الموضوع: الحمدلله ركبت كاسيت دبل w 235 ebt للاوبترا

السلام عليكم يا شباب
طبعا بعد ما دوشتكم وزهقتكم مواضيع فى كل حتة انى بفكر اغير الكاسيت ومحتار
تم اخيرا تغيير الكاسيت فى توكيل كلاريون المهندسين ، وانا جيبت كاسيت الباين W 235 EBT من عندهم والحقيقة انا ماكنتش محتاج دى فى دى ولكن كنت محتاج مواصفات معينة
والحقيقة الحمدلله انا لقيتها فى الجهاز دا وخصوصا ان الناس كلها بتشكر فى الماركة ديه وبيقولوا عليها بتركبها وتنساها
المهم الشيطان لعب فى دماغى وعديت عليهم بعد الشغل لانهم جنبى ، وروحت اتفرجت ، وطبعا انا قبلها كنت لفيت السبع لفات من توفيقية لشارع دمشق الخ الخ
الغريب فى الموضوع ان موديل الجهاز دا ، كنت هاجيبه من محل السجان ، هوا هوا الجهاز بالظبط ، ب 1250 جنيه ، انا جيبته من كلاريون بكام ؟؟؟ 1050 جنيه ؟؟؟!!!!!!
انا مش قادر اصدق استهبال محل السجان يا جماعة ؟!؟! فعلا فظاااع
المهم الراجع فضل يدورلى على فيشة آيزو عشان مايقشرش فى الضفيرة مالقيناش ، فى الاخر اضطرينا نقشر فى الضفيرة عشان نركب الكاسيت ، بس ماشيلناش الفيشة القديمة ، وقالى لما تجيلى فيشة الايزو تعالالى وانا اركبهالك
المهم الولد فضل يشتغل فى الكاسيت حوالى 45 دقيقة .. وحوالى ساعة ونص بيظبط الفريم ؟!؟!؟!
فضل يقص ويظبط ، ويقص ويظبط ، لان مكان الاوبترا واااااسع على الكاسيت ، المهم بعد ماركبه ومشيت ، ماعجبنيش القصة بتاعته ، رجعتله تانى ، كانت الساعة 10 بالليل قالى تعالالى بكرة
روحتله النهارده ، فضل ينقلنى من واحد للتانى يقنعونى ان الفريم كدا كويس ، مارضيتش
فجابلى فريم بتاع كاسيت كينوود وفضل يعافر معاه ويقص وبتاع ، وفى الاخر اداله نقطتين امير من الطرف خالص وثبته على الجهاز ، بصراحة انا مش عاجبنى الحوار دا ، ومش عاجبنى التقفيل بتاعهم ، ورايى ان الناس ديه تقفيلها بلدى !!
انا بعد مامشيت من عنده قررت اروح محل محترف يظبطلى حوار الفريم دا ، اللى كلاريون ماعرفوش يظبطوه وفضلوا يقولولى اصلو صعب وبيتعبنا !!!
فعلا تحس وانت خارج من عندهم انك عاوز تقول ، من برا هلا هلا ومن جوا يعلم اللللللله

المهم نيجى بقى لمواصفات الكاسيت ، طبعا هوا كاسيت دبل دين ، وفيه USB ، وفيه بلوتوث ، وبالمناسبة البلوتوث اللى فيه متقدم جدا ، يعنى بيعمل Pairing مع الموبيل وفيه كار كيت عشان لو حابب تعمل مكالمة تليفون ، وكمان البلوتوث بتاعه من نوع PARROTT ودا نوع مشهور اوى ، وطبعا جاى مع الكاسيت Microphone بيتوصل بجاك بالجهاز من ورا وبيتثبت فى مكان فى العربية ، انا مثبته فى القايم اللى جنبى .
البلوتوث بيسمحلك انك تدخل على ال phone book وال missed calls وال dialed وال voice commands وحاجات كتير من خلال الكاسيت ، ولو هاتطلب او ترد او تنهى مكالمة وكل حاجة من الكاسيت .
كمان ممكن تشغل الموسيقى والاغانى اللى على الموبايل من خلال تقنية البلوتوث ، ومش بس كدا ، لا تتحكم فيها كمان ، يعنى تقدم وترجع وتوقف من الكاسيت
وكمان الكاسيت فيه ميزة انه بيتوافق مع ال Ipod & iphone
وفيه طبعا AUX
الجهاز بيقرا فولدرات وفيه اوبشنز كتير عشان تعدل زى مانت عاوز ، بس هيا محتاجة تقرا الكتالوج شوية لان المينيو مش سهلة اوى
المهم خلاصة القول ان الجهاز لحد دلوقتى انا شايفو ممتاز وفيه الحاجات اللى انا عاوزها ، بس الحقيقة انا حاسس ان الكاركيت لما بكلم حد بيقولى الصوت بعيد اوى ، مش عارف هل انا محتاج اعدل حاجة فى السيتينجس ولا فيه ايه !!
يلا ماعلينا ... كلو يقولى ماشاء الله لا قوة الا بالله ، والله يباركلك ياعم زيكو :)