الموضوع: حادثة وعبرةودعاء

تعرضت لحادث انا وزوجتى فى يوم 24 \3 \2013
انا الحمد لله اول يوم اجلس امام الكمبيوتر قمت بإجراء عمليتين وتركيب شرائح جراء تهشم الكوع وكسر بالكتف وكسر بالحوض وكسر فقرة فى العمود الفقرى
اما زوجتى الى اليوم فى العناية المركزة ولم تفيق الى الان لان الخبطة جت فى الدماغ بالاضافة الى كسور بالساقين والحوض والقفص الصدرى ارجو من الجميع الدعاء لها بالشفاء واخبار اى احد ان يدعو لها

الحادثة حصلت واحنا بنعدى الكورنيش عند كوبرى ستانلى كنت ذاهب للكشف عليها احنا من المحلة وعربية جيتا كانت بتاخد غرزة يمين من ورا ميكروباص كان عادم الرؤيا عليها خالص وهو كان لازق فيه وهو كان بياخد الغرزة كنا على الكبوت

احمد الله على كل شئ لاكنى اسألكم الدعاء لكى يأتى فرج الله وان يتعظ كل من يركب سيارة فى التأنى لانه لا يعرف الالم الا من هو فيه سبحان الله خبطنا ولا كأنه داس بطه فى الشارع لم يسأل ولم يتصل ولا اى حاجه سبحان الله
انا اتعلمت كتير فى الفترة دى وقربت من ربنا اكتر انا يعتبر صرفت كل ما املك ( اقسم بالله الى الان اكثر من 110 الف عرفت اد ايه سرقة وجشع المستشفيات على فكرة انا دكتور اسنان وان شاء الله اليومين اللى جايين هنحاول ننقلها مستشفى حكومى ) واحمد الله ومش زعلان على كل اللى حصل لانه ان شاء الله خير لاكن اللى ينقصنى زوجتى هذا كل ما ارجوه من الله واطمع فيه لانه مستحيل الاقى زيها
انا عارف انى اخطأت بس والله عن جهل عمرى ماعديت قبل كدا من هناك ومش خبير فى الانفاق دى انا حسيت انى عملت حاجه غلط بس كنت عديت نص المسافة حسيت انى اخطأت
المهم الناس تستفاد ومتكررش نفس الغلط سواء التعدية او التسرع فى السواقة
والمهم اكتر الدعاء لها ونشر القصة للعظة والدعاء على اى حد او اى مكان على النت او فى الحياة العادية انا نفسى مصر كلها تدعلها
على فكرة انا سنى 30 سنة وزوجتى 25 وبقالنا 5 سنين متزوجين يعنى فى مقتبل العمر
وجزاكم الله خيرا