احذروا من سيتى مندوبين سيتى بنك النصابين
انا تعرضت لموقف من سيتى بنك اقل ما يقال انه نصب
المسألة ببساطة انى من فترة كنت عايز اعمل كريدت كارت فى سيتى بنك و قمت بالفعل بتقديم طلب على موقع سيتى بنك مصر على الانترنت ، و مر وقت طويل و عملت كريدت كارت فى بنك بخلاف سيتى بنك ، المهم بعدها اتصلت بى موظفة فى سيتى بنك و قالتى انك كنت مقدم طلب على الانترنت بخصوص الكريدت كارت و قلتها شكرا انا خلاص عملت واحد تانى فى بنك تانى ، قالتى ازاى دا احنا البنك بتاعنا فيه و فيه و فيه ، و قلتها خلاص شكرا انا مش محتاج اعمل كارد فى سيتى بنك الان ، و بعدها بحوالى شهرين ، اتصلت بى نفس الموظفة و عاودت نفس المحاولة ، و انا رديت بنفس الرد ، بعدها بحوالى شهر و نصف اتصلت بى الموظفة نفسها و قالتى على فكرة البنك عندنا عامل عرض و هو ان سوف تعفى تماما من مصاريف الكريدت كارت اول سنة يعنى من الاخر الكريدت الكارت حيطلع ببلاش ، و انا قلت طالما كدة مش حايخسر مع الكروت اللى معايا و لظروف خاصة بالعمل منعتنى من الذهاب الى مقر سيتى بنك فى ش مصدق قالت لى الموظفة مش مشكلة احنا حنتصرف ، و ارسلت لى من طرفها شخص قالى لى انه مديرها و سوف ياتى بالورق لى و نخلص الاجراءات ، و بالفعل تم الموضوع و اتى بالورق و اثناء انهائى لجميع الورق سألته هل فعلا الرسوم الخاصة بالكارت مجانية ، قالى اه فعلا ده اول سنة فقط ، المهم الكارت طلع بعدها و تم ارساله لى فى العمل ، و مع اول شهر جالى كشف الحساب به تكاليف اصدار البطاقة و هو 100 جم فقول هو ايه اللى بيحصل ، فاتصلت بخدمة العملاء قالولى لا احنا منعرفش حاجة عن موضوع الاوفر بتاع الاعفاء من الرسوم ده ، و حولونى على قسم التسوية قالى احنا اتصلنا بالفرع و قال انه لا يعمل ايضا عن هذا الموضوع ، قولتهم يعنى ايه هو انا اتعرضت لنصب من ناس ملهومش علاقة بالبنك و لا ايه ، راح قايلى لا مش بالظبط هم بيبقوا مبيعات و دول بيبقوا شغالين مع شركة تانية تعمل مع البنك من الباطن او حاجة زى كدة ، و بيقولوا كلام كتيرا دايما علشان يعملوا مبيعات كروت كتير و مش شرط ان الكلام ده يبقى مظبوط ، قولتله يعنى ايه ، هو انا بقول ان الموظف بتاعكم اللى اتصل بى علشان اعمل الكارت قالى فترة سماح 55 و انتم عاملين 52يوم لا يا رجالة انا بقول حاجة تانية خالص ، انا بقول ان المصاريف السنوية للكارت للسنة الاول اتقالى منكم انها حتبقى مجانية و على هذا الاساس انا عملت الكارت ، راح قالى بس انا اللى فى ايدى دولقت انى اعمل خصم على الكارت 50 % قولتله خصم ايه ، انا مش مسئول عن الكلام النصب اللى موظفين سيتى بنك بيقولوه ، انا لى ان ما تم الاتفاق عليه يتم تنفيذه ، و لن اتنازل عن هذا الحق ، راح قالى طيب ادينا مهلة نعمل تحقيق فى هذا الموضوع و ارد عليك ، و ده حياخد من اسبوع الى اسبوعين ، قولته اتفضل و رجاء الاهتمام بهذا الموضوع و خلصت المسألة على كدة ، و طبعا انا عارف ان معاد سداد الرسوم اللى اتنصب على فيها حيحل قبل ما الاستاذ بتاع التسوية يتصل بى ، و بيقى كدة مضطر ادفع المبلغ او حاضطر دفع فوائد على مبلغ تم ابلاغى بشكل صريح من قبل موظف مبيعات الكارت النصاب بانه معفى تمام و دمتم سالمين
طبعا انا حبيت اقول هذا التنبيه للجميع للانتباه من مندوبين سيتى بنك النصابين علشان الجميع ياخد حذره من هذا الموقف اللى اقل ما يقال عليه انه خداع و نصب لم اتعرض له من قبل مع انى عملت اكثر من كريدت كارت فى بنوك كثيرة ، و لم اصادف لعبة متفبركة زى اللى قابلتها مع سيتى بنك قبل كدة .
تحياتى