الموضوع: ادوا الامانات الي اهلها - بس لما يبقي عينك في الامانه ملعون ابو اهلها

ليا صديق مسافر رحله عمل بره وراجع كمان كام يوم
فقولتله يجيبلي معاه موبايل من هناك
فكل مره رجوعه يتاجل شويه
فقولتله ابعتهولي مع حد يكون نازل مصر
فالراجل مشكورا بعتهولي مع واحد صاحبه والمفروض ان صاحبه وصل مصر الاربعاء الماضي
فمرضيتش اتصل بيه علي ما يقعد مع اهله شويه ومبقاش تقيل عليه
وعدي الاربع
والخميس
والجمعه كمان ومعبرنيش
كلمته يوم السبت مردش عليا
كلمته تاني
كنسل عليا
وصديقي قالي انه عنده ظروف وحاله وفاه
كلمته الاحد مردش عليا
طبعا كل ده وانا شايط وحاسس بالخيانه
المفاجئه بقي
ان صديقي كلمه
والراجل قاله ان مراته عجبها التليفون وحياخدهولها
مع انه كان معاه في نفس السفريه والاماكن
بس حجته انه مشتراش تليفونات
وتكرم ووافق يجيبهولي بعد ما يرجع من سفريه زياره لاهله لما صاحبي قاله اديهوله وحجيبلك غيره

بجد لا تعليق
ولا اي اندهاشه
مقولكوش انطباعي ولساني كان عاوز يقول ايه ولولا احترامي لصاحبي كنت قولته
قولتله يكرم علشانك وهاتلي غيره وانا مش حاخد حاجه منظوره
حسبي الله ونعم الوكيل
دا الواحد لو معاه امانه بتاعه حد مبيقربش منها
دا لو باكو بسكوت الواحد مبياكلهوش ويشتري لصاحبه غيره
لان ده بتاع فلان ودي امانته
صاحبي طيب جدا و انا اشتري كرامته بالدنيا واحط لساني جوه بوقي علشان ميزعلش من كلامي علي صاحبه الخاين للامانه
مش قادر مفضفضش بس اتخنقت
مش علي التليفون
لا علي النفوس اللي بقت طماعه وتخون الامانه علشان عجبتها