عمولة السمسار بتتحسب ازاي؟

**shaddadfalcon1** · 26-03-2013 03:26 PM

السلام عليكم

لو بتشتري او بتبيع شقه عن طريق سمسار
المفروض عمولته تكون كام؟ وهل بتختلف ولا علي حسب الأتفاق ولا نسبه ولا ايه؟

**abdulkhaleq** · 26-03-2013 03:28 PM

2.5 % من البائع وزيهم من المشتري
ولو العقار او الارض تمنه ملايين يعني ربنا يديك
بتبقى 2 % احيانا

**mostafa3000** · 26-03-2013 03:35 PM

النسبة بتكون ٢.٥ في المية علي البائع والمشتري
يعني ١.٢٥ لكل واحد
لو ثمن الشقة مثلا نصف مليون بتقل الي واحد في المية

**shaddadfalcon1** · 26-03-2013 03:42 PM

يانهار ابيض
يعني لو شقه 100 الف سيادته هياخد 2500 جنيه؟

**Khaled Online** · 26-03-2013 04:01 PM

وليه تروح لسمسار أصلا؟ إعلان عالنت "الوقت المتاح للمعاينة أيام كذا وكذا من الساعة كذا لكذا والوسطاء يمتنعون" وتكون موجود في الأوقات الفلانية
وممكن تعمل إعلان مدفوع في الوسيط المطبوع بس ابقى لاحق على المتصلين
هو السمسار بيعمل إيه غير إنه بيبقى قاعد والزبون ييجي لحد عنده فياخده يفرجه على كام مكان؟!

**tareksakr** · 26-03-2013 04:04 PM

المشاركة الأصلية كتبت بواسطة shaddadfalcon1

يانهار ابيض
يعني لو شقه 100 الف سيادته هياخد 2500 جنيه؟

هي بتبقي الطبيعي 2.5 % بس انت تتفق مع السمسار انك هتديله مثلا 1.5 % أو 1% السمسار بيركز في عمولته مع البائع لانه هو اللي هيقبض والمشتري ممكن يتهاود معاه شوية بس اهم حاجة انك تتفق مع السمسار قبل ماتنفذ البيع

**shaddadfalcon1** · 26-03-2013 04:19 PM

المشاركة الأصلية كتبت بواسطة khaled online

وليه تروح لسمسار أصلا؟ إعلان عالنت "الوقت المتاح للمعاينة أيام كذا وكذا من الساعة كذا لكذا والوسطاء يمتنعون" وتكون موجود في الأوقات الفلانية
وممكن تعمل إعلان مدفوع في الوسيط المطبوع بس ابقى لاحق على المتصلين
هو السمسار بيعمل إيه غير إنه بيبقى قاعد والزبون ييجي لحد عنده فياخده يفرجه على كام مكان؟!

ماهو ده هيبقي وجع دماغ وقرف وكل شويه واحد يتصل واللي يستظرف واللي يجي ويمشي وانا بصراحه هبقي سايب الشقه ومش عايز كل شويه اتبعت او حد يخنق عليا

**Khaled Online** · 26-03-2013 04:30 PM

المشاركة الأصلية كتبت بواسطة shaddadfalcon1

ماهو ده هيبقي وجع دماغ وقرف وكل شويه واحد يتصل واللي يستظرف واللي يجي ويمشي وانا بصراحه هبقي سايب الشقه ومش عايز كل شويه اتبعت او حد يخنق عليا

أنا عامل عليك والله بس انت أدرى بظروفك وربنا يرزقك ببيعة كويسة من غير وجع دماغ

**shaddadfalcon1** · 26-03-2013 05:10 PM

مشكلتي اني خيييييييييبه في البيع والشرا وعشان كده مش عايز ابيع بنفسي عشان متكلفتش

عايز سمسار عشان اقوله علي اللي عايزه وهو يحاول يجيبلي السعر ده

**tareksakr** · 26-03-2013 05:29 PM

بص هقولك علي المفيد انت تسأل البوابين اللي حواليك علي اسعار الشقة االي زي شقتك بتعمل في حدود كام فلوس واخر شقة اتباعت في المنطقة كان سعرها كام عشان تقدر تعرف متوسط السعر لشقتك كام وتحدد انت هتسيب الشقة فاضية واللا فيها اي اضافات زي المطبخ - التكييفات - البلاكارات وتضيف متوسط سعرهم علي سعر البيع وتعمل اعلان صغير في جريدة الوسيط تمنه 155 جنيه وتحدد ميعاد لمعاينة المكان تكون فاضي فيه علي اخر الاسبوع يكون الاعلان جابلك اكبر قدر ممكن من المشترين وتعلي سعرك شوية بسيطة عشان خاطر الشعب المصري بيموت في حاجة اسمها فصال وتوصل لسعر يرضيك ولازم تنضف الشقة كويس قبل اي حد يدخلها عشان تبقي حلوة وربنا ييسرلك بيعها ان شاء الله