الموضوع: مساعدة من رجالة بورسعيد بخصوص العجلة الكهربة اللى عاملة زي الموتوسيكل دي

مساء الخير علي المنتدي رجالته و اعضائه و مشرفيه
السؤال للجميع بصفة عامة و للبورسعيدية بصفة خاصة


البتاع ده اسمه ايه
شوفته عندي في الزقازيق و حصل حوار كدة مع اللى راكبه و شوفته تانى في بورسعيد بس ما عرفتش اوقف الراجل اللى كان راكبه و اكلمه
المهم انا هاخد اقتباس كنت كاتبه قبل كدة علشان ابسط الموضوع
" روحت كمان سألت عليها في محل بيبعها هنا بعد ما وقفت واحد في الشارع و سألته و قالي عملية جدا و فضل يشكر فيها و قالي جايبها ب 2600 ومعاها وصلة كهربة بيشحن بيها ولا بيروح لا ميكانيكي ولا بتاع زيت ولا اى حاجة و قالي علي المحل
روحتله لقيتها بقت ب 3100 موديل اسمه رالكس شبه اللى في الصورة ده جدا مع الاختلافات في حجم العجل و الكرسي اللى ورا لان اللى شوفتها هنا بتتفتح و بتبقي كرسي لو عاوز و بتبقي شيالة و بتتفتح بالعرض لو عاوز
عجبتني جدا و عملية جدا علي حسب ما شوفت و سمعت من الراجل
اقصي سرعة ليها 45 كيلو
ليها 5 بطاريات و بتتشحن بالكهربا
ما بتحتاجش تروح لبتاع زيت او ميكانيكي او مش عارف ايه كدة تاني حسب ما الراجل قالي
انا لسة بادور علي الموديل اللى موجود هنا اللى هو الرالكس ده Rallex E-Bike ومش عارف ايه رأيكوا فيها
عملية ؟ تستاهل المبلغ ده ؟ انا لما دورت علي السعر بتاع الصين لقيتها 377 دولار يعني بسعر النهاردة 2599 جنيه يعني زي ما الراجل قالي قبل كدة 2600
فمش عارف اجيبها بالمبلغ ده ولا استني ترخص ؟ ولا هي وحشة اساسا ؟ انا مش محتاج حاجة تجري انا محتاج حاجة كدة هادية تساعد الواحد لو رايح مشوار ولا حاجة
محتاج مساعدة و اشوف آراء الناس هنا ايه
و حد يعرف بتتباع فين تاني و في ارخص من كدة ؟ "
في حد يعرف عنها حاجة ؟
سعرها اسمها او بتتجاب منين ( السؤال هنا للبورسعيدية علشان لو ارخص من السعر اللى شوفته هنا يبقي اجيبها من هناك )
وتحية طيبة للجميع و عذرا علي جهلي بالامور المتعلقة بالبايكات

مافيش حد قادر يفيدنا ؟
اى معلومة طيب