لهذا السبب لا تشاهد برنامج باسم يوسف

**smartchoice** · 17-04-2013 06:58 PM

السلام عليكم و رحمة الله و بركاته

من وجهة نظرى أنا أرى أن الكثير من النقد الموجه من باسم يوسف للأخوان حقيقى و أوافق على كثير منه.
و بغض النظر عن أن هذا النقد لن يقدم و لن يؤخر فهناك سبب أدعى للتوقف عن مشاهدة البرنامج.
هذا السبب هو كثرة الأيحاءات القذرة اللى أصبحت سمة رئيسية فى البرنامج فهو يلوث العقل و السمع و يميت القلب.
فمثلا كلمة الشكر التى أصبح لها معنى قذر يطرء فى مخيلتك كلما سمعتها...تخيل و أنت تقرأ القرأن الكريم أو تقرأ أحاديث النبى عليه الصلاة و السلام و يطرأ هذا المعنى القذر فى مخيلتك و العياذ بالله.
ناهيك عن أن البرنامج أصبح لا يصلح للمشاهدة العائلية و لا يوجد رجل عنده القليل من الدين و الرجولة يسمح لزوجته و بناته بمشاهدة هذا العبث القذر.

و أحب أن أوضح أيضا أننى لا أوافق على الكثير من التجاوزات اللفظية و الأيحائية الصادرة من بعض ممن يحتسبون على التيار الإسلامى فالعبث عبث و الخطأ خطأ مهما فعله الناس و أنتشر و هذا حتى لا يصبح الموضوع مقارنة بين من بدأ العبث أولا و لا من أكثر من الأخر عبثا و إنما الغرض الأساسى هو تنقية أسماعنا و أبصارنا من كل هذه القذارة.

و أدعوا الله أن يهدى معدى هذا البرنامج و يهدينا و أياكم لصالح الأعمال و دمتم فى رعاية الله و أمنه.

**Y a r i s** · 17-04-2013 07:18 PM

معاك حق يا عزيزي بس اذا هو ده السبب في ان الواحد ميشوفش برنامج باسم يوسف .... يبقى من باب اولى. اننا نمسح تالت تربع القنوات. لان برضوا فيها تلميحات جنسية والفاظ قذررررة كثيرة .

حتى كثير من الدعاية والاعلانات بقه فيها تلميحات كتيرررررة .. ومع ذلك الناس بتتفرج وبتسقف .

@@@@@@@@@

لكن انا عن نفسي ... بصراحة اتصدمت في باسم يوسف. اول ما طلع قلت عليه مبدع ومش لازم نقيد ابداعه وعمل مسرح وكون نفسوا وده شيء جميل كفاية انوا فكر انوا يعمل برنامج كوميدي فكاهي ومسرح ويرفه عن الناس. .... وبعد فتره اكتشف ان الانسان الي مقدم نفسوا في اول حلقه للبرنامج على انو مبدع يطلع ولا مبدع ولا بطييييييخ ده برنامج امريكي. قام هو بسلامتوا خد نفس الفكرة ونفس الحركات ونفس المسرح وديكوروا ونفس الايمائات ونفس الايحائات. وقام عملها لنا بالعربي ... ومش بعيد ان الايفيهات. هيا هيا الامريكية بس بيقولها بالمصري ده حتى ترقيصة الحواجب !!!! ومش بعيد السخرية على الرئيس اوباما هيا هيا بينقلها حرفية بس على رئيس مصر !!!
تقليييييد اعمى وخلاص ...

ايه الفرق بينوا وبين المؤلف الي بيشوف فيلم اجنبي يعجبوا يقوم كاتبوا بالعربي وحاطط عليه اسموا ... انا بجددد حزين. الابداااع مات عندنا في مصررررر لدرجة اني بشووك. ان الاهرامات الي عندنا في الجيزة يكون فرعون سافر المكسيك. شاف الاهرمات الي عندهم هناك قام عجبتوا الفكرة و جيه عملها هنا في مصرررر .

ياراجل يا طيب ده حتى لمن بشوف لوجو لشركة مصرية ويعجبني واقول لنفسي ازاي انا مخطرش على بالي فكرة التصميم الجميلة دي ... شوف ازاي يا اخي فكرة بسيطة بس طلعت حلوة وجميلة ... بعد فترة اكتشف انوا هوا هوا نفس اللوجو موجود بره بس اجنبي و المصرين بالفوتو شوب شالو ده وحطو ده. ونسبوه لنفسيهم ... مفيش ابدااااع خالص في بلدنا. الناس بتقلد وخلاص ... وباسم يوسف اصبح مقلدااااااااتي فقط لاغيرررررر ... ( لهذا السبب. لا تشاهد باسم يوسف ) من وجهت نظري الشخصية !!!

**تامر.محمد** · 17-04-2013 07:53 PM

متفق معاك

و حتى النقد مش كله بقى حقيقي

حلقة قطر مثلا كانت مثال لترويج الاكاذيب , اللي هو بيحاربه من ساعة ما ظهر , للأسف

**Dr_Mido** · 17-04-2013 08:04 PM

المشكله مش برنامج المشكله ان الاعلام الخاص والحكومي عاوز قنبله موجه ونبداء علي نضافه مفيش معايير اي حاجه في اي برنامج بيطبق

**تامر.محمد** · 17-04-2013 09:18 PM

المشاركة الأصلية كتبت بواسطة beso516

وزى مابينزل التحذير اللى فأول كل حلقه
وبيحذر ..... فالى مش بيعجبه اللى بيقدمه باسم ميتفرجش عليه بكل بساطه
يعنى بأختصار اللى مش عاجبه باسم يوسف يايروح يقدم بلاغات زى ماناس عملت يا ميتفرجش عليه

باشا التحذير ده مالوش ادنى قيمة , احنا ما عندناش هنا المبدأ ده اصلا , مفيش حاجة اسمها كده عندنا

**hugan** · 17-04-2013 10:03 PM

تحليل ممتاز
برنامج لايصلح ان يشاهده اسره محترمه
كل من يخاف علي اخلاق اولاده يتجنب مشاهده باسم يوسف
قمه في احطاط الاخلاق
واستخدام المعاني والمصطلحات والايفهات الجنسيه
مش عارف ايه علاقتهم بالسخربه والنقد
لدرجه اني منعت اولادي مع اصرارهم انهم يتفرجوا عليه
وعملوا ثوره ضدي
بحجه ان زمايلهم في المدرسه بيتفرجوا عليه
استغربتا ان في اهل يسمحوا لاولادهم في اعدادي او ابتدائي
يشاهدوا مثل هذه التفاهه وقله الادب