الموضوع: تسعير و استفسار بخصوص سيراتو 2010

المشاركة الأصلية كتبت بواسطة monamize4

السلام عليكم و رحمة الله و بركاته
انا كان ليا طلب من نمور كيا و انا كلى ثقة فيهم و ف حياديتهم
معروض عليا سيراتو 2010 - وكيل - اوتو - عداد 50 الف كيلو - فابريكة برة و جوة - ايرباج - جنط 16 - تكيف بكر - رخصة لسه متجددة امبارح - زينون
ياريت حد فاهم يسعرها ,,, ياريت اللى يرد يكون مطلع على اسعار المستعمل الايام دى مش شهرين فاتوا لان اسعار المستعمل اتغيرت من ساعت لما الزيرو غلى (انا بعت لاستاذ شريف من مدة و لسه مردش و الامور مسعجلة شوية)
هل ديه فئة ex و لا انهى فئة؟ هل فيها abs؟ هل فيه فرق ف العدادات و كمبيوتر العربية بينها و بين ال sx؟ متوسط استهلاك البنزين اد اية(تقريبا مش بالظبط) ؟ هل فعلا استهلاك البنزين للفتيس 4 سرعات اقل من الفتيس ال 6 سرعات (رغم ان دا غلط نظريا) ؟
لو اى حد ليه ملاحظة ياريت يشاركنا ,,,,,,,,,,,,,,,,, شكرا مقدما

اهلا وسهلا بيك فى قسم كيا
اولا الفئة فعلا ex وكانت وقتها على ما اتذكر ب 108 الف ودى الفئة اللى كنت هشتريها وقتها ولكن اللى قفلنى منها انها مفيهاش سنتر مش فاكر اذا كانت فيها abs او لا ودى سهلة انك تعرفها وانت بتشوف العربية من خلال الشاشة العداد وفاتح كونتكت وبتظهر لمدة 3 ثوانى وبتختفى لو ظهرت يبقى فيها والعكس او من خلال فتح الكبوت وهتلاقى العلبة شبة فلتر الزيت .
العداد عادى مش ديجتال واعتقد ان الديجتال كان الهاى لاين
متوسط استهلاك البنزين ما بين 10 الى 11 لتر لكل 100 ك و 11 الى 12 لتر وقت تشغيل التكيف كل ده داخل المدينة اما لو طريق مفتوح بتنزل فى حدود 7 الى 8 لتر
فى حالتنا والعربية عاملة 50 الف بنرجع للاعتناء بالعربية وعمل الصيانات الدورية فى ميعادها لان ده مهم جدا لو كل شى مظبوط هتلاقى نفس المتوسط اللى قلت عليه فوق
اكيد استهلاك البنزين فى ال 4 نقلات اكتر من 6 نقلات اللى المفروض بيوفر 15 % عن ال 4 نقلات .... نيجى للتسعير واكيد استاذنا شريف اقدر شخص ممكن يسعر صح بنسبة كبيرة
شخصيا العربية ممكن تعمل ما بين 80 الى 85 الف على حسب وصف حضرتك للعربية
الاهم المفروض يكون تم تغير ال 4 جنوط دلوقتى لو متغيرتش تنزل على الاقل 3 الاف ج
عموما الكيا سيراتو عربية حساسة مش بتاعة بهدلة محتاجة تكون ايدك فيها على طول علشان تحافظ عليها قطع الغيار متوفرة والمراكز كتير اللى بتتعامل فيها مشاكلها معروفة للجميع
عفشة نشفة لو كنت راكب عربية ناعمة - علبة دريكسيون وده راجع للعفشة -
ضفيرة كهربا ضعيفة فتيس اخره 5 سنوات لو مخلتش بالك كويس منه فى الصيانات .
فى المجمل عربية محترمة بالنسبة لسعرها هتتعامل معاه كويس وتهتم بيها هديتك اللى انت عاوزه غير كده هتتعبك .... بالتوفيق باذن الله واى استفسار انا مع حضرتك .