الموضوع: صنى n17 2013 صيانة استثنائية 12000 ( الانذار - صاجة الفرامل - الطنابير -الدركسيون)

اخوانى فى المنتدى و فى الله
السلام عليكم
اسف لطول الغياب لكثرة المشاغل
العربية حاليا عاملة حوالى 13000 كيلو
انا كل الصيانات باعملها فى اوتو ايجبت ابو رواش
بقى العربية كان فيها مشكلة صوت الترلة اياه اللى بيجى مع الفرامل و تم تشخيص العيب ده فى صيانة ال 5000 ( مهندس الاستقبال اسلام غازى) و قيل ان ده صاجة التيل الخلفى و كانت غير متوفرة و حتابع معاك و اتصل بيك
و اشتكيت من صوت كمان من الامام بس مهندس الاستقبال قال لى لا دا هو الصوت كله من ورا
و فى صيانة ال 5000 ايضا اشتكيت من صوت رجة او خبطة فى عامود الدركسيون مع النقر و المطبات – الصوت راح بعد تربيط العفشة جيدا
و رجلشو كمان على فرامل اليد
و طلعت جربت العربية مع المهندس اسلام عشان صوت التسميعة اللى فى الدركسيون مع الحفر و المطبات لقيته راح بنسبة 85% بعد تربيط العفشة جيدا
اخدت التقرير اللى مكتوب فيه ان كده كله تمام
دفعت 115 (الزيت من عندى و الفلتر من عندهم)

فى صيانة ال 10000 ( كانت ساعتها الاحتفال ببيع 6000 عربية من الموديل الجديد و زيت مجانا)
مهندس الاستقبال محمد درويش ( ما ارتحتش معاه فى الصيانة دى) اقول لو الصاجة يقول مش موجودة
طب ليييه انا عندى من صيانة ال 5000 الصاجة مطلوبة
يقول لي اصل اللى جه كان كميه بسيطة و اتطلبت لشاسيهات معينة بعينها اقول له تقرير ال 5000 اهوه ( و ورتهوله) اكتر من كده ايه ازاى 4 شهور ما حدش عبرنى و انا مش من ضمن "الشاسيهات المعينة" قال اكيد عربيتك فى الورق هنا و قعد يدور امامه و بعدين سكت
طلبت الكشف على التيل و الطنابير الامامية ( لان حاسس فى صوت و حاسس بصباعى ان الطنبورة غير مستوية و ان كانت ناعمة )
طلبت تربيط العفشة جيدا لان موضوع الرجة اياها فى عامود الدركسيون رجعت بعد 1500-2000 كيلو من الصيانة السابقة
جه التقرير ان كله تمام و التيل و الطنابير تمام
و المهندس ما رضيش يكتبلى على صاجة التيل الخلفى قال لى ما هيا مكتوبه معاك فى صيانة ال 5000
الزيت من عندى و الفلتر من عندهم و خدت الزيت الهدية رميته فى شنطة العربية
دفعت112
و لاحظت ان فرامل اليد ما حدش رجلش عليها و ان العفشة ماتربطتش كويس اوى صوت الرجة راح بنسبة 50% بس
و رجع المرة دى بعد 500كيلو
الشىء الجيد ان كان فى صوت من ورا و اتضح انه كان من الكنبة فكوها و ركبوها كويس


نيسان اوتو ايجبت كلمونى بعدها بكام يوم اشتكيت من عدم توافر الصاجة و ازاااى انا من صيانة ال5000 اعتذروا و قالو هنتابع معاك
بعد حوالى شهرين اتصلوا الصاجة محجوزة باسمك اختار موعد و تعال ركبها
كانت العربية عملت حوالى 2000 كيلو بعد صيانة ال 10 و صوت الترلة اياه اصبح وااااااضح و كمان صوت التصفير اللامامى اصبح وااااضح و اصبح من السهل انك تفرق بين الصوتين

رحت الصيانة الغير اعتيادية 12616 كيلو
قابلنى المهندس احمد فتحى (المهندس ده لسه جديد)
الموضوع الاول كان الصاجة ( و ده فى الضمان)
لكن كانت لى طلبات اخرى
اوضحت ان العربية فيها عيب تصنيع يؤدى لسرعة تاكل الطنابير و انى بالفعل سامع صوت تصفير وان المشكلة دى تكررت مع اكثر من صديق و لذا انا طالب الكشف عليهم

ده غير صوت زنة و انت ماشى بالعربية كان فى حاجة فى بلاستك الصالون و اول ما تمسك فرامل اليد الصوت ده يختفى
فممكن يكون فى حاجه فى فرامل اليد مفكوكة بصو عليها و رجلشوها عشان الصيانة اللى فاتت ما اترجلشتش

و اخيرا طلبت اعادة برمجة المفتاح لتفعيل الانذار

المهندس قال الصاجة فى الضمان لكن الباقى لسه هنشوف لو فى حاجة فى الضمان مفيش مشاكل لو فى فلوس هقول لك انا لسه مش عارف بس مبدايا ممكن يكون تكلفة 150 عمالة و كشف و مش عارف ايه ( احترمت الراجل )
المهم
جاءت ساعة الحسم الصاجه اتركبت و المهندس قال ان الصاجة اصلا موجودة فى العربية بس بتستبدل بواحدة اخرى سمكها اعلى و هو ده التغيير اللى اتعمل فى ديزاين الفرامل الخلفية لحل المشكلة
العفشة اتربطت كويس جدا ( دا على كلامه)
بصينا على فرامل اليد و ربطنا و رجلشنا عليها
تم تفعيل الانذار
نيجى بقى لموضوع الفرامل الاماميه
قال لى الطنابير حالتها سيئة (!!) و فيها ريجه و لازم تتغير
و قال ان القطع دى استهلاكيه المفروض تتغير على حساب العميل
لسه كنت حتفتح فيه لقيته بيقول بس انا كلمت المدير المسؤل عن الضمان هنا فى الفرع و قلت له ان العربية عاملة كيلو متر قليل المهم وافق ان الطنابير تتغير فى الضمان
طلعت له الورقة السحرية ( تقرير صيانة ال 10000 اللى بيقول ان الطنابير زى الفل) و قلت له يا راجل يا طيب يعنى ينفع فى 2000 كيلو بس تتغير الحالة من جيدة الى رديئة بدون حتى المرور بالحالة المتوسطة؟؟؟
انا بس عايز سبب مقنع للكلام ده قال يا سيدى انا ممكن احرقهملك فى الف كيلو بس مش الفين السبب انك بتمشى فى حتت فيها تراب و رمال كتير تدخل بين التيل و الطنبورة و تعمل كده

قال ان التيل كويس ( رفض الاعتراف ان التيل به اى عيوب عشان هوا ما اتاكلش و سمكه كويس بالرغم انى قلت ان التيل نوعه رديء و انا شايف ان هوا اللى بيعمل كده) بس قال بالرغم من ده يستحسن كمان نغير التيل عشان الريجة بتاعة الطنابير غيرت شكل التيل و بكده ممكن ياثر على الطنابير الجديدة ( و طبعا تمن التيل على حسابى)
سالته اذا كان التيل نفس النوع اصر ان التيل مش هوالسبب
استلمت العربية .... صوت الترلة اياه رااااح و فرامل اليد اترجلش عليها و بقت تمام و تم تفعيل انذار السرقة بالفعل ( اسلاااام يا ولاااد) دا غير ان صوت الصفارة مع الفرامل من الامام قل ( ما هم طبعا نظفوا التيل و صنفروه)
المهم بعد ايام الراجل كلمنى بنفسه و قال ان الطنابير وصلت و تعال ركبها و ان شاء الله اروح الخميس القادم
انا قلقان من التيل اللى حيركب جديد