تقرير عن صيانة الـ10,000كم لللينيا ... مع أوم اترا ... جتهم 60 نيله

**eng_ahesham** · 06-04-2013 09:42 PM

روحت انهارده صيانة الـ10,000 للينيا الـ1600 في جسر السويس والملاحظات كالاتي :
1-روحت الساعه 10 الصبح خلصت الساعة 5 وكل الوقت ده قدامي كانوا شغالين في العربية
2-قولتلهم مش عاوز اغير فلتر الهوا علي 10 قالولي لا لازم علشان ميدخلش تراب علي الصبابات و كده هيعمل مشكله ( و في الاخر مغيرهوش لانه مكانش موجود عندهم ) كانوا فاكرينه هو هو بتاع اللينيا التربو او الـ1400.
3-قالولي علي زيت السليسبيد لازم يتغير علي 10 قولتلهم حرام يا جماعه هو 10 دي تبقي العربيه لحقت تمشي قالي لا لازم علشان الفتيس ممكن يحصل فيه مشكله و ساعتها مش هيبقي لينا دعوه بيه لان الاوامر جيا كده من ايطاليا ... المفاجئه بقي ( البهوات من الساعه 12.30 الي الساعه 3.00 مش عارفين يوصلوا لمكان الزيت و 6 انفار منهم 2 مهندسين واقفين قادم العربية و يرفعوها و ينزلوها 4 مرات و في الاخر لاقو مكانه تحت المارش فمرضيوش يفكوه ..... والمهندس اللي هناك قالي معلش اصل احنا ليه بنستكشفها علشان هي اول مره تجيلنا ولسه ماخدناش تدريب عليها (( يعني بيبيعو عربيه من 6 شهور ومش عارفين بتتصاين ازااااااااااااااااااااااا ي ... دي وكسسسسسه ..... والله ممكن يبوضظا العربيات )) و في الاخر بعد ساعتين و نص و عدم معرفه تغيير الزيت و بعد ما قالولي الصبح ( لازم يتغير علشان محيصلش مشكله في الفتيس و الاوامر جيا كده من ايطاليا ) قالي لا احنا كشفنا عليه لاقيناه كويس و مش محتاج يتغير ... الكدب واكلهم كلهم .
4- خراب البيت بقي لما فلتر الزيت للعربيه دي (موتور عاده مش تيربو ) يبقي بـ 190 جنيه ... واطلع للمهندس محمود مدير الورشه يقولي علشان اليورو و علشان الفلتر ده مش موجود غير عندنا و مش هتلاقيه في اي حته تانيه (( بيلوو دراعي )) وبيقولي هو ده السعر و مقدرش اتكلم فيه ابدا .
5- وخدين مصنيعة صيانة الـ10 .... 300 جنيه ... تغير زين و فلتر و شوية check بـ300 جنيه ..
6-مستلمين العربيه بتبرق من جوه ... مدينهالي زي الزفت و متوسخه و ايدهم معلمه علي التابلوه بالشحم و علي جسم العربيه من بره .... واقول للمهندسه الي القرف ده انتوا واخدين العربيه بتلمع .... تقولي معلش الصنيعيه بقي انا مليش دعوه .
ربنا ينتقم منهم دنيا و اخره وانا في طريقي لشكيهم في فيات ايطاليا و تركيا ..

**Land_Cruiser** · 06-04-2013 09:55 PM

السبب الرئيسي لعدم انتشار فيات في مصر هو التوكيل بتاعها. انا مش عارف هي الناس دي عامله عمل ل شركه فيات بره و لا ده ندر عليهم ان اوماترا تبقي واخده التوكيل بالرغم من المهازل اللي بيعملوها. انا فأكر مره من كام سنه وديت لهم عربيه سيينا بتاعه واحد قريبي كانوا بيرشوا البابين شمال و العربيه لونها فضي راحوا البهوات داهنين البابين ذهبي . طبعا لما روحت استلمها لاحظت المهزله و زعقت فيهم جامد فطلعلي واحد من جوه التوكيل مش عارف ده شغلته ايه هناك و كان بيحاول يقنعني ان اللونين لايقين علي بعض و ان انا اللي مكبر الموضوع علي الفاضي و الكلام ده كان في الفرع بتاعهم اللي في ابو رواش قبل ما يقفل

**aliabdo** · 06-04-2013 10:17 PM

الحمد لله انى مخلصت فى اللينيا مع انها حتطلع من عيني

**Ahmed Nasser** · 06-04-2013 11:45 PM

ربنا يلهمك الصبر!!

**abdo7000** · 06-04-2013 11:55 PM

للاسف هو دة الصنيعيي المصري سواء داخل التوكيل او خارجة الصورة واحدة والاداء واحد

**fares_311** · 07-04-2013 02:38 AM

المشاركة الأصلية كتبت بواسطة Land_Cruiser

العربيه لونها فضي راحوا البهوات داهنين البابين ذهبي . و كان بيحاول يقنعني ان اللونين لايقين علي بعض و ان انا اللي مكبر الموضوع علي الفاضي :

مش معقول انت بتهزر !!!!! والا دي نكته والا بجد؟؟؟

**hugan** · 07-04-2013 02:45 AM

وكيلها دمر فيات في مصر
بعد 40 سنه خدمه

**mandoza** · 07-04-2013 12:51 PM

بجد ربنا يكون فى عونك
شكل المهندسين و العمال و هما كانو شغالين فىها كأنوهم أول مرة يشتغالوا ف الينا
و بكل بجاحة بيقولولك لسة بيتعلموا وبيكتشىفوا
و كمان مش عارف يحط زيت اد أية و عما يزود و يشوف المقياس

ربنا يعينك

ممنوع كتابة العربية بحروف اجنبيه
تم التعديل
مشرف ساحة الاوربي
أ2

**seaf_sawy** · 07-04-2013 04:43 PM

هما قضوا على ماركه من اجمل الماركات وان لله وانا اليه راجعون والبقاء لله فى الفيات على ايد اوماترا المفروض ايطاليا تسحب التوكيل منهم ويشاركوا النصر للسيارات وترجع فيت تانى للشعب المصرى وبلاش صينى وكورى بقى