إن شاء الله مسافر ... أبيعها ولا أرفعها ؟؟؟

**goodwave** · 08-08-2008 10:54 AM

السلام عليكم
إن شاء الله في مفاوضات في مشروع سفر للعمل بالخارج في دولة عربية ... والعقد بإذن الله حيكون عمل 11 شهر وأجازة شهر في مصر قابل للتجديد. بس كام سنة بالظبط مش عارف.
زي ما البعض يعرف ... أنا إشتريت عربيتي الياريس (مو 2008 مانيوال نص كماليات) في شهر مارس والعربية عاملة حوالي 8000 كم إلى الأن والحمد لله.

بسم الله ما شاء الله مرتاح معاها والحمد لله.

السؤال دلوقتي أبيعها بدل الركنة والرفع وخلافة ولا أخليها وأهو أستخدمها في الأجازات وبعد ما أقرر أستقر إن شاء الله حتكون موجودة وتسد معايا ؟؟؟؟ مع العلم إني شاري العربية تقسيط على 5 سنوات وسعرها بعد إنتهاء مدة التقسيط إن شاء الله حيقف عليا بحوالي 115 ألف جنية.

أفيدوني أفادكم الله.

**Hassan Khalil** · 08-08-2008 11:14 AM

محتاج فلوسها بيعها ..
مش محتاج فلوسها اوي ..خليها ..
-----------
اذا بعتها ..حاجة من اتنين ..
* واحد يشتريها منك كاش .. و ده حيدفعلك تمنها كأنها كسر زيرو .. يعني حينزل من تمنها حوالي 8 او 9 الاف جنيه .. و حتروح تفك الحظر من البنك .. و حيدفعوك شوية فلوس وفوايد لفسخ العقد المبكر .. و حتخسر كتير .. حيبقي بالضبط كأنك كنت واخد قرض و بتسدده علي 5 سنوات ..
* او واحد يدفعلك اللي انت دفعته للبنك ( المقدم و المصاريف الادارية و مصاريف تسجيل السيارة .. الخ .. الخ ) .. و يكمل هو سداد الاقساط عن طريق تنازل رسمي يتم داخل البنك .. و برضه البنك بياخد عليه رسوم .. و ساعات بيطلب من الشاري الجديد انه يجيب ضامن ..
*ممكن نفس الشخص ( لكن يفضل انه يكون معرفة مقربة ) يدفعلك اللي دفعته .. و يكون بينك و بينه عقد بيع سيارة بالتقسيط ..ينص فيه علي ثمن السيارة اجمالا و المبلغ المتبقي ف يالقسط و انه سيقوم بسداده .. و بتعمل له توكيل علشان يقدر يجدد الرخصة سنويا .. و يقوم هو بسداد القسط شهريا لحسابك في البنك ..و يعطيك صورة من ايصال الايداع ..او يديلك القسط في ايدك او لاحد افراد الاسرة ..
و يكون كاتب ايصالات امانة نصف سنوية بعدد الاقساط .. و يعطي له ايصال عند اتمام سداد 6 اقساط .. و هكذا ...
و بالتوفيق

**goodwave** · 08-08-2008 11:41 AM

شكر يا أخ حسن
بس انا سألت ي البنك على المبلغ المتبقى وهو مش كتير والحمد لله مقارنة بسعر إعادة البيع للعربية .... فبحسبة بسيطة ممكن إن شاء الله أبيع وأحط المبلغ بالظبط حسداد كامل للعربية .... بس حبقى خسرت حوالي 10 الاف جنية ودول ركبت بيهم 5 شهور.... لكن لا يمكن المبلغ المتبقي في حالة السداد المبكر هو نس المبلغ بعد سداد 5 سنوات تقسيط.

وفي إنتظار أراء باقي الأخوة

**أبو عبدالرحمن** · 08-08-2008 03:36 PM

بالتوفيق إن شاء الله يا أحمد ،،،ربنا يكرمك هاتوحشنا ،،،،بس عايز أقولك حاجة : وده رأيي الشخصي : ماتبيعش غير لما تتأكد إنك مسافر فعلا وكمان تسافر وتجرب الشغل بره وتستقر في الشغل وتقرر إنك تكمل ،،،في الحالة دي ابقى بيع أو وكل حد للبيع ،،،إنما نفترض لأي ظروف سافرت والشغل أو الجو ماعجبكش أو نويت تقعد سنة واحدة ،،يبقى خسارة إنك تبيع وتخسر دلوقتي ،،،على كل حال ربنا يقدملك الخير ،،وابقى طمنا عليك

**aboalm** · 08-08-2008 10:29 PM

عندى رأى إن كان عندك مكان كويس أمين ترفعها فيه يبقى توكل على الله و روح لآى نجار يعملك أربع حمير خشب كويسين و هات غطا كويس و ارفع العربيه فك الكاوتش و حطه نايم على الآرض مش واقف غالبا البطاريه حاتبوظ فأحسن حل ليها بيعها.أما لو مش فى مكان كويس تطمن على العربيه فيه و أنت مسافر يبقى بيعها و حط الفلوس فى البنك و لما تيجى فى الاجازه القادمه بالسلامه ربك يسويها من عنده. و ترجع بألف سلامه.

**Islam_galal** · 09-08-2008 02:10 AM

بس لو مصر تبيع ممكن اشتريها منك بـ 30000 كفاية و انت تكمل اقساط العربية (أصل انا باحب الصيد بس في الميه العكره)

نيجي للجد

المشاركة الأصلية كتبت بواسطة أبو عبدالرحمن

بالتوفيق إن شاء الله يا أحمد ،،،ربنا يكرمك هاتوحشنا ،،،،بس عايز أقولك حاجة : وده رأيي الشخصي : ماتبيعش غير لما تتأكد إنك مسافر فعلا وكمان تسافر وتجرب الشغل بره وتستقر في الشغل وتقرر إنك تكمل ،،،في الحالة دي ابقى بيع أو وكل حد للبيع ،،،إنما نفترض لأي ظروف سافرت والشغل أو الجو ماعجبكش أو نويت تقعد سنة واحدة ،،يبقى خسارة إنك تبيع وتخسر دلوقتي ،،،على كل حال ربنا يقدملك الخير ،،وابقى طمنا عليك

نعم الرأي بصراحة

**Ahmed Anwer** · 09-08-2008 02:40 AM

رأيي الشخصي ،،

و عن تجربة مع اخواتي الاتنين مسافرين بره ،،

اول ما تعرف ان الحال تمام و ناوس تستقر هناك ،،

بيعها ،،،

تضييع للاجازة في تنزيل العربية و شراء بطارية جديدة ( اخويا بيحصله كده كل سنة ) ، و تغيير سيور وكشف و مش عارف ايه غير هم هاشيلها فين و مين يبص عليها

و الأهم ركنة فلوس مالهاش لازمه استفيد بيها في اي حاجة تانية تكون بتزيد

و كل اجازة اجرلك اي عربية خلص بيها احوالك

و احسبها هتلاقي انك لو هتبيعها بعد خمس سنين ان شاء الله مثلا بدلا من انك تخسر عشرتلاف جنية هتخسر ثلاثين او اكثر عشان شهر كل سنة

**bishoo33** · 09-08-2008 02:58 AM

كما قال الأخوه
أنتظر حتى تسافر وتستقر فى العمل وبعد كده بيع

**Karim_Monir** · 09-08-2008 03:09 AM

راي قولتهولك على الخاص
لو نويت تسافر جد
بعها فورا
ركنة موديل بينزل
ركنة فلوس حرام
ارمي الفلوس في اي شقة ترجع تلاقيها اضعاف
تركنها في عربية تنزل كل سنة كام الف انت اولى بيهم