الموضوع: صيانه 10000 شارك

الاخوه الاعزاء
داخل على صيانه 10000 كيلو انشاء الله
التكاليف كام؟
و في رايكوا ينفع اعملها في المنصورة و لا لازم القاهره؟

بص ياباشا .. أنا كنت لسه عامل صيانة الـ 10000 من اسبوعين ودفعت حوالي 540 جنيه تقريبا

واللي بيتم كالآتي :

- تغيير زيت الموتور
- تغيير فلتر زيت
- تربيط عفشه وتنظيف من الأتربه
- عمل Rotation للكاوتشات
- فحص نسب الزيوت الباقيه زي زيت الفرامل وزيت الفتيس وأي زيوت أخرى
- تنظيف فلتر الهواء الخاص بالتكييف
- عمل فحص لتيل الفرامل (في حالتي أنا المهندس قاللي العربيه عايزلها طقم تيل أمامي بـ 600 جنيه بس ماكانش معايا فلوس تكمل)
- تربيط أو شد فرامل اليد

وطبعا فوق كل اللي فات ده .. لو انت عندك أي حاجه في العربيه مش مريحاك أو فيها مشكله تقول عليها طبعا

وبالنسبه لعربيتي (لانسر بومه 2013) زي ماقولتلك فوق .. التكلفه كانت 540 تقريبا والتفصيل بتاعها :

- 260 جنيه زيت موتور
- 60 جنيه فلتر زيت
- 150 جنيه مصنعيه
-20 جنيه غسيل سياره
- 10% ضريبه
يبقى المجموع حوالي 540 ... وفي حالة اللانسر شارك أعتقد المصنعيه بتزيد 50 يعني بتكون 200 جنيه بدل 150

وبالنسبه لموضوع عمل الصيانه عندك في المنصوره .. اتصل بالتوكيل على رقم 16606 وقولهم انك من المنصوره وعايز تعمل صيانة الـ 10000 وشوف هايقولولك أقرب فرع ليك فين .
وحاول تشوف هنا في المنتدى لو في حد عمل صيانه في الفرع القريب منك ورأيه ايه في الصيانه عشان في فروع وحشه ( دايموند موتورز الفرع الرئيسي - نوعا ما معاملتهم كويسه).

وبالتوفيق ياباشا