيهيس بعد ال 120 بيطلع ويقع لوحدة قالى كهربائى ، قولتله لمبة ال ABS قالى كهربائى قولتله طيب . قالى روح لواحد اسمه رشاد وتامر فى الحرفيين . .قمت شادد الرحال على الحرفيين وصلت فى ساعتين ونص وروحت ملقيتوش لسه جيه كانت حوالى الساعة 4 م . 10 دقايق ولقيت المهندس تامر جيه حكيتله الحكاية كلها حط الجهاز . وقالى لمبة ال ABS منورة بسبب الحساس او الصاجة الخاصة بالABS وقالى حساس السرعة واصله كهرباء . روح لميكانيكى يشوفلك الصاجة راكبة ولا لأ والترس بتاع السرعات ممكن يكون واقع جوا الفتيس . قلتله فين الميكانيكى قالى فى واحد اسمه ياسر ووصفلى فين بعد ماخد 80 جنيه كشف وركبت الكلاكس عنده ومشيت اسأل على ياسر لقيتة فى حتة زنقة الزنقة وقعدت سنة لحد ماعرفت اركن . المهم جيه ياسر (هو زعيم حبتين فى نفسه كدة)قولتله على القصة رفع العربية وحل الفردة اليمين قالى كله تمام وبص على الترس قالى راكب مكانه ، قولتله طب اعمل ايه دلوقت قالى يبقى الحساس ابقى هاتوه واحنا نركبهولك. وخد 20 جنيه ومشيت وانا ندمان اشد الندم انى روحت الحرفيين . اليوم ضاع ودفعت فلوس ومعملتش حاجة . الحسنة الوحيد اللى عاملتها انى جيبت كارتيرة فيبر بتاعت الرفرف اليمين ب 75 جنيه من عند الشيخ حسن ، والحسنة التانية سألت على الفوانيس الأمامية الكريستالة وجيبت شوية ارقام تليفونات محلات قطع غيار . اه الفوانيس ب 325 الفانوس والاشارة ب 50 ديبو وفى نوع تانى ب 335 اسمه TYC او حاجة شبه كدة قالولى احسن من الديبو وبالماتور بتاع القمرة الداخلية ورجعت البيت وانا متنكد على ضياع اليوم .

بس المهم تانى يوم وانا واقف عند سمكى صاحبى بقوله على اللى حصل قالى عندى واحد عفشجى لسة جايبينو من الشرقية (دا على اساس انهم مشتريينه ) بس 100 % قلت دا اكيد ميعرفش نوع العربية بتاعتى اصلا لو جبتو المهم قالى مش هاتخسر حاجة قام متصل بيه وجابوه لحد الورشة عندة . قلتله على الحكة الموجودة . رفع العربية من ناحية وقالى ادى العربية غيار فعلا الحكة ظهرت كتير قوى . حلى الطنابير والماستر وقالى دور وادى العربية غيار بردو الحكة موجودة (حاجة تجنن) المهم فتحنا الكبوت واحنا بنجرب وهو رافع العربية لقيان الصوت جاى من جوا من حاجة كدة فى سدر العربية جنب الكارتيرة الشمال عامل زى الموبينة قالى دا abs طبعا انا مكدبش عليكم معرفش دا ايه هو شبه الموبينة بتاعت العربيات القديمة بس فعال الصوت طالع منه وواضح جدا . بس المهم نزلنا العربية وقالى روح لحد بتاع فرام لقولولا الصوت بيجيلى من هنا وهو هايتصرف . الفكرة هنا ان العفشجى دا انا واثق انه اتخن عربية اشتغل فيها هى بيجو القديمة بس فاية انه عرف يطلعلى العيب منيين وفى ك العجلة والخ الخ زى ماقولتله أحسن من سيد عبده اللى كسل يبص حتى وياسر اللى كا متضايق انه بيشتغل فى العربية صيحيح يوضع سره فى اضعف خلقه قمت مديله 20 جنيه كان طاير من الفرحة والله ومكنش مصدق انى اديته فلوس عشان هو مصلحش حاجة (ربنا يكتر من امثالهم ) وبس لسة بقى بكرة انشاء الله عايز ادور فى دير الملاك على ميكانيكى تانى غير محمد سكودا بيقولوا فى واحد اسمه عبده هناك فى دير الملاك بردوا هاشوفه فين ، هى المنطقة كلها اصلا ميكانيكية سكودا شغالين كلهم فى التوكيل وفاتحيين قدامه . بس انا بحب اروح هناك عشان قريب. الطريق مش زحمة . بتوع قطع الغيار موجودين هناك وخصوصا عبده الطحاوى اللى اتصاحبت عليه وراجل زى العسل واسعارة زى ماتقولوا يقولك ماشى . كل دا عشان اعمل الحكة واعرف الكوباية للى انا مش عارف بتاعت ايه دى اللى بتطلع الصوت دا اسمها ايه عشان اعملها واغير بالمرة حساس الABS عشان اللمبة تطفى واشوف حل فى العداد اللى بيهيس ، وروح أحمد سعيد عشان اركب جنوط وكاوتش استيراد او مستعمل من عند واحد صاحبى هناك . بس أهم شىء طالبوه منكم عايز اعرف لو هاركب 15 أو 16 عشان اللى فيها 14 اركب مقاس كام على كام عشان ميقصرش على العفشة 15 / ... /... أو 16 /...../...
وشكراً ومعلش على الاطالة
لو حد عايز يستفسر عن أى شىء أنا فى الخدمة

المشاركة الأصلية كتبت بواسطة ahmedsrs

ايه ده ياكبير انت بتعمل صيانة دورية ولا لسة شارى العربية وبتعملها صيانة

بظبطهارعشان اركب من غير وجع دماغ