استفسار.يعنى ايه فرشة زفرة وايه استخداماتها

**gha** · 26-03-2013 12:02 PM

من فضل حضراتكم ..انا لقيت فرش زفرة لتنظيف العربية من الخارج ..إيه الفرق بينها وبين الفرش العادية وايهما افضل ؟؟ام ان لها استخدامات معينة؟؟

**Amr Axel** · 26-03-2013 01:06 PM

الفرشة الزفرة بيكون عليها زي زيت برافين تقريبا و احيانا بيقال فوطة زفرة ع الفوطة اللي متنقط عليها زيت او جاز
لكن طبعا النتيجة لون العربية بيبهت و اللمعان يروح ده غير ان هتلم تراب تاني كتيير بسبب الزيت
الأفضل تغسل العربية كل اسبوع او اسبوعين مرة من برة و باقي الايام تنضفها بفوطة عادية و هتفضل نضيفة معاك
و فيه فوطة انا جربتها لقيتها في بنزينة وطنية بـ4.5 ج تقريبا كبيرة لونها برتقالي بس مش المنتشرة اللي بنشوفهم واقفين بيها اللي بـ2 ج لأ ديه سميكة و تحس انها عاملة زي الصوف و مرسوم عليها باللون الاسود مش عارف نمر و لا ايه الرسمة بالظبط
بصراحة بتنضف كويس اوي التراب او اي حاجة طرطشت ع العربية و بعد اسبوعين تلاتة اطلع اغسلها و انشفها و انزلها العربية تاني و مقسمها واحدة للعربية من برة و واحدة للعربية من جوة و التابلوه

**windofchange** · 26-03-2013 01:19 PM

افضل حاجة تزيت بيها الفوطة وتزفرها زيت االبرافين لان الزيت العادي بيبهت لون العربية والبرافين بتجيبه من الصيدلية واعتقد انه مش بيبهت لون العربية زي زيت الموتور والجاز

**mesaharaty** · 26-03-2013 02:49 PM

إعتقادى فى مسألة الفوطة الزفرة :
الفوطة الزفرة مضرة جدا للبوية لأنها قد تشتمل على بقايا زيوت من الممكن جدا تكون ضارة لجسم السيارة ده بالإضافة إلى أن الملمس الزيتى اللى بتتركه على جسم العربية بيدى فرصة كبيرة للأتربة إنها تلزق وبالتالى سرعة إتساخ العربية بعد لمعة مؤقتة .
الأحسن بقى من الفوط الصفرا هو الفوط المايكروفايبر بتلاقيها ناعمة وملمسها رقيق ومتناسبة مع العربية .
آخر حاجة باقولها هى إن أحسن من ده كله الغسيل بمنظف مخصوص للسيارات وده متوفر ومش غالى وبرضه بيدى لمعة وغير مؤثر على البوية .ويا سيدى ممكن تبقى تلمع العربية بوش بولش ولا واكس كل 6 شهور مثلا .
الفوطة الزفرة اختراع فاشل جدا