الموضوع: استشارة بخصوص ترخيص السيارة في المرور

هتروح تجيب الاول براءة ذمة من نيابة المرور بتاع العربية وتاخدها وتاخد العقد المسجل وتطلع ع المرور وتفحص وترخص بس كده

هو انت ماخدتش مخالصة المخالفات من المالك الاول وبعدين تروح تطابق بالاورنيك وترجع لصاحبها الاول تقولوا طابق البصمة فى المرور الاصلى بتاعها دى مسئوليته هو مش مسئوليتك وبعدين حتشترى ملف وتعبيه

بص يا معلم الخطوات بالظبط ...

1-أول حاجه لو انتا شاري بتوكيل لازم تسجل في الشهر العقاري وتدفع الرسوم اللي بتبقى على حسب الموديل والسي سي.
2-لو معندكش طفايه ...لازم تشتري طفاية حريق ... وتدق رقم الشاسيه عليها ... ولو عندك طفايه لازم ميكونش عدى عليها 3 سنوات.
3- هتروح المرور اللي انتا هتنقل ليه وتشتري ورق تجديد رخصة وفحص.
4-هتروح عند الفحص وترفع بصمة رقم الموتور ورقم الشاسيه ... وتعمل جواب على ورقة الفحص دي موجه للمرور اللي انتا تبعه حاليا لمطابقة البصمة دي (هما اللي بيكتبو الجواب ده) ... ولازم تختمو من ادارة المرور اللي انتا هتنقل ليها اللي هيا عامله الجواب ... ولازم تتأكد ان البصمه نفسها مختوم عليها بالاكلاشيه بتاعهم او بالختم عشان ميرجعكش تاني.
5- هتروح المرور اللي انتا هتنقله بالمره تعمل كشف مباحث ... اللي هوا بيتأكدو من الكومبيوتر انها مش مبلغ عنها انها مسروقه ... مبتاخدش وقت خالص بتديلو الرخصه يكشف ويقوم خاتملك انها مش مسروقه حتى تاريخ اليوم.
6- هتطلع بقى على المرور اللي الرخصه تابعه ليه ... يكون معاك الجواب المختوم بتاع البصمة والرخصه طبعا... تروح هناك تسأل عن مهندس البصمة وتقولو عايز اطابق البصمة.
7-هيجيب دوسيه العربية من عنده اللي فيه تاريخ العربيه كله ويطابق على البصمة اللي عنده في الملف.. وبعد كده هيكتب انها مطابقة .. كرد على الجواب اللي انتا جايبه من المرور اللي رفعلك البصمة ... لازم تختمها من هناك بختم النسر طبعا.
8- طبعا وانتا هناك بالمره في نفس المشوار... اعمل شهادة براءة ذمه ... شهادة المخالفات يعني ... وطبعا بردو لازم تبقى مختومه.
9- هترجع بقى المرور اللي انتا هتنقل ليه ... ومعاك ورق الفحص والتجديد وشهادة المخالفات والعقد المسجل والتوكيلات كمان والرخصة والبطاقة... وصور بطاقتك والرخصة والعقد والتوكيلات دول حبة صور كدة 3 او 4 مثلا لكل ورقه لانك ممكن تحتاجهم.
10- هتروح تعمل فحص فني ... وفحص طفاية .. وتاخد من هناك ورق ممضي ومختوم انك فحصت وورقه صغيره كده بتاعت الطفاية.
11- هتروح بقى عند شبابيك التجديد وتقدم ورقك ... ويستحسن دا اذا مكنش اكيد ...تكون خالع اللوحات القديمه وواخدهم معاك تحت باطك وانتا عند الشبابيك ... ممكن مش متذكر يطلبو منك شوية اوراق رسوم خنيقه كده ومش مفهومه بس مش فاكرها بس هيا بسيطه (يستحسن تاخد حد معاك عشان لو ورقه ناقصه متطلعش من الطابور)
12- هيطلب منك تروح مخزن اللوحات تاخد رقم على الورق .. بعد متاخد الرقم لازم تعمل بوليصة التأمين الاجباري عشان الرقم بيبقى مكتوب في البوليصه.. هتلاقيهم حوالين المرور اكشاك او ناس فارشه طربيزه وشمسيه حتى.
13- تاخد الورق اللي عملتو ده كله وتقدمه وتسلم النمر القديمه اذا مكنش خدها منك وهوا بيديك الرقم الجديد من مخزن اللوحات.. ويبقى انتا كده خلصت وفاضل ان الرخصه الجديده تطلعلك وينادو اسمك تاخدها ... وهتاخد طبعا صرف لوحات عشان تاخد اللوحات الجديده وتركبها.

دا اللي انا فاكره وخلاصة تجربتي مع كذا مرور 3 مرات في العربيات اللي اشتريتها او بعتها.
اهم حاجه اوراقك تبقى تمام وربنا يوفقك وادعيلي لاني هعمل الفيلم ده انا كمان الاسبوع الجاي.

سوري نسيت حته مهمه.

مش لازم تروح مرور مدينة نصر بالعربيه ... لانك مش هتحتاجها لا في شهادة المخالفات ولا في مطابقة البصمة.

لو الرخصة بتاعتك ساريه .. لو فيها يوم واحد حتى ... مش هتحتاج تجيب شهادة بيانات.
لو الرخصة منتهية .. او هتبقى منتهية لما تيجي ترخص ... لازم تعمل شهادة بيانات من المرور اللي العربيه تابعه ليه حاليا