الموضوع: الحل الاكيد والنهائى للاقلاع عن التدخين عن تجربة

المشاركة الأصلية كتبت بواسطة rapid

الحل الاكيد للتوقف النهائى عن التدخين عن تجربة شخصية وبدون شراء ادوية او سجاير الكترونية او اتباع وصفات غذائية او التدرج فى الشرب او .. او .. او .. بكل بساطة الحل يكمن فى ...


الإرادة


بصوا يا جماعة من الاخر انا كنت مدخن من اكتر من 10 سنوات لفترات متصلة واحيانا متقطعة جربت فيهم معظم انواع التدخين سجاير وشيشة وبايب بدافع حب الاستطلاع والتجربة واستقريت فى الاخر على نوع معين من السجاير لحد ما كرهت التدخين وحسيت انها عادة ملهاش اى ستين لازمة "بجد مش شعارات" فقلت كفاية كدة وقررت التوقف عن التدخين خصوصا بعد ما بدأت احس بتاثيرها فى شكل نهجان وتعب وفلوس طايرة فى الهوا وخلاص

الا انه كان فى مشكلتين بيواجهونى كل ما انوى ابطل ويخلونى ارجع تانى للتدخين زى الاول ويمكن اكتر .. ايه هما؟ (الاصدقاء والسفر)، المشكلة الاولى كان فى اتنين اصدقاء مدخنين كنت كل ما ابطل واقابلهم مكنتش بعمل حاجة غير انى اقعد اتفرج عليهم وهما بيشربوا سجايرهم ويطلعوا من نخاشيشهم (ابالسة ابالسة يعنى) والشيطان يزينلى الدخان ده واحساس ابن تيييت .. بالظبط احساس واحد ما اكلش من اسبوع جابوله اتنين قدامه بياكلوا ما لذ وطاب من الطعام الفاخر الساخن .. والنتيجة معروفة طبعا

اما المشكلة التانية هى انى فى السفر مكنتش اعرف امشى ولا اتكلم ولا افكر ولا اتفرج عالدنيا الا والسيجارة فى ايدى .. احساس بان السيجارة بتدينى امان ودفء غريب وونسة كدة كانها صاحب حميم، ولو مكان جديد بازوره مثلا مكنتش بتمخمخ واعرف اتامل فيه غير والسيجارة والعة وحاجة اخر همبكة

الى ان قررت التوقف التام والنهائى عن التدخين وبالارادة فقط لا غير لانى مقتنع ان التدخين اتفه من انى احايله بالمهدئات والادوية والتدرج وكل الحاجات دى .. عايز تبطل بطل وما تدوشناش معاك "ده لو انت عايز يعنى" وتغلبت على مشكلة الاصدقاء وبقيت اقعد معاهم وهما بيدخنوا وبقوا والله العظيم بيصعبوا عليا مع انى كنت زيهم من ايام قليلة، وكنت خايف انى ارجع للتدخين فى اقرب سفرية الا ان ربنا كافئنى والحمد لله ..

من يومين بس راجع من سفرية مدتها خمس ايام .. والله العظيم ما افتكرت السيجارة غير قبل الرجوع بيومين وفضلت اضحك واستهيفت نفسى على الوهم والخوف الكبير اللى كنت شايل همه انى ارجع تانى فى السفر (ارادة حقيقية وكرم من ربنا)
وانهاردة بقالى اكتر من شهر ونصف ما ولعتش سيجارة والحمد لله ومش ناوى اولعها تانى لا هيا ولا اى نوع تدخين تانى بفضل الله

برغم تدخينى الا ما كنتش شايف نفسى صح 100% مهما عملت، كنت حاسس انى عاجز وضعيف وامعة ومش قادر اخد قرار حتى لما كنت اشوف واحد متدين او ملتحى بيدخن كان بيسقط من نظرى فورا ..

وبرغم تدخينى الا انى مكنتش بشوف نفسى نضيف 100% (والنضافة هنا بمعناها الحسى والمعنوى) عارف لما تشوف حديقة جميلة سبحان من ابدعها بس فى ركن مليان زبالة وحشرات وكلاب ضالة (اهو ده اللى كنت حاسه)

والله يا جماعة التدخين ده نقمة وغفلة من اللى بيشربها فى المقام الاول وانا بطلتها بكيفى دلوقت احسن ما ابطلها بكيف الطبيب قدام شوية لو كان فى العمر بقية .. واللى بيحايل نفسه بالادوية والسجاير الالكترونية عشان يبطلها اقوله ربنا يوفقك بس لو بطلتها بمزاجك وارادتك هيكون افضل واكيد سمعتوا عن ناس بتدخن من 40 سنة وخدت القرار فى ثانية ومرجعتش تانى

واحتمالية العودة للتدخين بعد الاقلاع بالارادة بتكون اقل بكتير ويمكن تكون منعدمة مقارنة بالاقلاع من خلال الوسائل المختلفة .. ربنا يعافينا جميعا

دى يا جماعة تجربتى حبيت انقلها ليكم بكل امانة .. وحاجة اخيرة عايز اقولها ان التدخين مش مجرد عادة انما اسلوب حياة ولو قدرت تفك منه هتقدر هتبطل حاجات كتير غلط فى حياتك وترجع بنى ادم قوى يقدر يقول للغلط لأ (والاهم بمزاجه)

الحمد لله ان ربنا عافاك من العادة السيئة دى و بجد الف مبروك
و انا عندى مثالين طازة عكس بعض واحد لسه مبطل بعد 25 سنة شرب سجاير بالارادة برضه و التانى للاسف الشديد لسه جايله مرض خبيث فى المعدة بسبب السجاير ربنا يعافيه و يعافى كل مدمن من البتاعة دى