الموضوع: الغناء الهابط من يدعمه ؟

راكب الميكروباص واسمع لك اغنيه جميله جدا . واحدة بتقول : أوعى تقول لحد على اللى انت عملته فيا .
والله ياستى انا ما عملتش حاجه جايز الاستاذ اللى قاعد فى الكرسى اللى جنبى ؟ طيب قولى هو عمل ايه جايز نعرفه ؟ وبعدين لما انتى عايزة تدارى على العمليه بتصيحى لنفسك ليه و بتغنى ؟
هو دة بقى الحفاظ على القيم والعادات والتقاليد ؟ ولا دى ثقافه الترامادول ؟

المهم الاغنيه خلصت بس فكرتنى من كام يوم كدة راكب تاكسى واسمع لك اغنيه عجيبه غريبه بس ليها مدلول ما يفهموش اى حد ( انا بقى الفتك اللى فهمها ) الاغنيه بتقول :
* الواد دة بيحبنى علشان مافيش غيرى بيلاعبوا .
* فى اللعب انا مريحه ما انا اصلى فاهم لعبه .
* وانا كمان بحبه من شعر راسه لكعبوا .
* ياكعبوا كعبوا .... حبيبى وانا الاعبه ......... كعبوا .
* دخل الجنينه ودخلت معاة ...... الله .
* أكل التفاحه و أكلت معاه ........ الله .
* الحب جميل قوى قوى محلاة .
* قربت منه كدة شويه ... الله ...... والحب عايز الملاغيه ...... الله . واهم شئ الحنيه .
* العين لاغاها انا قولت الله .
* و بشوق ندانى انا قومت معاة .
* واحلاى كلام فى الهوا قولناة .

طبعا الاغنيه ملفته وفكرتنى بشعار شركه أبل ( تفاحه مقطومه ) وهو شعار انا بعتبرة تمجيد للشيطان ذات نفسه وهو نفسه ما ظهر فى كلمات الاغنيه ( دخل الجنينه ودخلت معاه , اكل من التفاحه واكلت معاه , ولاحظ موضوع انا اصلى فاهم لعبه؟ ) طيب دة لسان حال مين ؟ الشيطان ؟ مش بيفكرك بقصه أدم عليه السلام ؟ مش دة تذكير وتمجيد لاول معصيه للانسان واول فرحه لابليس بأغوائه لادم ؟ طيب ماتشوف اهداف شركه أبل ؟ نشر الاغانى والمعلومات ( المتحكم فيهم من قبل اعداء الاديان ) ؟ طيب ليه كل منتجاتهم تحمل اسم ( أى ) اينعم هم يكتبوها ( i ) مش ( eye ) لكن بردة ملفته للنظر ( اى فون , اى باد , اى بود ) .

المهم روحت البيت قلت احمل فيلم كرتون لبنت اختى علشان تتفرج عليه اصلها فى عمر الزهور وباديه تتابع الكرتون وكدة . المهم حملت فيلم مشهور جدا فى وسط الاطفال وكل الاطفال بيحبوة انه فيلم ( شركه المرعبين المتحدة ) دة بالعربى وبالانجليزى اسمه ( Monster ) واتفرجت عليه وياريتنى ما اتفرجت . دة فيلم ماسونى يحمل رساله واضحه وضوح الشمس .
قصه الفيلم تدور حول كائنات مرعبه ( وحوش ) تحصل على طاقتها عن طريق الذهاب لعالم الانسان عن طريق ابواب تفتح لهم فى المقابل العالم البشرى فيحصلوا على طاقتهم عن طريق الصراخ الناتج عن تخويف الاطفال البشريه ( البعبع يعنى ) . فتتوالى الاحداث ليكتشفوا فى النهايه انهم يحصلون على طاقه اعلى وافضل عن طريق اضحاك وترفيه الكائنات البشريه وليس تخويفهم . ( دة الاسلوب الجديد المتبع بدل الاسلوب القديم بتاع التخويف . عرفت بقى الاغانى والمخدرات والانحلال الاخلاقى مين الداعم ليهم ؟ ) وبعدين فى شويه ملحوظات :
اولا : وجود شخصيه ظريفه وجذابه وهى شخصيه ذو العين الواحدة .
ثانيا : ان البطل فى الفيلم هو صديق لذو العين الواحدة ( يعنى البطل هو صديق ذو العين الواحدة )
ثالثا : فكرة السفر عبر العوالم بين كائنات الوحوش و عالم الانسان او الارض لهدف التلاعب بفكر الانسان وجعله اما فى حاله خوف او انبساط لهدف لهذة الكائنات ايا كان ( الحصول على الطاقه او الرضا عن النفس اى هدف كان ).
رابعا : و اة من رابعا . رساله صريحه فى اغنيه نهايه الفيلم يصاحبها وجود شعار عبارة عن حرف M كبير يتوسطه عين واحدة ( دلاله واضحه للماسونيه بحرف M والعين الواحدة ) وشوف كلمات الاغنيه فى النسخه العربى :
( لو كان عندى فلوس كنت اسكن فى قصور وليها بلكونات وحوليها زهور . من غيرك الدنيا مايبقلهاش لزوم ( فى وجود الشعار ) . انا لازم اعترف ان انت نصير للمظلوم . من غيرك الدنيا ما يبقلهاش لزوم . انا وانت سوا علطول دايما نعيش . احنا لبعض دوا واحد بس ما يمشيش . مش لازم اقولهالك ماهى واضحه بعدسه زووم . من غيرك الدنيا ما يبقلهاش لزوم .

جايز تقول عليا مجنون ؟ . جايز معاك حق . وجايز دى مش حاجه وحشه ؟ . مش حاجه وحشه انك تدقق المجتمع بيسمع ايه وبيتفرج على ايه ومين اللى بيوجهه وإزاى ؟ ولو معترض معايا بلاش تحكم عليا بالجنون . انا عارف ان فى ناس هتشوف دة من وجهه نظر انى مؤمن بنظريه المؤامرة وكدة وبهول لكن انا بصفتى متابع لكتب دحض وكشف الماسونيه والصهيونيه العالميه للكتاب الغرب قبل العرب احب احذرك واقولك فكر فى الموضوع .
نصيحه منى انك تهتم بقرأة كتب زى بروتوكولات حكماء صهيون او مثلا كتاب : احجار على رقعه الشطرنج للكاتب وليم جى كار اللى مات بطريقه غامضه بعد نشر كتابه : satan the prince of this world واللى بدور عليه مترجم مش لاقيه .

دي كمان بيعملوا برامج للغناء ده يعني بيعتبروا فن
ازاي مش عارف ؟؟!!!